~T. Zamlunmang Zou
Maban a Manipur government in a’ng ngaisah lou zieh in CoPTAM leh Khuga Dam JAC te’n kiphinna sunzom ding bang in kilang hi. Bangdh leh General Strike te phatuom sih i china hi tuonlou in tuote’n metna tun maleh supna lienzaw tun ahiman a jattuom deu pan thei talei dei a huai hi. Tuma lam deu in bandh leh general strike chite’n lawhna sangin supna tam tunzaw ahidan ina genta uhi.
Lamka khopi leh mun dang dang a bandh, general strike leh office vel i khasah jel pen guntah in ngaisut lei eima leh eima ki gawt bang ta hi. CCpur District ahisihleh singtang district dangte toh kisai a kiphinna i bawl chia eima district sung isuh buoi zing pen aphatuom tah tahna amah? Eima district sunga pawlpi umteng lah ang support tu hi ngal, ang supportte a supportte uh bandh khum suh jel. Ei leh ei kigawt himai lou?
Maban ah juithei ahi diei mah, singtanggam issue, state solkal kunga nawhat ngaite pen eima leh eima ki bandh khum nawnlou in a kisaipi solkal sunga department zumpi ahisihleh Imphal a mun poimawte vel ah va tou diamduam lei i aw ngaizaw lou ding amah? A neu alien in i thei uh Dharna, amun mun ah bawl lei, i aw lah kija thou ding, i gam in lah suplaw lou ding. Lang khat ah bawm, bandh i bawl sangin i thawm bang ngaizaw tham ding in gingtat um hi.
A nina ah, bandh leh general strike te bang zieh a ibawl jel e i chi leh i lungkimlouna aw uh jah ahitheina ding ahi. Tua ahita leh gam sung a di’n silhoi khat bawl in a issue pen i kiphinna gingsah lei, i ki phinna aw pen a tunna mun ding ana tung veve ding hi. Tu masang lam a Tuivel lei sietna toh kisai a kiphinna bang ettham ching a, a issue pen lah a ja ding te’n ana ja veve uhi.
A thumna ah, bandh i bawl chiengin a volunteer a tangval tawmngaite’n gingtaatlou pipi bang na sem kha thei uhi. Public/mipi van gil pipi bang suh siet in um thei hi. I suhsiette solkal mawpuohna chi nanlei, solkal in a hunbang a siemtha kia tuonlou ahiman in mipi supna hizaw hi. Tua ban ah bandh i bawl chiengin ni khat na sim lou in um leh zong khaw salou solkal nasemte paid suti pia kihilel a, ni chin ne-le-ta sui, i khaw ngaite ngawtna ahi hijel hi.
Etsahna khat pe jual talei. Van man tam zieh in bandh bawl talei, bandh in vanman ang suhtawm sangin su pung zaw ding hi. Mi khat kitha zieh in i gam sung bandh puong talei, mi khat shi zieh in mi bang ja in gentheina a tuohlaw di uai? I khawsah pen ulah, mi nautangte hi ngal, bandh leh general strike chivel i bawl chia lah a gen thei pen a nautangte ma hi jel. Tua ahiman in Bang leh General tha khel di’n bang i pan thei di uai, lamkai te’n guntah a ngaisut poimaw ta hi. Mipi lungkimlouna aw bang chileh a ja dia kilawmten ja thei ding chi ahimai hi.
Bandh i chi vevaw leh zong naikal 12/30/40 hi va iah sih nanleh naikal 4/5 sung bawllei zong ki bang mailou amah?
No comments:
Post a Comment