Manipur solkal in SoO bulbal theilou!

~ Pupu Zou

Kum sagi peisa a hiamkhamna (suspension of operation) suoi, India solkal, Manipur solkal, UPF leh KNO in a kai uh tunitan a masawn lou, galvantawi kipan ki’a ding chi’a KNO in a thupuon tungtawn in Manipur Home Minister Gaikhanngam in tam SoO kipatna abul-le-bal, bang Indian danbupi clause (khil) nuoi apat kikai ahiai chi theilou ahi dan Nov. 11, 2012 ni’n Imphal ah gen hi. Lam dang chilou ngal gen be ding hamsa simpi bang mai hi.

Manipur Home Minister in kum 7 jou a tam bang thu a gen thei leh SoO apat bang kinepna um nalai? A ma mimal chitzawlouna zieh a athei lou ahi diei, ahisih leh Manipur solkal in bang ma a’ng simpia lou uh ahi zaw diei chi dohna lienpi pieng hi. Centre leh hawlpawl in suoi kai, state government in zong a phasahpina suoi kai a pang, hinanleh kum 7 jou a Home Minister in abul-abal theilou achithei pen sil lamdang khat ahi.

Suspenson of Operation (SoO) ahileh kum 2005 in India phuolpi solkal leh KNO+UPF te’n kithunnna suoi ana kai ua, kum 2008 in Manipur state solkal zong suoikaite lah a ana tel hi.

SoO Maban Ding Gen Hahsa Sim Bang!

~ Pupu Zou

Central government, state government leh Kuki helpawl (UPF leh KNO) te’n hiemkham kithununna suoi akai ah November 21 chienga bei ding hita hi. Tam SoO pen maban a suh sau a um ding e, um nawnlou ding chipen gen hamsa pi khat hita leh kilawm hi.

Union Home Ministry in Kuki helpawlte’n ground rule botsie chi’a ngoh in hun tomnou khat, ha thum sung etkhietna din August 21, 2012 ni’n November 21 tan dai ding in SoO hun suonna suoi ana kai kia uhi.

Union Home Ministry apat thu suo in a gen dan in Kuki helpawl SoO nuoi a umte designated camp a koima um ngeilou ahidan uh gen hi.

Tam bang kal ah Kuki National Organisation (KNO) in kihouna pat ahilou zieh in SoO pen kai nawnlou a thau tawi kipat kia sawm ahidan uh gen ua, kiphinna chiduom deu ang pienkhiet gingta ahi hi.

Zodawn dinmun khan sah na din

~ Pupu Zou

 

India leh gam tuom tuom a Non-government organisation (NGO) te’n mi liengvai leh dinmun ngiemte dopsangna di’a a ngai khaw mama ukhat Self Help Group kichi Zodawn dinmun dopsangna di’n ki uongbawl leh chi ngaidan ka nei.

 

Self Help Group in a tup ahileh eima leh eima kipanpi tuo “Ma ni ki panpi” ahi deupen mai hi. Tam SHG ahileh kho sunga numei ngen ahiai, numei leh pasal kihal ahilou leh pasal ngen in zong bawl thei ahi. A tangpi in member 15 tan vel kithuo a zong bawl thei ahi. SHG member dingte pen ne-le-ta suina, sum-le-pai neidan a dinmun kibang hileh a hoi dieh nalai hi.

 

SHG in organisation dangte bang in panmun hawm guolna – Chairman, vice chairman, secretary, joint secretary leh a dang dang nei veve hi.

 

SHG pen society registration act nuoi a register bawl zaw ahi cheingin organisation dangte bangin government apat hamphatna leh bank apat loan chivel muthei a, tua member pangte sungah a poimaw bangin zang thei uhi. SHG member te’n a bawl tanpi ahileh a memberte apat ha teng in dangka bangja vel khat bikhiet ki pumkhawm jel uhi. Eilawi in marup I chidan deu veve ahi. Hinanleh SHG pen marup tetoh kibang deulou in bank te’n panpi theina tan in panpina pe nuom uhi.

Barack Obama Guolzawna Thugen

~ Pupu Zou

 

Kum 200 val peisa a gam dang opkhumna nuoi apat manih deitelna kivawihawm theina di'a thutanna tunitan in a peisuo nalai.

 

Nang zieh a pei tou tou nalai ahi. Nang ma'n tua thutanna pen guolzawna leh lungkietna tungah nam detna na nei hi. American innkuonte ihi, i kiet leh kekhawm, i khang leh khang khawm gam khat ihi chi kilatna ahi.

 

Tujan in tam guolzawna pat in i peina ding saupi leh hamsa um nalai ahi dan nang musah uhi. Michin in i lungsim uah America maban a sil hoi hing tung ding ahi chi i thei chiet uhi.

 

Tam kitelna tel America teng teng tungah kipah thu ka gen hi. A khet veina ahi zong in line saupi a kichieng nahi zong un, Obama ahisihleh Tomney a dia gim thuo na hi zong in, na awsuo ja in na um sah ua, ki khelna siem tu nahi uhi.