Manipur Chief Minister Oram Ibobi Singh in January 28 ni'a political party tuomtuom apat Congress a lutte vaidawnna Congress Bhawan mun a thugen aneina ah, BJP, UNC, NSCN(IM) te thakhat ahi chi'n ana gen a, BJP zong um meimei samlou in ningkum Oct 31 jankim apat UNC Blockade khu Congress govt vai hawm siemlou zieh sil pieng ahi ban ah, Congress vaihawmna nuai ah kituona leh kilemna sangin khat-le-khat kal a kithei siemlouna pieng zaw ahi chi'n thutna bawl jel uhi. UNC in tam bang sil tung ding ahipen Economic Blockade ana pat lai ua thei mama ding un gintat huai a, a issue uzong national level a tut teitei sawm a panla uh ahidan kilang chieng mama hi.
UNC Economic Blockade leh state integrity pen election agenda a suo ban uah, tam thu a election hing ki veng doh ding bangta hi. Tuabang kal ah, state sunga education puophat ngai ahidan, development toh kisai etthah ngai ahidan, nehgu-tahgu toh kisai siemphat tua tampi um ahidan genkha in um nawn ta dingdeng lou hi.
Ngaisut kham ching mama khat ahileh, Manipur a political party lien mama ni - Congress in district tha 7 a siemkhiet uh administrative convenience deina toh siemkhiet a um ahi chi ua, BJP in ahileh vote suina ding a siemkhiet ahi chi'n ana gen ngei a, congress vaihawm siemlou zieh a tam bang bawl a um ahi chi'n gen zing uhi. Tuami ahita leh, bang zieh pentah a economic blockade hing kipan, bang chileh suh veng a um thei ding chipen genkha in um nawnlou hi.
Tam bang dinmun ahita leh, Singtanggam a MLA ki candidate dingte a mihing a en ding idi uai, ahisihleh a party a et ding ata diai? Congress leh BJP inlah singtanggam khantouna ding, phaigam khantouna ding genkha a nei talou, puophat ngai nempi umte lah gen kha ta dingdeng lou uh. Phaijang MLA 40 te vaihawm dan pen akithutuo theilou tanggam MLA 20 te'n a doudal zaw na ding lah lampi kawlou ahi chi i theisa ahi. Tam bang dinmun a ding ihi lam kithei in, vote nei taphot in koipen vote peding na hia chi'n study bawl ditdet lechin deihuai mama hi. Manipur apat singtang gam puoh hoina ding kining ching fund pieng ngeingei lou ding ahi chipen i theichietsa uh ahita, centra apat, source tuomtuom apat development fund luoikhe thei ding mi chipchil tah a i et kiukiau uh poimaw hita hi.
No comments:
Post a Comment