Lamka I Vangkhopi Hi

Lamka i vangkhopi hi, tua zong i tan kha diei deh, i pu i pa lunggai a, a pham mei ding maw?

 

Manipur valley a teng, Meiteite'n Inner Line Permit nasa tah a a dellai un, singtaqngmite'n bangma gelpha lou bangin hinkhuo ina zang zing uhi. Hun saupi a ding et in, ILP pen singtangmite'n amau haw sanga poimaw zaw tham i hi dan uh tu dinmun et in chieng mama hi.

 

I khopi neisun uh, Lamka, Kangpokpi, Singngat, Thanlon, Henglep leh Motbung te enlei, local mi sangin state dang apat hing lut, dawr bawl leh summet mawlna lam tuom tuom ah a tamzaw pheil ahita uhi. British hunlai peh apat tanvou a'ng na piehuh, singtanggam a phaigam mite tengden, gamtat zalentah a um theilou ding chi hima nanleh tuhun chiengin tuomi tanvou pen bangma lou suo hileh akilawm phiel hi. Tam bang a iki theimaw bawl zing ua ahileh tunuo kum 5/10 jou chiengin singtangmi te pen Tripura a tribal, a gamneite minority ahi upen ei maban hing hi thei hi.

 

Inner Line Permit pen hi chiah sih nanleh, i gam i lei tang sunga general mi, state dang apat hing kuonte pen nasa tah a gatah ngai mama hi. Student Union, philanthropic organisation leh a dang dang a kisaipi te'n guntah a ngaisut a, panlah hun hi thamta hi. Lamka khopi sunga i ki vial lele a, dawr thupi deu deu, van tamna leh kimna pen te pen singtangmite dawr hinanlou in kol leh vaite dawr ahizawta, nei jou leh business lam pang siem ahizieh un eimi dawrte sangin amauhaw dawrte ki dawr nuom zaw a, hou zong hou nop zaw thei tham uhi. Eimi dawr te nasan in kol leh vaite dawr apat in van lasawn in Lamka sung mama ah a vante uh zuosawn ua, i nei i lam a gam sunga ki bungkhie dan a i ngailai un, gam dang, nam dang dinga bungkhie ana ki hi zing hi.

 

Etphat kul, a hun akikhel ma in!