India Danbupi’n I Silphut uh a huom jou na diei?

Republic of India kum 50 a chin in tua hun a Lok Sabha speaker PA Sangma lamkaina nuai ah India dung-le-vai ah India Danbupi nuoi a chi-le-zaat chi tuom tuom umna India mipite a huom suoh nai chi telsui in ana vah kawi uhi. ‘The National Commission to Review the Working of the Constitution’ vaiguon tungtawn in India danbupi etthana ana nei ua, a sil mukhiette uh “Reviewing the Constitution” chi’n laibu in ana bawl khia uhi. Tamna a sil mukhiet uh poimaw dieh ahileh ‘Secular’ chi thu teng preamble ah tuong nanleh India pen secular ahilou dan atha in mukhie uhi. Tuaban ah, a sil mukhiet uh tampite lah a state chin a zalenna ahisihleh state ngente dei-le-ngai zong genpha in um hi. 

 

India Danbupi in state tha leh state gamgi siemphat ding toh kisai a gendan in ahileh; Constitution Of India Article 3 in a gen dan ahileh ‘Parliament in dan dungjui in President of India phatsahpina toh (a) state khat pou pou apat ahisihleh state ni sanga tamzaw ahisihleh state umsate apat gam gawmkhawm in state tha khat a siemkhe thei ding; (b) state khat pou pou a su lien thei ding;  (c) state khat pou pou a su neu thei ding; (d) state khat pou pou gamgi a heng thei ding’ chileh (e) state khat pou pou a min a heng thei ding chi ahi.

 

Article 244A. (1) in ahileh Parliament in dan dung zui in Assam state sung apat abil khat ahisihleh a pumpi huop in ahisihleh Article 7[Part I] na dungjui in Tribal area sungah autonomous state, local legislature leh Council of Minister tel thaw in a nei thei ding chi hi.

 

India inpi Lok Sabha leh Rajya Sabha te’n zong dan dungzui in state siem theina thu nei ua, hinanleh President mei mei in tam bill pen luikhe thei a, tuami masang, a suhkha ding state kup masat ngai chi ahi.

 

Zo suonte zong tam danbupi sunga article te pansan in sil nget I nei sam uhi. United Peoples Front (UPF) in Article 244 A of the Constitution of India pansan in autonomous state ngetna nei a, Kuki National Organisation (KNO) in Article 3na pansan in Kuki State ngetna nei hi. KNO in a ngetna ah, Kuki Legislative Assembly seat 60 leh Upper House-Kuki Upa Inpi seats 40  nei ding ngetna bawl chi a thei ahi.

 

India phuolpi toh kihouna pat hinanleh bailam tah a tung pei ding chi hinaisai lou ahiman in lungke lou  kei a pantou poimaw hi. Central government in pha hing sahpi hita leh zong Manipur kumpi doh in um nalai ding, tua hun chiengin zong dan dungjui a dawnbtuna ding hunchiem umlou ahiman in Manipur govt in zong bangtan hen taang ding chi gen hamsa pi khat ahinalai hi. Hinanleh danbupi ah state kumpi in a pom pieh ngei ngei ding ahi chi kigiellou ahiman in parliament in zong direct in bawl thei, India pen bawlthei chi lei zong upadi ngen vaihawmna ahiman in bailam lou ding chipen mit a mu sa tawbang ahi.

 

Tam thu I genna zieh ahileh, India kumpi thu thu hinanleh tu dinmun et in state kumpi phasahpi lou in central in nna semlou ding chipen Manipur a sil tungte apat mu thei in um, tua ahiman in UPF leh KNO in angle tuom tuom apat policy khaw asiem uh poimaw ding chi man thu ahi.