Zalenna muna dingin Thagum moh, Tanvou?

Mihing hinna tampi leh sisan naisan toh tawlnga loukei a zalenna kum 100 val ana del nuo un, mulkim huoitah in India in zalenna kum 1947 in ana nga. India chi’a gam khat a um ding chi hinanleh Muslim leh Hindu kichimat theilou ahiman in India leh Pakistan ana pieng lawh hi. India Independence day a 68 veina I zah lai un, ana lamkaite geltha kia lei ut huai isa. Thagum suong leh suonlou lamkaite koi lawching zaw ngaisut tham ching kasa.

Rani Laxmi Bai, Jhansi leengnu’n Britishte thagum toh ana nawh a, galphuol a tha in ana um hi. Mahatma Gandhi, the father of the nation in India mipite non-violent toh ana ma pui a, India zalenna ana mu, tunitan in khovel pumpi ah Lemna leh zaidamna thu akigen chiengin ami’n kilou zing hi. Sardar Vallabhai Patel in ahileh lenggam neu nou nou tamtah ana kaikhawm in, gam khat a kivaihawm dinig dan ana tangkoupi hi. Bhagat Singh in Legislature vaihawmna mun ah bomb ana sep a, mat in um a khailup in ana um hi. Tam teng mei hilou, lamkai tamtahte thagum a suong ziehun tha leh mat in ana um hi.

Zalenna muna dingin thagum sese ngailou chinanlei a poimawna chieng um jel veve hi. Tuabang thagum suonate hoitah a guonggal leh mipi panpina a tel pou leh a lampi sieltu suo thei jel hi. India zalenna muna ding a mipi thaneina toh kiphinna poimaw mama khen khat ahileh:

The Mutiny of 1857 - Tam kiphinna ahileh India zalenna muna dinga lampi sieltu poimaw khat ana suo hi. British te’n ana thaimit ma nan uleh mipi thaneina toh kiphinna pat ahiman in tangthu a gentel in um den hi.

Civil Disobedience Movement, 1929 – Tam hun ah Mahatma Gandhi lamkaina toh 26^th January ni’n Indian Independence Day lop ana sawm uhi. Indian flag khaisaang in ana um a, British vaihawmna nelsie dingin thutanna ana nei uhi.

 

Dandi March, 1930 – Gandhi in kum 61 a upa ahi nuo in km 241 a sau Dandi march ana peipi hi. Tam hun in Britishte’n peace march ahiman in bangma ana law thei lou ua, India gam a pieng India chi tunga siah (tax) suhbei in ana um, tam Civil Disobedience Movement in British vaihawmna ki liingsah mama hi.

 

Quit India Movement, 1942 – Tam vaiguon in ahileh India pumpi zelsuo a, mi chin in British vaihawmna leh nei leh lamte nelsie in, India zalenna ding asa tah in ana del uhi. Tam British te nawkhietna ding vaiguon in India Independence Day hing tun hi. Tam hun sungin kum 100 val peiman a, thagum suonga lamkaite zalenna ni thupi mulou a tamzaw hi ua, a thu toh mihing tanvou suonga lamkai Gandhi in a tetaw tong in India zalenna suolpi in mupha hi.

Zalenna muna dingin thagum a poima na chieng um nanleh a poimaw pen ana hi lou hi. Mihing khat hina toh I tanvou (rights) suonga kiphinna in lawchinna tun zaw hi. South Africa in zong thagum toh zalenna ana mu joulou ua, hinanleh mihing tanvou toh pan analah man un zalenna mu zaw uhi.