India Danbupi’n I Silphut uh a huom jou na diei?

Republic of India kum 50 a chin in tua hun a Lok Sabha speaker PA Sangma lamkaina nuai ah India dung-le-vai ah India Danbupi nuoi a chi-le-zaat chi tuom tuom umna India mipite a huom suoh nai chi telsui in ana vah kawi uhi. ‘The National Commission to Review the Working of the Constitution’ vaiguon tungtawn in India danbupi etthana ana nei ua, a sil mukhiette uh “Reviewing the Constitution” chi’n laibu in ana bawl khia uhi. Tamna a sil mukhiet uh poimaw dieh ahileh ‘Secular’ chi thu teng preamble ah tuong nanleh India pen secular ahilou dan atha in mukhie uhi. Tuaban ah, a sil mukhiet uh tampite lah a state chin a zalenna ahisihleh state ngente dei-le-ngai zong genpha in um hi. 

Mimal kalthu leh nampi khantouna

 

 

Khovel ah lungsim ngaisutna toh kisai mihing zaat tuom tuom um, sil khat pou pou ahoilam a mu pawl, khen khat inlah a selam ngen ngen ngaisut, khen khat kia ahita leuleu le lah mimal kal a kitheisiemlouna a um zieha a hoi ding hinanleh a selam a mu sawm tei tei, pawl dang khat ahikia leh a mi muda nanleh a ngaidan mudalou chi um thei zel. Tuabang kal ah a ngaisutna pomthei sih nanleh mimal khat leh khat kikal a tahsa kimudahna pen umlou chi zong um thei veve hi.

 

Khovel pumpi a gam changkang pen a kigen United States te’n general election asai chiengun ahileh presidential candidatete mun chin gam chin a a ngaidan uh kibanglou ahiman in dem chitah in kidem zel ua, hinanleh a mimal in ki mudah leh kideh lou uh chi I thei chiet uhi. Ideology clash (ngaidan kibahlouna) nei u leh zong a mimal in kideh vate lou uhi. Anaipen a etsahna di’n, President Barack Obama in election hun sunga sithu nam zen a akidempi leh kimu uleh kihau ding bang phiel a kihou uh hinanleh akimu chieng un mimal kal ah ki mudahna um sahlou uhi. President kai pen pen in a kailou pen toh na semkhawm dingin a nuoitah uah koi thei zel uhi.

 

Organisation khen khat ah ahileh mimal kimu siemlouna ziehin a ngaidan uh pawlpi a di’a hoi hinanleh ki pawmpieh nuomlou vevaw ana um zel veve hi. Na kana sep khahna mun khat ah, kou team a manager pa leh team danga manager pa kal a mimal kitheisiemlouna a um ziehin amau gel mai hilou, a nuoi ua semte tanpha nasatah in nasepna leh ngaisutna hing subuoipha uhi. Team tuom tuom hinanleh nasep in a tup leh a ngiim kibang ahiman in a ngaidan uh kikum in sungkhawm thei uh hitaleh ka tupna uh nuom tah a tungthei ding hina zenpi, director tanpha a’ng ki involve ngai vawt in um hi.

Zou Ham leh Khangthu National Seminar Lawchingtah in Jou Uh

 

 

Lamka, 5 Jan 2013 (ZLT): Zou Literature Society, India saina leh Central Institute of Indian Languages, Mysore sponsore na nuai ah Jan 3-5 sung Zougal Hall, Zoveng ah National Seminar on the Zou Language and History sai in um a, tuni’n Dr GDP Shastri, Head of Endangered and Tribal Languages, CIIL Mysore leh Shri Chandramani, Research Scholar, CIIL, Mysore te zingun hina toh vaiguon khahna nei uhi.

 

Zingun a pang Dr GDP Shastri, Head of Endangered and Tribal Languages, CIIL Mysore in a thugenna ah Independent India ah nam neuter ham leh tawndan kepbitna dingin pan theitan in pan kilah. 1893 kum in British te’n Linguistic Survey of India ana bawl ua, tuahun apat in tunitan in ham-le-pau toh kisai survey ahi ding bangtah in kibawl nailou chi hi. Hinanleh CILL panlahna toh India gam sunga ham-le-pau chi tuom tuom umte kepbitna dinga pan nasah lah ahidan uh gen hi. India ah Tamil ahisihleh Telegu ham chilei mi tamtah in thei dinga, hinanleh Zou ham chi’n gen lei mi a thei um khollou meithei ahiman in tam bang National level in seminar a tam theipen poimaw a, ma ban a zong pantheina chin a hing panpi di’a masa ka hi zing hi chi hi.

