Laiteng 6 toh hinkhuo zah hun!

Leitung khovel changkang deudeu, huikhuo a kithuja tuana lah hoisem, second khat sunga khovel pumpi dengsuo thei khop a hat social networking lah pung deudeu ahiman in tulai khangtha, laisiem leh internet khovel a kibuolte'n laiteng 6 toh hinkho zah dan iki sin uh kul hi. Tamna laiteng 6te khu nichin hinkhuo ah a tulmaw lou koima ki um lou a, business bawlte, journalist, nichin nehtawm kilawte tanpha in zah siem ki phamaw mama hi. Tam laiteng 6 te ahileh 'W' nga leh 'H' khat ahi. 'W'te ahileh Who, What, When, Where, Why hi a, 'H' pen ahileh How ahi.

Khovel i tenna pen thusie lasie beilou ding ahiman in bil in aja chinteng, mit in a mu chinteng gingtat peipei leh thuchien kanlou a munchin gamchin a thethang zengzung hun hinawnlou hi. Thusie in muolsawm kaan a, thuhoi in kotbieng kaan joulou na kichi ngei ahiman in, thusie pen ahithei tan a siel-eh thah a thah zeng zung lou dan kizil hunta hi.

Who (Koi) - Laisiem khat, sie-le-pha khenthei khat hita nahiman in na mipi, jaatpi te bang chi bang mi ahiei chi na theichet mama kul hi. Thu nasuo/gen chinteng bailam tah a gingta peipei namte ihinalai uhi. Alang khat ah, thu khat poupou na sim chiengin a suotu koi, koi toh kipawl, koi party, koi, koi, koi chipen theichet poimaw hi.

What (Bang) - Bang in midangte apat nang hing ki lamdang sah tuom sese chi kithei poimaw hi. Ka thugel/gen in kei bang dinmun ah a'ng koi ei? A langkhat ah, thu-le-la kigel pialpualte bang genna chet ahia? Bang gen ut ahia chi theichet poimaw hi. Tuami theichetna in bang chi bang mi nahi hilchien mama hi.

When (Banghun) - Leitung hinkhuo pen ahun leh bikhiet nei chitchet ahi. Sil pieng taphot a hun dungjui in hing ki khel lamdang jel hi. Tua chi dungjui in tuni'a thu kigen leh kum 10 peisa a thu kigen zong ki lamdanna nempi um tham ding hi. Tua ahiman in tuni'a na thuja pen bang hun a kigen, bang hun a kigiel, gen sawmthei amah chite etchet masah poimaw mama hi.

Why (Bangzieh) - Thu kigen/giel tapou bangzieh a tuobang kigen/giel chi theichet poimaw hi. Business bawl bang hita lechin, ka product bangzieh a mi'n a zah ding chi tanpha a dawnna mansa koi kul hi. Tua mabang in tua ka thu post sawm pen bang zieh a ka post di, bang tupna toh ka post di, bangzieh a ka gensawn di, ka gensawn zieh a hoina or hoilouna tung thei bang chite theichet masah poimaw hi.

Where (Heiah) - A mun leh mual ki sutah thei poimaw.

How (Bangchi'n) - Bangchi'n thu gen in, bangchi'n giel leng bang a chi diei chi tuot ditdet a thu-le-la gel/gen theina pen michin dinga damna leh muonna ahi. Buoina khat a um leh thu a thu kichi lah guozu bang mei. A thu post sawntu te'n lah bangchi'n gielsawm leng damna ahidiei chi ngaisun lou. Tam bang gamtatna in mi nautang mi awpkai sah a, kituolouna leh kimu siemlouna tanpha tun thei hi.