Manipur Election: Gilbem apat Gilzawl, Gilzawl apat Gilbem!

MANIPUR ELECTION

Gilbem apat Gilzawl, Gilzawl apat Gilbem!

Mipil, gulhit chil getthei ding khop a kigen,  Greek philosopher ban ah Western philosophy mukhetu chi'a chiemte a um Socrates in "I was really too honest a man to be a politician and live" ana chi hial nama a, tutung a politician party heng zengzung te apat dihtatna leh chitahna umlou chipen chieng mama hi.

Politician ichite pen Aahpi toh Sa-ngah ki soltua toh kibang chilou ngal genbe di beikei! Sa-ngah in Aahpi Aahpi tuni hei ah nagieh diei chi'a adoh in, Aahpi'n "gil-bem ah" achi in gil-zawl a gieh, Sa-ngah in janlai a mat di'a ava gep leh ana um lou. A jing ni'a gil-zawl ah chi in gil-bem a giakia, sa-ngah lawsam kia,  a thai nita a, ahpi'n gil-bem ah chi in gil-zawl a agieh leh sa-ngah in gil-zawl a va mankhe thouthou.

Politiciante zong Congress Party a det chengchong amah i chilai a BJP ah, tuabang ma in BJP apat Congress ah, tam national party hattah gel a thawl jouloute ahileh party neuneute ah uitawm bang in kitawm le zatzat jel uhi. Politics kichi dihtatna leh chitahna a umlou dan kilahna khat hi lel hi.

Manipur a election um ding chi thuging aki ja apt tunitan in party khat apat adang a kituan lele hunkhop umta, party khat a di'a muonhuai leh gin-um di'a gingtat politician tamtah in masang a kause gen a agen uh hinanleh mai a zumna vun kichi neng khat zong betlou bang in lut khuonkhuon jel veve uhi. Chiemte pha tutung a party heng khen khat ahileh - Deccember 30, 2016 ni'n Congress apat BJP ah Z Kikhonbou Newmai, VC HAC ban ah elected representatives mi 23  leh Tamenglong ADC Members 3, tuaban ah Lamsang, Sekmai, Naoriya Pakhanglakpa, Hiyanglam leh Wangkhem Assembly apat Zilla Parishad Members, Pradhans leh Ward Development Committee Members ana lut uhi. Dec 24 ni'n Kumbi Block Congress Committee member mi 73 te'n Congress ana zom ua, Thangmeiband AC apat BJP ticket a telching MLA Khumukcham Joykishan leh Keishamthong AC apat NCP MLA Laishom Ibomcha te'n Dec 21 ni'n a party uh taisan in Congress ana zom uhi. Tam teng ban ah midang hunkhop tel in Lamka lam apat Congress MLA Vungzagin Valte, MLA Nemcha Kipten leh Trinamul Cong apat Kim Gangte te hi uhi.

US President Donal Trump in "tuhun a apoi mama khat ahileh politics pen siengthou nawnlou ahiman in mi chitah leh dihtatte'n politics a kibawl solkal ah lunglut nawnlou uhi' chi'n ana gen hi. Will Rogers taget inlah politics a siengthou loudan a genna ah 'A fool and his money are soon elected.' ana chi kia ta leuleu.