Khovel ah lungsim ngaisutna toh kisai mihing zaat tuom tuom um, sil khat
pou pou ahoilam a mu pawl, khen khat inlah a selam ngen ngen ngaisut, khen khat
kia ahita leuleu le lah mimal kal a kitheisiemlouna a um zieha a hoi ding
hinanleh a selam a mu sawm tei tei, pawl dang khat ahikia leh a mi muda nanleh
a ngaidan mudalou chi um thei zel. Tuabang kal ah a ngaisutna pomthei sih
nanleh mimal khat leh khat kikal a tahsa kimudahna pen umlou chi zong um thei
veve hi.
Khovel pumpi a gam changkang pen a kigen United States te’n general
election asai chiengun ahileh presidential candidatete mun chin gam chin a a
ngaidan uh kibanglou ahiman in dem chitah in kidem zel ua, hinanleh a mimal in
ki mudah leh kideh lou uh chi I thei chiet uhi. Ideology clash (ngaidan
kibahlouna) nei u leh zong a mimal in kideh vate lou uhi. Anaipen a etsahna
di’n, President Barack Obama in election hun sunga sithu nam zen a akidempi leh
kimu uleh kihau ding bang phiel a kihou uh hinanleh akimu chieng un mimal kal
ah ki mudahna um sahlou uhi. President kai pen pen in a kailou pen toh na
semkhawm dingin a nuoitah uah koi thei zel uhi.
Organisation khen khat ah ahileh mimal kimu siemlouna ziehin a ngaidan
uh pawlpi a di’a hoi hinanleh ki pawmpieh nuomlou vevaw ana um zel veve hi. Na
kana sep khahna mun khat ah, kou team a manager pa leh team danga manager pa
kal a mimal kitheisiemlouna a um ziehin amau gel mai hilou, a nuoi ua semte
tanpha nasatah in nasepna leh ngaisutna hing subuoipha uhi. Team tuom tuom hinanleh
nasep in a tup leh a ngiim kibang ahiman in a ngaidan uh kikum in sungkhawm
thei uh hitaleh ka tupna uh nuom tah a tungthei ding hina zenpi, director
tanpha a’ng ki involve ngai vawt in um hi.
Tam in a etsah ahileh pawlpi hitaven, nampi hitaven, a bang a bang
hitaleh khantouna ding ahipou leh eima mimal kal a kitheisiemlouna umte pen I
nuolam a koi khiet kiphamaw hi. Eima mimal ki mudahna zieh a pawlpi or nampi a
khan ding bang tah a akhan theilou leh sil zum huoi leh dahuai pi khat suoh hi.
Samuel Huntington, research scholar khat in tanglai apat in khovel ah
ngaidan kibahlou zieh in kihauna ana pieng zing a, tam ngaidan kihauna ahileh
atangpi in mimal kal a kitheisiemlouna apat pieng hinuom deu in gen hi. Ngaidan
kibahlouna ahileh khantouna ding daltu nasapen leh kipalpuohna lienpen ahi ana
chi hi. Research scholar dang khat, Jonathan Tod in ahileh suolam gamte toh
tekah in tumlam gamte pen a lungsim uh zau (liberal) deu a, organization or
nation khantouna ding ahi chiengin ngaisutna kibahlouna leh mimal kal a
kitheisiemlounate pen a nuolam uah suolam gamte sangin koi mang dan siemzaw uh,
chi’n ana gen hi.
Khovel leitung a I hinlaisie pen mimal kal ah kitheisiemna leh ki
theisiemlouna a um zing ding ma ahi, mihing I hinalai ua, ngaisutna tuom chiet
ki nei a, mi khat mudan leh eima mudan zong kibang thei zinglou hi. Hinanleh
ngaidan pen a ki clash hun zong um van in, a kibah hun zong um tham ding hi.
Bang teng hitaleh, nampi khat khantouna dingin ngaidan kibanglou,
lunggel tuom tuom, sil mu dan chi tuom tuom ngai leh poimaw ahi dungjui in,
mimal kimu siemlouna umte zieha tuote pen a lampi khahtan lou pichin huoipen in
kilang hi.
No comments:
Post a Comment