Tripartite Talks v/s Pandora Box

Tripartite Talks chipen kihouna pawl thum tel china hi a, Pandora Box ahileh Greek tangthu a a pasien uh 'Zeu' in leitunga numei masa pen di'a ana siam 'Pandora' kunga singkuon khat ana pia, na hong mawngmawng lou di chi'n thu ana pia hi. Numei chitahma thei ut tinten ahiman in ana hong a, ahon tah in hagau gilou, silsia chinteng (evils) leh lungkhamna (miseries) chin teng hing lengdoh a, a lengdoh manlou kinepna (hope) umden chi'n Greek tangthu ah ana kigen hi. 

Gam neunou khat, nam chin tenna Manipur ahileh November 1, 2016 apat in United Naga Council te'n National Highway 2te a economic blockade abawl zieh un phaigam leh tanggam ah hamsatna leh lungkhamna ban ah lungsim ngaisutna gilou tampi mipite kal ah pieng khia hi. 

Economic Blockade: Vote suina suohta

Manipur Chief Minister Oram Ibobi Singh in January 28 ni'a political party tuomtuom apat Congress a lutte vaidawnna Congress Bhawan mun a thugen aneina ah, BJP, UNC, NSCN(IM) te thakhat ahi chi'n ana gen a, BJP  zong um meimei samlou in ningkum Oct 31 jankim apat UNC Blockade khu Congress govt vai hawm siemlou zieh sil pieng ahi ban ah, Congress vaihawmna nuai ah kituona leh kilemna sangin khat-le-khat kal a kithei siemlouna pieng zaw ahi chi'n thutna bawl jel uhi. UNC in tam bang sil tung ding ahipen Economic Blockade ana pat lai ua thei mama ding un gintat huai a, a issue uzong national level a tut teitei sawm a panla uh ahidan kilang chieng mama hi.

UNC Economic Blockade leh state integrity pen election agenda a suo ban uah, tam thu a election hing ki veng doh ding bangta hi. Tuabang kal ah, state sunga education puophat ngai ahidan, development toh kisai etthah ngai ahidan, nehgu-tahgu toh kisai siemphat tua tampi um ahidan genkha in um nawn ta dingdeng lou hi.

ECONOMIC BLOCKADE AND COUNTER BLOCKAGE

Ni dang in economic blockade or bandh chivel a ki bawl chia a bawlte toh government ki deal.... tua chu government in a nunglam a apat en hiuhiau in mipi leh mipi ki dehtua ta. Tualgal piengna ding a chitu hoitah hisih chidi koi i um diai le?

Manipur leh India pumpi ki chimatna National Highway gel totkha, singtangmite'n i touphana munte uah economic blockade khautah in i bawl jou uh chi i mu uh, hinanleh state solkal in sepai thahatna zangin ne-le-dawn ding puo truck a lomlom pi'n Imphal tuolsung hing tawllut veve ahiman in Imphal leh valley district teng ah akitasam bangma um diahlou hi.

Imphal apat singtang lamte'n ne-le-dawn ding hunteng a i la uh ahi chipen nialguol hilou hi. E'n nasatah a supply line teng khatan ikisah lai in, ei-le-ei supply line khatan khat kisuo dohta hileh kilawm hi. Valley district teng ah Counter Blockade chi in Meitete'n Hill District zuon a tai gari chinteng nasatah in check bawl ua, ne-le-ta kichi van nengtawng khat zong puo phallou bilbel uhi. Adieh in Ukhrul line, Chandel line leh Churachandpur line ah uangbawl dia nalai uhi.