~ Pupu Zou
Kum 2/3 peisa a mite'n Nam ki thutuo pen, Nam khangtou leh lamkai hoi nei chi'a a'ng mitsuon uh, ei na kipahpi pawl leh thangsiet pawl, ei na tawsot leh khettum pawl i kiim i pam ah phelum pul bang in a na um uh. Tuabang minphatna pen mitphet kallou, jingkal a sel, nita a vuoi bang mei in a umta. I nampi ki vaihawmna sangpen in ma sawntheilou, nungtawl theilou in tuikhu a tuikivei ui bangin a ui dohta. Api a sawi vah leh a noute zong sawi va chipen tuni’n ei tunga tungta hi in ka mu. UZO sungah mimal du-damna zieh in nampi’n nuoina meipi bang kipal, a noute ZYO zong thu kisuote et in a zum in zum huoita, ZSP zong tuo bang ma in a min maat pha veve. ZLS ahileh tunitan in amin pen baangpha nailou hileh kilawm nalai sam.
Tu dinmun et in UZO ahileh ashi lah hilou, a hing lah hilou, suongpi 2 in a tee-tuo, khatlam a lakhiet leh khatlam in netlum di, alang khatlam a lakhiet leh khat lam in netlum jel di chidan ahita valon hi. A kitawp uleh zong thu um, a ki tawplou uleh zong thu um veve jel.
“Sunni tum kuon in zong, pienpi tui bang I luongkhawm lou, sah-le-hang, sim-le-mal a, I lampiel khankhuol lou in, machieng khankhuo mei bang jing e, sietna huipi hing lang leh, pal bang in I nang jou diei. Zoulei kulpi a chim jel e, luonghi luongin ka kap jel ding, ka kinepna bang chi’n I phung ching diei, lummei bang in a jammng ta, pangkhawm lei hat ding hia, pangkhawmte khu guoljoute hi…… koi mawna ahi diei? Nampi lunlai a ba tah e” chi’a Pu Zamkholian in la ana phuo, phuo kha kasa vatun.
Koi mawna ahita diei?
Tuami helpawl, khumte helpawl te’n hing thu neikhum chi’n suonlam sui sui da vai, ngal kohlou ah thousi tulou hi. Nampi lamkai - nampi kuongtawl dinga ki pekhia I hi leh eima mimal gilpi ding khuolna toh nampi kimawlna’n nei nawnsih vai. Sil khatvei suhsietna siemtha kiana ding pen sil beilam hilou hi ve aw.
No comments:
Post a Comment