 

Tualeh special guest Shri Chandramani, Research Scholar, CIIL Mysore in agenna ah Zou te’n script na li nei uh pen nasatah a support tu khat ka hi zing hi. Tam toh kisai in zong research kana bawl thamta hi chi’n gen hi. A genbe zelna ah India gam sung Tibeto-Burman mite lah a tam bang mahni script nei a thumna khu Zou te ahi chi hi. Tua bang ahi ziehin Zou namte ahileh mite sanga changkang zaw leh khangtou zaw chipen na script un tahlang hi chi’n athugen jou hi.

Nampi Khanna di’n Ngaidan Tampi Poimawh

 

 

National Seminar on the Zou Language and History vaiguon Zogal Memorial Hall Complex a zah ahi toh kituoh in nam khat Literature khansahna di’a poimawh toh kisai ngaidan tamlou I sung ding.

 

Laibu giel khen khat in Literature ahileh mihing hinkhuo limlang bang, ngaidan leh mihing lungtang a lunggulte puonzahna lampi ahi dungjui in leitung a mihing a um laisie literature pen a pieng zel ding leh lam tuom tuom a khang zel ding chi khat ahi. Tuaziehin literature pen a dih pen pen chi umthei lou leh a dihlou chi zong um theilou chi uhi.

 

Khovel ah Greek ham pen literature lam a hausa pen di’a gintat ahi, khovel a ki zang tam pen English ahileh literature lam ah tua chi hausat senglou ahi man in ham tuom tuom apat kaikhawm in English ham suoh zel mai hi. Literature I chi pen Pu-Pa khang apat I neisa tampi um tham hi, hinanleh khovel khan dungjui in literature zong khang zel ahiman in khangluilai ham pen akichin zawhlouna tampi um hi. Laibu khen khat ah ‘literature is a living thing, that keeps on growing and changing’ chi hi.

Kum 2013 Adi’a CCpur in A Poimawh

 

 

Guite Road - District Damna Di’n: Kum peisa apat sil tungte et in hung hing tung jel dingah NH-39 (Dimapur, Kohima, Tadubi, Senapati, Kangpokpi, Motbung, Imphal) lampi pen nasa sem a hing buoi toujel dinga mu thei in um hi. Naga leh Meitei kal ah kitheisiemlouna lien deu deu ahiban ah, sil neu neuter ban ah Kuki state demand toh kisai in kum dang sangin khahtan in hing um tam zaw dingin lang hi. Tuachi ahitaleh Churachandpur district in tuahun chienga zong ne-le-ta buoilou a I um theina ding lampi um sun Guite road lam pibawl pen alou theilou hing suoh ding hi. Jiribam lam lah bang chituh in siempha nan uleh tua a tunga I gente’n a toupha uh ahi zieh in a buoi ding a theisa ahi jel hi.

 

Lamka Traffic Rules: Kum peisa apat in Lamka police leh Traffic police te’n nasatah in Lamka khopi sungah duty hoitah in hing bawl ua, traffic rule bang feltah in hing enkol uhi. Mipi ni chin a asang a simte ki suhvai, ki touvaina nasatah in nuomtuom a, lampi thoveng deu in kilang hi. Lamka khopi sunga gari nei teng sangin a neilou nichin a kenga lamzawt tamzaw ahiman in mipi a ding khuolna traffic rule pen Christmas leh New Year mei hilou a kumtawn a jui hiden thei leh khopi sunga changkang zaw in kilang hi. Mi tamkhopta ahiman in ahithei tan in pavement/footpath vel a van zuoh, ahisihleh dawr bawlte’n a van koina ua azahna munte u zong suh sieng hinalai leh a dei huai hi. Tuaban ah Lamka sungah gari speed limit poimawta hi. Traffic policete‘n ahithei tan in lamka thuom chin ah two wheeler toh duty in traffic rule botsia a tai suohte tanpha mat hi teitei leh a dei huai hi. Speed limit mai hilou in gari tawlte valid driving license regular deu a check hithei nalai leh!

Kum 2012 Christmas Silthawnpieh

 

 

Kum tengin state government in winter session Christmas kuon, December 15 leh 25 kikal in nei leng ua, tua hun sungin a mun a mun ah mipite’n sil demand nei in bandh leh general strike chite um zing, Christmas kisahkholna nasatah in subuai zing hi. Tukum in ahileh tua I gen session hun sungin zong bandh leh strike um, hinanleh tua sanga khawzaw Meitei film a nungah lim chiing Momoko tunga NSCN (IM) sepei khat tatkhelna ziehin Christmas kisah khol buoina nase dieh in kilang hi. Meitei community in zong Film Forum Manipur, Manipur State Shumang Leela Council leh All Manipur Matam Eeshei Kanglup te panlahna tungtawn in advantage la ua, ahithei tan in Christian te Hundampa pienni lawm dinga ki singsahna suh buoi chitah in subuoi uhi.

