Nampi Khanna di’n Ngaidan Tampi Poimawh

 

 

National Seminar on the Zou Language and History vaiguon Zogal Memorial Hall Complex a zah ahi toh kituoh in nam khat Literature khansahna di’a poimawh toh kisai ngaidan tamlou I sung ding.

 

Laibu giel khen khat in Literature ahileh mihing hinkhuo limlang bang, ngaidan leh mihing lungtang a lunggulte puonzahna lampi ahi dungjui in leitung a mihing a um laisie literature pen a pieng zel ding leh lam tuom tuom a khang zel ding chi khat ahi. Tuaziehin literature pen a dih pen pen chi umthei lou leh a dihlou chi zong um theilou chi uhi.

 

Khovel ah Greek ham pen literature lam a hausa pen di’a gintat ahi, khovel a ki zang tam pen English ahileh literature lam ah tua chi hausat senglou ahi man in ham tuom tuom apat kaikhawm in English ham suoh zel mai hi. Literature I chi pen Pu-Pa khang apat I neisa tampi um tham hi, hinanleh khovel khan dungjui in literature zong khang zel ahiman in khangluilai ham pen akichin zawhlouna tampi um hi. Laibu khen khat ah ‘literature is a living thing, that keeps on growing and changing’ chi hi.

 

Literature khan sahna dingin laigel chi tuom tuom poimaw hi. Newspaper a thugel tangpi, Pasian thu toh kisai in zong literature kibe thei, love song, gospel song, novel leh mi hing hinkhuo a ham zahdan leh zahna dinga a zawi umte pibawl ngai hi.

 

I gen nuom pen tah ahileh, nam khat sunga sil bangkim a khantouna a um theina dingin ngaidan chi tuom tuom tam tah sunkhawm kiphamawh hi. Tua ahi dungjui in literature lam zong ngaidan chi tuom tuom a’ng tam chiengin lai lam khantouna hing pieng thei hi. Etsahna dingin, Pu Philip Thanglienmang in guntah a research a bawl nuoh a a mukhiet – Lushei laiteng banga a innkû umte ki zang leh Zou ham zahdan ah theisiemna um thei chi’a presentation a bawl zong lai lam khansahna dinga ngaidan khat ahi. Philip Mangkang ngaidan ahizieh a zah tei tei ding ahisihleh zah mawng mawng lou ding china um tuonlou hi. A research dungjui a a sil mu a kupna hi lel hi. Tuabang ma in nam sungah ngaidan tampi a’ng pieng chiengin ham hausa hing hi thei ding hi. English ham in ham chi tuom tuom apat a lahkhawm pen original English ham za ah sawmli vel pha ta dingin research scholar te’n gen uhi. Tua ahitaleh, I ham-le-pau khangsah vai I chi a ahileh ham dang apat zong eima ham toh kizawitawn a zah thei umte a ban a ban zah a hoi himailou amah? Akilawm vawtlou zong um tham na va, hinanleh eima ham leh pau toh akilawm huntawh, zah khawm thei umte zah khawm zing zeng mei pen pha mailou amah? (Pupu Zou)