BJP NI 100 VAIHAWM SUNG LEH OPPOSITION PARTY

Manipur state sunga sil jousie kichai sa dimdiam banga mi tampite'n a ngaisut lai un, BJP solkal in ni 100 sunga sepkhiet ding chi'n mission based governance hing pan ua, Congress in ama uh sepsa nuo sunzom chi'n gen-le-sah neima nan uleh patathuai tham ching mama hi. Government toh singtang mite kal a kizopna tan, singtangmite leh phaijang mite kal a kizopna tan bang dinmun a a umlai in CM Biren Singh panlahna toh zopmat in hing umkia thei a, tuami um theina ding in singtanggam mun tuomtuom ah vaiguon dangdang a'ng sai ban ah, a vaihawmpi MLAte kungah a constituency chiet ua panmun khaw chietdi'a thu apieh bangin MLA te'n amau mun chiet nasatah a a'ng ngaisah na un, mipite toh ki zopmatna nasapia bawlhoi kia ahidan muthei in um hi.

BJP in CM Candidate puong leh a hattuom diai?

Manipur election hun ding lah nai mama ta, party tuomtuom in solkal siem jou ding hitaleh a chief minister dinguh koi hiding chi neichiet uh. BJP National General Secretary leh coordinator of Northeastern States Ram Madhav in ningkum July 31 ni'a BJP Manipur Pradesh te State Executive Meeting Imphal a aneina uah Manipur BJP CM Candidate ding puonkhiet in um pei ding chi'n ana gen nanleh tunitan in solkal form jou hita uleh koi in Chief Minister toupha luo ding chi genkhe thei nailou uhi. BJP in candidate mi 31 te min puongkhe ta ua, hinanleh CM Candidate ding pen election result puonkhiet zaw chia ngaisut hipan ding ahidan senior party leader khat in The Economic Times reporter khat kungah ana gen kha ngeita hi.

Economic Blockade: Vote suina suohta

Manipur Chief Minister Oram Ibobi Singh in January 28 ni'a political party tuomtuom apat Congress a lutte vaidawnna Congress Bhawan mun a thugen aneina ah, BJP, UNC, NSCN(IM) te thakhat ahi chi'n ana gen a, BJP  zong um meimei samlou in ningkum Oct 31 jankim apat UNC Blockade khu Congress govt vai hawm siemlou zieh sil pieng ahi ban ah, Congress vaihawmna nuai ah kituona leh kilemna sangin khat-le-khat kal a kithei siemlouna pieng zaw ahi chi'n thutna bawl jel uhi. UNC in tam bang sil tung ding ahipen Economic Blockade ana pat lai ua thei mama ding un gintat huai a, a issue uzong national level a tut teitei sawm a panla uh ahidan kilang chieng mama hi.

UNC Economic Blockade leh state integrity pen election agenda a suo ban uah, tam thu a election hing ki veng doh ding bangta hi. Tuabang kal ah, state sunga education puophat ngai ahidan, development toh kisai etthah ngai ahidan, nehgu-tahgu toh kisai siemphat tua tampi um ahidan genkha in um nawn ta dingdeng lou hi.

Manipur Election: Gilbem apat Gilzawl, Gilzawl apat Gilbem!

MANIPUR ELECTION

Gilbem apat Gilzawl, Gilzawl apat Gilbem!

Mipil, gulhit chil getthei ding khop a kigen,  Greek philosopher ban ah Western philosophy mukhetu chi'a chiemte a um Socrates in "I was really too honest a man to be a politician and live" ana chi hial nama a, tutung a politician party heng zengzung te apat dihtatna leh chitahna umlou chipen chieng mama hi.

Politician ichite pen Aahpi toh Sa-ngah ki soltua toh kibang chilou ngal genbe di beikei! Sa-ngah in Aahpi Aahpi tuni hei ah nagieh diei chi'a adoh in, Aahpi'n "gil-bem ah" achi in gil-zawl a gieh, Sa-ngah in janlai a mat di'a ava gep leh ana um lou. A jing ni'a gil-zawl ah chi in gil-bem a giakia, sa-ngah lawsam kia,  a thai nita a, ahpi'n gil-bem ah chi in gil-zawl a agieh leh sa-ngah in gil-zawl a va mankhe thouthou.

2017 Manipur Assembly Election etlawhna

Manipur a 7 March 2002 apat Indian National Congress (INC) vaihawmna tukhe thei ding party umsun ahileh Bharatiya Janata Party (BJP) chilou a dang um dingin gingtat huailou phot hi. Congress in kum 14 vai ahawm sungin BJP in theitawp suo a, hinanleh vaihawmna ana tukhe jou ngeilou hi. Huilan dan hing kiheng in kum 2014 a Lok Sabha election in Modi lamkaina nuai ah BJP India phuolpi nasatah in hing tukhe jou a, Modi hu in tunitan in India sungah nasatah in na sem touzing nalai hi. Delhi Assembly election ah AAP in nasatah in ana jou nanleh state dangte ah BJP in a puonbu uh ke lientou hiai hiai ua, North East state sung tanpha ah a gam uh hing kelian toutou ta uhi. Assam ah BJP in vaihawmna hing tutou ta ua, 2017 chienga Manipur zong dinmun ding zong gen hamsa pi khat in huilan dan tuom thamta hi.

India Prime Minister Modi thugen lungluthuai kasah khenkhat

TUNIA SHILLONG A INDIA PRIME MINISTER NARENDRA MODI THUGEN LUNGLUTHUAI KASAH KHEN KHAT

Shillong, May 27, 2016

Shillong: Prime Minister Narendra Modi delivering his speech on the occasion of the flag off ceremony of three trains in Shillong, Meghalaya on Friday.PTI Photo

1. Mizawngte'n Bank ikikhutpi ngai: India khangtou hen i chi leh mizawng mi gentheite akhantou ngai ahiman in Union Government in Livelihood toh kisai program chituomtuom kipankhia hi. NRLM, NERCORMP, NEDFI leh National level ah tampi um. Tuate tungtawn a mizawngte'n zawnkhalna pat suotatna i mu sawm chiet uh poimaw hi. India pumlum huop in SHG nasatah in sai in um, SHG kibawlna zieh pipen ahileh mizawng khat ama tang a suotatna hamsa ahiman a institution tungtawn a bank linkage a nei uh poimaw a, Bank hausatna a kitanpi uh poimaw hi. Bank in zong tuate toh kisai a a jui ding program and policy tampi siemkhietin um ta ahiman in koipou in hamphatpi chiet i sawm ding uh ahi. India pumpi a mizawng sethum-suo-seni in ahamphat pi teitei lam-et ahi.