A CONSPIRACY BUT NOT ILLEGAL!

Hattuom thu vang hi, hinanleh hattuom thu khellam peh a sil ka mu ziehin hing share vang.

Tu masang deu in lawmte khat in Muallum MELC hattuom sung buoi, khen khat tai doh ua, hattuom tha zop sawm uh chi a'ng hil ni apat bang thu bang la um ahia chi'n keima mimal (MELC theipi hilou) in kana kan lele tamei chuh!

Ka sil ja leh mukhiette pen version tampi um a, them khat I nam politics tanpha sukha a ka thei zieh in hing share meimei vang maw.

• Version No 1: Bial Pastor pa kamteng zah dihlou zieh a hattuom apat taisie um ahi.
• 
  
• Version No 2: Be-le-phung thu a buaina zieh a hattuom ke khe ding kisa ahi.
• 
  
• Version No 3: Hausa thu a buoina zieh a hattuom sungtan ang jel kha ahi.
• 
  
• Version No 4: Politics ki gol ahi.

A VERDICT, but not in written form, cannot be used for formulating a judgement by the Church (It's my personal verdict):

• Verdict 1: Bial Pastor kamteng zah dihlou zieh ahi chipen juau pumlum ahidan enquiry team apat thu ja in um. (ka thu jasawnna koi ahi gen lou ding!).
• 
  
• Verdict No. 2: Version 2 apat 3 teng ahileh inter-related hidan in ka mu.

Muallum ahileh aphung in genta lei Phiamphu hausatna khuo ana hi ngei a, hinanleh sum-le-pai thu zieh in Suantah hausatna hing suo hi. UZO gam hizing laipi VNO gam hing suota ahiman in thu-le-la hing sang mama ta a, mite'n chance la in identity clearance chi hing piengdoh hi (line tampi ka topkan ahi o). Tam hun apan bang chilai apat Suantah kichi Zou bulpi leh UZO, ZYO leh ZSP a abulpi hizingte pen EH! china khat hing pieng in ka thei hi (especially in Muallum village).

Tam thu ah CASE tanpha ana tung ua, hinanleh Pu Thangso Baite ki involve na zieh in case teng withdraw in ana um hi. Tua hunlai in ka thuja dan adih ahi ngelna leh Pu Hangkhanpao Taithul in ahithei tan a panpi dingin hausa luite toh ana kithu ja ua, hinanleh bang chi a hiai zieh in case pen peisuoh nawnlou chi ahi (Kilepsan chipawl zong um).

Khatvei meima umsa nanahna chu, a meima hing lien semsem in thousi-thouvai in hing baw zing ahiman in Hattuom tanpha hing tongkha hidan in ka mu hi.

Version No. 3 na i gen, politics kigol chipen Singngat tangtou a MLA ana contest utzing khen khat in nasep ana nei leh munpi a zang nuom ahidan analyse bawlte apat thu mu in um hi. Tam pen maban a Nampi politics adi'a poi sukha tham ching hing hiding in ka mu hi.

Tu in ahileh a pemdoh hattuom mi-le-sa te'n Vaiphei majority umna hattuom EOC???? join sawm uh hidan in thu kija. Gap lien semsem di bangta. Dahuai vangut e!

A detail in gen sih nanlei, mipil misiem ngen umna ahiman in athu um dan man chiet dingin kang gingta, hitan in ka jou chet!

Maban Panlah ding dan:

Adih pen leh a hoi pen ahi vang chingam sing, hinanleh tambang in pan kila leh bang achi de aw china toh ka ngaidan them khat hing kum nuam hi zaw ing.

1. Hattuomte panlahna: Hattuom ichi sil sensitive mama khat ahina ah, pilvang tah leh laiiengthou a kipulphu poimaw mama ding hi. Hattuom sungah Laiiangthou leh hagau a ki bulphuna a detlou chiengin Setan panmun khawna ding mun tampi kihong china himai hi. A bial enkol Pastor hitaven, a local pastor hitaven, tualeh hattuom toh kisai a nasem akisaikhapi akoi akoi hitaven, Pasian thu a ki bulphu lou a Pasian nasem kichite ahileh mi huoitup sangin mi delja in pangnuam zaw uhi. Tahsa leh be-le-phung a pei hattuom nasem mikhat in mi delja nuam mama ahiman in ki velphat poimaw kha ding hi.
2. Nampi leh gam kemte panlahna: Nampi kivaihawmna leh politics saina dingin khuo leh tui pen apoimaw bulpi hizing hi. Khuo-le-tui bei a nampi politics kuong kitawl theilou ahiman in nampi kikhai khawmna pawlpite'n role neilien mama uhi. Khuo-le-tui kepbit na dingin pu-pa satsa gamlei kemtute'n mawpuona lientah nei kia leuleu a, eima mimal leh gilpi a ding mei a gan-le-lei kem ihi loudan uh maban khangnoute'n i thei chet uh poimaw mama hi. Pupa satsa gamlei bangja e khat mi dangte khut a pie leh juokhiet umta a, tuate zieh in nampi kuongtawlna nasatah in tongkhata ahidan mit a muthei in kilang hhulhul mei hi. Tua ahiman in pupa satsa gamlei kemte leh nampi kuong tawlte aki thumu zing uh poimaw a, juo leh suh thelthang chite maban a chiin lou kei hing pawimaw ding hi.