 

December 18 ni’a Chandel Mahamani Higher Secondary School ground a siltung, Manipuri actress Momoko Khangembam tunga NSCN (IM) sepai khat gamtatna a dih hi’n Meiteite kiphinna a dih sih china hilou in, molestation zieha state pumpi suhbuoi ahiban ah, a khengval a Christmas hun suhbuoi sawm tei tei ahina pen sakhuo tuom tuom tenkhawmna gam a sil chiin di’n pichin huoilou in kilang zaw hi. Meitei sunga organization tuom tuom lamkai te’n tam kiphinna pen communal line a la lou di’n thupuon bawl nan uleh sil pieng leh bandh supporterte nasepdan ah communal suosah sawm uh ahidan zong kilang hi. Helpawlte gamtatna tengpi ki phinpi ding hitalei I gam ah lemna leh muonna bang chi’n a um ta diei le? Communal issue suosah sawm uh ahidan kilahna ahileh December 24 ni’n Napet Chingloi ah Meitei tangval hon khat in Christmas mang di’a innlam zuon a pei sangnaupang 13te ana soisah ban uah, numei naupang khat zumhuoi tah in ana khoi uhi. Tua thamlou in bandh kilahkhiet nua in zong Christmas mang dinga innlam zuonte bandh bei nanleh lungmuong in peithei lou, sepei thahat in inn tung thei ham ham nalai uhi. Tua bang sil tung kal ah Christian organization leh forum te’n kam khat zong kehlou a sip khin khian a a um pen lamdang chi thei khat in um hi.

Private School v/s Employees & Students

 

 

Kum tha ahi toh kijui in Churachandpur district sunga school umte admission kipat hing hun kiata. Adiehin Lamka khopi sunga school umte ah sangnaupang admission sui tampi hing um ding ahi dungjui in school hoi leh minthang hing kitu ding ua, admission leh hateng tuition fee zong hing khang huai huai dinga lam-et ahi.

 

I gam a government saanginn te a duhdah lou ziehin private school pen summeet bawlna hoitah hing suodoh ta hi. Private school bawlte mit a mu in khang hul hul ua, akum akum in a building uh kehlien zung zung uhi. Maniipur sungah private school pen business hoi mama hing suodoh tahi.

 

Ning kum All Manipur Students Union in survey abawlna uah private school chiet chiet hinanleh admission leh tuition fee a dei dan chiet ua kibawl uh ahidan uh talang uhi. Tunitan in private school toh kisai free structure leh guidelines bangma government apat a um lou ziehin full autonomy nei ahiman un a bawl dan dan uh juilou alampi dang umlou phot hi.

A hing pallun kia ding Behiang vangkhuo!

 

 

India Prime Minister Dr Manmohan Singh in May 2012 a Myanmar avehna ah India leh Myanmar gamgi zul a summet bawlna inn (border haat) a umsa teng ban a adang zong bawlbe ding chi’n Myanmar kumpi toh kithununna suoi ana kai uhi. Border Haats thum koibe ding chi ahi dungjui in India solkal in Myanmar solkal kithuzahpi in tam Border Haat umna di’n mun sawm lam enkhia ua, Behiang zong tua 10te lah a khat in pang hi. Tam mun 10 etkhietna pat a mun telkhiet a umte ahileh Ukhrul district apat Konkan Thana khuo, Chandel apat Molcham leh Churachandpur apat Behiang te ahi. Tam Border Haats thumte ahileh India leh Bangladesh gamgi zul a border haats bangja e khat kibawltha te toh honkhawm ding chi ahita hi.

