ZOTON 2009 | thum in, kisakhol inlen hing zoutei sam in

New Delhi, November 18, 2009: Lenkawlni muoldan ah hing suo san sing seng dinga, Zodawn tuonglam zawt a tun sunni ahing suo chieng in, ami zata naubang nui in nunnuom a lia le tang zaidei awina ZOTON vaiguon sim di’n ipu ipa’n manglam a ana mat uh Delhi leh a kimvel a um Zo momnou, lie-le-tang, pisei pusei ten MTNL Community Hall, RK Puram, Sector VI, New Delhi lam thathou leh nui silsel in hing manaw siusieu ding uhi.

Jinglam nai 11 lien hing ging tei leh, zuoilah! hall sungah Zo momnoute husa thawm ging chinteng toh tanglai Jerusalem kulpi dimlet a Jesu a lawmdawn ni uh bang in au ziizee uhi. Zou nampi kuongtawl UZO GHQ President Pu Ginsuonhau leh a kai zatamte zong mipi mai ah khuoilu mei tawi in etlawm tah in kiguol diim diem uhi. Khuoilu mei etlawm tah abaan abaan a ahing ki dettuo lai in a nuo lang apat aw nem hiiuhieu in Hold On Your Candle chi la hing kisa heuh heuh in mipi lunggel pawng mama hi.

Tuana la kisa abei toh kiton in Rev, GK Samte aw ngaitah a kikou in ZOTON honna phuui vanlang ngapum in hing sam zua zua ta mai hi. A sam zaw leh zawlou chintaw um man lou in Zopatong ten Pasian phatna la ngaitah kihot ziah ziah in hing pan pei ua, mipite zong um thei meimei nawnlou ahiman un, a umna chiet ua ding in lashna nuomtah hun zang uhi.