Kum 2013 Adi’a CCpur in A Poimawh

 

 

Guite Road - District Damna Di’n: Kum peisa apat sil tungte et in hung hing tung jel dingah NH-39 (Dimapur, Kohima, Tadubi, Senapati, Kangpokpi, Motbung, Imphal) lampi pen nasa sem a hing buoi toujel dinga mu thei in um hi. Naga leh Meitei kal ah kitheisiemlouna lien deu deu ahiban ah, sil neu neuter ban ah Kuki state demand toh kisai in kum dang sangin khahtan in hing um tam zaw dingin lang hi. Tuachi ahitaleh Churachandpur district in tuahun chienga zong ne-le-ta buoilou a I um theina ding lampi um sun Guite road lam pibawl pen alou theilou hing suoh ding hi. Jiribam lam lah bang chituh in siempha nan uleh tua a tunga I gente’n a toupha uh ahi zieh in a buoi ding a theisa ahi jel hi.

 

Lamka Traffic Rules: Kum peisa apat in Lamka police leh Traffic police te’n nasatah in Lamka khopi sungah duty hoitah in hing bawl ua, traffic rule bang feltah in hing enkol uhi. Mipi ni chin a asang a simte ki suhvai, ki touvaina nasatah in nuomtuom a, lampi thoveng deu in kilang hi. Lamka khopi sunga gari nei teng sangin a neilou nichin a kenga lamzawt tamzaw ahiman in mipi a ding khuolna traffic rule pen Christmas leh New Year mei hilou a kumtawn a jui hiden thei leh khopi sunga changkang zaw in kilang hi. Mi tamkhopta ahiman in ahithei tan in pavement/footpath vel a van zuoh, ahisihleh dawr bawlte’n a van koina ua azahna munte u zong suh sieng hinalai leh a dei huai hi. Tuaban ah Lamka sungah gari speed limit poimawta hi. Traffic policete‘n ahithei tan in lamka thuom chin ah two wheeler toh duty in traffic rule botsia a tai suohte tanpha mat hi teitei leh a dei huai hi. Speed limit mai hilou in gari tawlte valid driving license regular deu a check hithei nalai leh!

 

Lamka Khopi Lamlien: Lamka khopi sung lamliente ahileh singtang lam, mun ken leh kol zing lah lamlien dingin a hun giepta hi. Phalbi sungin ahileh vut-vai toh kidim zing a, nipi chiengin tuilam bang jel hi. Tua ahiman in I khopi neisun uh, Lamka khopi sung beh ah lamliente siemphat thei hijel leh changkan huoi mama ding hi. Siemphat ahi sun sun leh zong inch khat vel a saah, gari gih deu a tai leh kihawkhe thei chite pen chiing nawndah theilei ut a huai ta mama hi.

 

Lamkate Pilvan Huai: I khopi sungah Zo suon ngen tengkhawm chinanlei chi-le-zaat a ki et dangna lien nalai mama in kilang hi. Mimal khat leh ni ki buoina zong tulai in nam level tung thei ding din mun ah ki ding zing ahiman in mi chin pilvan kul in poimawh hi. Nang leh kei zieh a mi tampi’n lemna leh muonna a phu bang ua a neilou dingpe’n I ki ven uh ngai a, pilvang tah a hinkhuo I zah zing uh kipha maw hi.