 

Director General of Foreign Trade in Indo - Myanmar Border Trade tungtawn a sil ki pesawn/zuosawn thei chi’a Pubic Notice No. tuomtuom dungjui a phalna ana piate ahileh:

 

Public Notice No. 289(PN)/92-97 dated 10th April, 1995 dungjui in sil 22 apat summet bawlthei di’n phalna ana um: Gua, kuvate leh aga, malta, maruaitang, louma a pieng haichi chi tuomtuom, theiga, pangal louthul, sing, katha, tahsing chilou gamlah sil piengte,  ankam tang, louthul,  bega, munphia, sing apat pieng gum (resin), nipipaah tang kan-gawhsa, sesame, bekan, spices (excluding nut meg, mace, cloves/long, cassia & singthal/cinnamon), muomthei tobacco leh tomato. Public Notice No. 106(RE-2008)/2004-2009 dated 7th Nov 2008 dungjui in sil 18 phalna piehbe in umkia: Hal namtui (agarbatti), bicycle spare parts, blades, bulbs, kizepna cosmetics, patzam apat pieng puon, hal (fertilizers), kizepna sana (jewellery), insecticides (kumtholou), savun kengkoh, damdawi, peppermint apat pieng thau namtui (menthol), thoukang lou, rong (paints & varnishes), spices, stainless steel um-le-bel, chi leh chini ban ah x-ray paper & photo paper. Tam teng ban ah item 22 guonbe in ana um kia hi.

I gam ah Gangrape hing um hitaleh!

 

 

India sung, a dieh in Delhi khopi sunga numei-suom chi vaniengte hinawnlou, pasal hon in numei khat lungsietna bei kei a soisah toh utlou pia luppi chi kithang mama hi. Kum 10 sungin Delhi khopi ah pasalhon in numei khat sual (gangrape) 10 vei tah um, tua zong innsung hinalailou, gari tailai sunga kisuom hinalai dep.

 

Tunai, December 17 in Zo suonte busahna Munirka leh Mahipalpur kikal ah Biharte numei khat a lawmpa toh bus sungah soisah leh a nungahnu suol in um, India innpi vaihawmna Lok Sabha leh Rajya Sabha gel ah nasatah a genin um, hun danga India political party teng lung kituotah a thukhat pha a sahkhawm uh um khollou hinanleh tamthu ah aw khat in luongkhawm thei uhi. Opposition lamkai Susma Swaraj in mi suoltute khailup in um uhen chitanpha in phutna bawl hial hi. BJP ban ah UPA a party DMK leh AIADMK te’n zong capital punishment pieh hi hen chi’n phut uhi. Khen khat in ahileh misuolte case pen IPC Section No. 307 – tuolthat te toh akibah ding ahi chi’n pang ua, India sunga politician tal lang mama tampite’n UPA solkal tawsot in dan tha siemkhiet ding ahi chi’n phut uhi.

 

National Crime Records Bureau in a record dan in kum 2011 sungin Delhi khopi ah rape case 572 pha. Tukum December 15 tan in 635. Delhi maimai hilou India khopi Haryana, Kerala leh Bangalore te azong rape case tampi um hi.

KHAMTHEI BAWLTE KU’A LAITHOT

 

 

Janni NDTV news report khat a kigen Jaipur a tehsepu kum 50 a upa Dinesh Dwivedi, laisiemna lam a PhD degree ni vei jou hial khat khutdaw genthei tah a hinkho zang in um hi. Ama’n ha teng in school teacher pension sum Rs. 35,000 tunitan in sang zing, hinanleh khutdaw in ahinkhuo zang hi.

 

News ten bangzieh a tuabang hinkhuo zang a khosa ahiei chi’a akan suina uah, a tapa kum 25 a upa, school kaipei nawnlou, khamthei bawl toh umkhawm ua, a tapa in sum demand bawl in a pienna pa zong zataat jou nawnlou khop in sing-le-suong tanpha zang in a pa ana soisah zing ahidan mukhia uhi. Hinkho nuomtah zang a a pension toh hing thei ding hina jenpi lampam a khutdaw leh zum huai tah in hinkhuo zang in um hi.

 

Churachandpur district sungah tel tah in kisui hitaleh innsung bang ja, nu-le-pa bang ja niteng hinkhuo lim-le-kipah a zanglou bang zatah a um ta diei? Eima innsung a security guard bang mai a duty paw gige mi bang jatah I um di uai? I neisa, nihteen-puonsil, um-le-bel, sing-le-suong tanpha zalentah a eima innsung gel gel a koi ngamlou bang zatah I um di uai? Tuathamlou in, nit eng a I lawkhiet, nute’n a kawng ua a zee tinten na ngawn khawmthei bawl tate giinna zieh a zankhe va guo bang zatah I um di uai? Tam bang a hinkho zang innsung leh nu-le-pa te hepi huai chilou I bawlpie thei lah bangma um sam lou, a tuakha te’n bou in thei vai, hinaleh a tuokha nailoute’n tam bang dinmun hamsa pen bang chituh a genthei huai a tai chi gel a gel but hilou hi.