Economic Blockade: Vote suina suohta

Manipur Chief Minister Oram Ibobi Singh in January 28 ni'a political party tuomtuom apat Congress a lutte vaidawnna Congress Bhawan mun a thugen aneina ah, BJP, UNC, NSCN(IM) te thakhat ahi chi'n ana gen a, BJP  zong um meimei samlou in ningkum Oct 31 jankim apat UNC Blockade khu Congress govt vai hawm siemlou zieh sil pieng ahi ban ah, Congress vaihawmna nuai ah kituona leh kilemna sangin khat-le-khat kal a kithei siemlouna pieng zaw ahi chi'n thutna bawl jel uhi. UNC in tam bang sil tung ding ahipen Economic Blockade ana pat lai ua thei mama ding un gintat huai a, a issue uzong national level a tut teitei sawm a panla uh ahidan kilang chieng mama hi.

UNC Economic Blockade leh state integrity pen election agenda a suo ban uah, tam thu a election hing ki veng doh ding bangta hi. Tuabang kal ah, state sunga education puophat ngai ahidan, development toh kisai etthah ngai ahidan, nehgu-tahgu toh kisai siemphat tua tampi um ahidan genkha in um nawn ta dingdeng lou hi.

Manipur Election: Gilbem apat Gilzawl, Gilzawl apat Gilbem!

MANIPUR ELECTION

Gilbem apat Gilzawl, Gilzawl apat Gilbem!

Mipil, gulhit chil getthei ding khop a kigen,  Greek philosopher ban ah Western philosophy mukhetu chi'a chiemte a um Socrates in "I was really too honest a man to be a politician and live" ana chi hial nama a, tutung a politician party heng zengzung te apat dihtatna leh chitahna umlou chipen chieng mama hi.

Politician ichite pen Aahpi toh Sa-ngah ki soltua toh kibang chilou ngal genbe di beikei! Sa-ngah in Aahpi Aahpi tuni hei ah nagieh diei chi'a adoh in, Aahpi'n "gil-bem ah" achi in gil-zawl a gieh, Sa-ngah in janlai a mat di'a ava gep leh ana um lou. A jing ni'a gil-zawl ah chi in gil-bem a giakia, sa-ngah lawsam kia,  a thai nita a, ahpi'n gil-bem ah chi in gil-zawl a agieh leh sa-ngah in gil-zawl a va mankhe thouthou.

Laiteng 6 toh hinkhuo zah hun!

Leitung khovel changkang deudeu, huikhuo a kithuja tuana lah hoisem, second khat sunga khovel pumpi dengsuo thei khop a hat social networking lah pung deudeu ahiman in tulai khangtha, laisiem leh internet khovel a kibuolte'n laiteng 6 toh hinkho zah dan iki sin uh kul hi. Tamna laiteng 6te khu nichin hinkhuo ah a tulmaw lou koima ki um lou a, business bawlte, journalist, nichin nehtawm kilawte tanpha in zah siem ki phamaw mama hi. Tam laiteng 6 te ahileh 'W' nga leh 'H' khat ahi. 'W'te ahileh Who, What, When, Where, Why hi a, 'H' pen ahileh How ahi.

Khovel i tenna pen thusie lasie beilou ding ahiman in bil in aja chinteng, mit in a mu chinteng gingtat peipei leh thuchien kanlou a munchin gamchin a thethang zengzung hun hinawnlou hi. Thusie in muolsawm kaan a, thuhoi in kotbieng kaan joulou na kichi ngei ahiman in, thusie pen ahithei tan a siel-eh thah a thah zeng zung lou dan kizil hunta hi.

Who (Koi) - Laisiem khat, sie-le-pha khenthei khat hita nahiman in na mipi, jaatpi te bang chi bang mi ahiei chi na theichet mama kul hi. Thu nasuo/gen chinteng bailam tah a gingta peipei namte ihinalai uhi. Alang khat ah, thu khat poupou na sim chiengin a suotu koi, koi toh kipawl, koi party, koi, koi, koi chipen theichet poimaw hi.

What (Bang) - Bang in midangte apat nang hing ki lamdang sah tuom sese chi kithei poimaw hi. Ka thugel/gen in kei bang dinmun ah a'ng koi ei? A langkhat ah, thu-le-la kigel pialpualte bang genna chet ahia? Bang gen ut ahia chi theichet poimaw hi. Tuami theichetna in bang chi bang mi nahi hilchien mama hi.