Maban ah kiphinna chituom deu in aw le i bawl uh!

~T. Zamlunmang Zou

Maban a Manipur government in a’ng ngaisah lou zieh in CoPTAM leh Khuga Dam JAC te’n kiphinna sunzom ding bang in kilang hi. Bangdh leh General Strike te phatuom sih i china hi tuonlou in tuote’n metna tun maleh supna lienzaw tun ahiman a jattuom deu pan thei talei dei a huai hi. Tuma lam deu in bandh leh general strike chite’n lawhna sangin supna tam tunzaw ahidan ina genta uhi.

Lamka khopi leh mun dang dang a bandh, general strike leh office vel i khasah jel pen guntah in ngaisut lei eima leh eima ki gawt bang ta hi. CCpur District ahisihleh singtang district dangte toh kisai a kiphinna i bawl chia eima district sung isuh buoi zing pen aphatuom tah tahna amah? Eima district sunga pawlpi umteng lah ang support tu hi ngal, ang supportte a supportte uh bandh khum suh jel. Ei leh ei kigawt himai lou?

“Job Car”, Eh! Ka gen khiel kha, “Job Card” hi zaw!

Chief Minister Okram Obobi, in Porompat a Panchayat Bhavan a Year of Gram Panchayat chi azahna ua a thu genna Pradhans, Members of Gram Panchayats leh Singtanggam a kho hausa te’n a ma’u gilpi ding mai kuol in MGNREGS Job Card pen Job Car in a heng uh chi’a agen apil thei hausate a di’n i lu tunga meisa kibuoh toh kibang a ngai thei in ka ngaisut hi.

Chief Minister pu’n agen ba na ah tam a tung a Job Card toh kisai a lubawte’n nautangte tunga a nasepdante uh tunga lungkim huoi asahlou dan agenna ah, Pradhans, Members of Gram Panchayats leh Singtanggam a kho hausa a khomite uh bang account ki nei chiet ding in thu pia ua, a mawl leh asuhna ding theiloute panpi a kinei in hunkhop huoikhietsah ua, tuate in car lei uh chi’n gen hi.

School leh social organisation kikal

~ T. Zamlunmang Zou

Tu masanga St Mary’s High School, Tuibuong in sangnaupang 11 a pampaina thu a CDSU leh CDPSA te kal a kithei siemlouna pieng cheuh toh kisai ngaisut kham ching um in ka thei hi. Tam thu hing kipatdan ahileh CDPSA in a gendan in Sept. 3 ni’n St. Mary’s High School in Teachers Day zang ua, tuana sangnaupang 11 te’n ju dawn ua, Dr Radhakrishna Foundation School, Tuibuong te Teachers’ Day vaiguon zong va subuai uh chi uhi. CDSU in pampai a um naupang 11te lalut kia di’a St. Mary’s school naw uh chia ngoh in CDPSA in hunchiem umlou a skul teng kha ding chi’n thupuon bawl ua, CDSU toh kithei khelna pieng man dehtah hi. I gennuom pentah ahileh a peisa sil pieng dhtah apat maban a bangchi panlah ding chi ahizaw hi. School chin in ama uh kipuihuoina bu nei chiet ngei dingin gintat aum hi. Nei zong nei ngei ding uhi. A tua chileh tuachi ding, a tuachilou leh tuachi lou ding chite nei chietsam ding un gintat um hi.