Manipur a 7 March 2002 apat Indian National Congress (INC) vaihawmna tukhe thei ding party umsun ahileh Bharatiya Janata Party (BJP) chilou a dang um dingin gingtat huailou phot hi. Congress in kum 14 vai ahawm sungin BJP in theitawp suo a, hinanleh vaihawmna ana tukhe jou ngeilou hi. Huilan dan hing kiheng in kum 2014 a Lok Sabha election in Modi lamkaina nuai ah BJP India phuolpi nasatah in hing tukhe jou a, Modi hu in tunitan in India sungah nasatah in na sem touzing nalai hi. Delhi Assembly election ah AAP in nasatah in ana jou nanleh state dangte ah BJP in a puonbu uh ke lientou hiai hiai ua, North East state sung tanpha ah a gam uh hing kelian toutou ta uhi. Assam ah BJP in vaihawmna hing tutou ta ua, 2017 chienga Manipur zong dinmun ding zong gen hamsa pi khat in huilan dan tuom thamta hi.
Tukum mid-term poll ah Thangmeiband AC leh Thongju AC apat BJP MLA ni telching in hing um a, 2017 election chienga zong tambang hing pieng ding in gingtat huai hi. Jalukbari constituency apat telching BJP MLA Himanta Biswa Sarma, Convenor North-East Democratic Alliance (NEDA) in Naga People’s Front toh pre-poll arrangement umlou ding chi'n ana gen ma nanleh election kuon chia hing um veve dingin gingtat huai hi. Assam Assembly election in zong NPF in nasatah in Naga area ah pan la ua, lawching mama uhi.
Election umna ding kum kia chieng himaleh BJPte ki sahkholdan leh Congress te dai dide dan i etka leh kikhelna vang hing um ngei ngei dingin gingtat huai hi. Na innsung siamtup in chi thupi a zang bang mai in BJP National President Amit Shah zong September 2016 chiengin Manipur ah kisahkholna bang ki bawl ding chi genkhawm dingin hing diengsuh ding, hinanleh Congress apat kiu aw, kau aw sa khatzong um nailou a, Communal Bills toh a buoi in buoi khop nalai ua, a boss nu uh Pi Sonia Gandhi zong hospital a etkol a um nalai ahidan news tungtawn a mu in um.
NPF toh BJP in alliance a nei ua ahileh Naga dominated area teng zong BJP hing hat ngei ngei dinga, Churachandpur, Sadar Hills, Chandel a eimi MLA candidate te a dingin khawda vitvit a hui lan dan pilvang deu a study hing poimaw kha ding hi.
No comments:
Post a Comment