Tripartite Talks chipen kihouna pawl thum tel china hi a, Pandora Box ahileh Greek tangthu a a pasien uh 'Zeu' in leitunga numei masa pen di'a ana siam 'Pandora' kunga singkuon khat ana pia, na hong mawngmawng lou di chi'n thu ana pia hi. Numei chitahma thei ut tinten ahiman in ana hong a, ahon tah in hagau gilou, silsia chinteng (evils) leh lungkhamna (miseries) chin teng hing lengdoh a, a lengdoh manlou kinepna (hope) umden chi'n Greek tangthu ah ana kigen hi.
Gam neunou khat, nam chin tenna Manipur ahileh November 1, 2016 apat in United Naga Council te'n National Highway 2te a economic blockade abawl zieh un phaigam leh tanggam ah hamsatna leh lungkhamna ban ah lungsim ngaisutna gilou tampi mipite kal ah pieng khia hi.
UNC in agenna ah tuom buoina toh kisai a Pandora Box hongkhia Manipur Government, adieh in Chief Minister Okram Ibobi Singh ahi a, a hong a ahong ta ngal a ahileh akha kia dingdan lampi a sui ding ahi chi'n gen uhi. Tu dinmun a Manipur buoina ahileh state govt in Sadar Hills leh Jiribam district siemkhiet ding vaiguon anei zieh ua kipan hi a, district 7 siemkhiet ahikia zieh a huoise sem ahi.
Nagate'n ahileh ka pupate un shisan a aleisa uh, ka gamlei uh lahsah in ka um ua, nam dangte kunga hawm ja in um a, Naga mipite zong khenza in ka um uhi chi ua, Manipur solkal in ahileh vaihawmna kitupzaw umna ding a district tha siemkhiet ahi ban ah, Manipur gamsung pen solkal a ahi man in koi nam bing khat in kou gam chi'n a kineisah in a ngiet thei sih ding chi'n gen jel hi. UNC in a pansia dang khat ahileh tam buoina pen koima mimal leh nam bing gelgawtna hilou in solkal in a thukimna sa nelsia a nna asep zieh a kibawl ahi chi'n panmun khaw uhi.
Tam toh kisai in Union Govt in kihouna nei dinga a chiel dungjui in tuni'n (Jan 3, 2017) Delhi khopi ah India solkal, Manipur solkal leh UNC te'n Tripartite Talks nei ding uhi.
Lung-awpkai huai mama khat ahileh, UNC in Naga toupha gam sunga District siemkhiet ding ahileh Naga mipite toh kihouna um masalou a bangma bawllou ding chi'a a panna uh hing pawkhe tha kia ding ua gingtat ahi. Tuami dungjui a nasepna pei ding hitaleh Manipur govt in district a siemkhiet sateng suhmang kia ding china hita hi. Manipur govt in lah tuabang a nuatawl a nna sem ngeingei lou ding ahi pen chieng mama ahiman in a thukhietna ding uh gen hamsa mama hi.
Ngaisut kham ching mama khat ahileh, Centre govt in kihouna ah onserver dan in a um khinkhian diei? Ahisihleh, a solution bang ang pawkhe diei chipen bildaw huai mama hi. UNC leh Manipur govt te dinmun ahileh chiengkot leh mankhawng kisukha china ding lampi kaw mawnglou ahiman in.
Teltah a laigiel khen khat in tam kihouna pen Naga te'n Southern Nagalim ana chi uh tanpha hing sukha thei ding in tuot uhi. Tuami tan asuhkha lou tawp a kivaihawmna tuom ahisihleh 6th Schedule tan be kihouna genkha a um thei ding in galmu uhi.
Tuachi ahitaleh Tripartite talks in Pandora Box kihongsa pen a khabit joukia na diai le? Pandora box sung a kinepna (hope) umpen bang kinepna ahing hita diei le?
No comments:
Post a Comment