~ T. Zamlunmang Zou
Tu masanga St Mary’s High School, Tuibuong in sangnaupang 11 a pampaina thu a CDSU leh CDPSA te kal a kithei siemlouna pieng cheuh toh kisai ngaisut kham ching um in ka thei hi. Tam thu hing kipatdan ahileh CDPSA in a gendan in Sept. 3 ni’n St. Mary’s High School in Teachers Day zang ua, tuana sangnaupang 11 te’n ju dawn ua, Dr Radhakrishna Foundation School, Tuibuong te Teachers’ Day vaiguon zong va subuai uh chi uhi. CDSU in pampai a um naupang 11te lalut kia di’a St. Mary’s school naw uh chia ngoh in CDPSA in hunchiem umlou a skul teng kha ding chi’n thupuon bawl ua, CDSU toh kithei khelna pieng man dehtah hi. I gennuom pentah ahileh a peisa sil pieng dhtah apat maban a bangchi panlah ding chi ahizaw hi. School chin in ama uh kipuihuoina bu nei chiet ngei dingin gintat aum hi. Nei zong nei ngei ding uhi. A tua chileh tuachi ding, a tuachilou leh tuachi lou ding chite nei chietsam ding un gintat um hi.
Tualeh tua dante khengval a nna sepna um kha thei nanleh a angpi’n tuabang sem samlou dingun gingtat a um hi. School chin in a sanginn uh hoina ding leh minthanna ding ban ah, a sangnaupangte uh mi sanga siemzaw leh pilzaw, tungtuong zaw ahi ding uh zong dei ding uhi. Tutung siltung pen bakhat thu a ngaisut zuolte di’n a school neite mawsah phut bailam hi, aziehpen studentte board exam kuon laitah a ki expel ahiman un. Tam bang nasepna a umta a ahileh zong nawsuo a um, sangnaupang leh a nu/pa vapei a zong saifel thei zong hikha thei hi.
Tutung a CDSU te’n kamsuo neu khat anei zieh un private schoolte buoiman dehtah hi. Vaihawmsiem leh sangnaupang khuolloute khat ana hi lei saupi buoi theina sil khat ahi laizang hi.
Lunga hing kilang ahileh, sanginn in amau thuneina tan a nna asepna tung uah, social organisation te’n kam va ke da lei i gam a dia siemzilna lam khantouna khat ahizaw de aw chi bang ngaisutna pieng hi. I capital, Imphal ah ahileh social organisation te’n school te tunga kamte, soisel leh suhgen tou gen tam seng ahiman in a school meimei hinawnlou, sangnaupangte tanpha bangtan a hei a subuai ahidan imit un zong imu thei uhi. School te’n sangnaupang tunga human rights kal jen a nasem uh ahiei, ahilouleh sangnaupang te’n ama’u mawhna umlou, a sen teng lah sengta, hinanleh ngaisahlou a a um ua ahileh tua chieng in apoimaw dan in kikumthaw lei a sietna um lawm lawm di’n ka mu sih hi.
Sangnaupang in tam bawl leng, ta bang pieng di chi thei mama ding uhi. Theina sasa a bawl paupaute pen atan ding lawm mawng uh tang ahi leltah uhi. Tua ahiman in quality education & good student a um theina di’n school leh social organisationte kikal khen siem poimaw a, i boundary thei kul isa hi.
No comments:
Post a Comment