Kum tengin state government in winter session Christmas kuon, December
15 leh 25 kikal in nei leng ua, tua hun sungin a mun a mun ah mipite’n sil
demand nei in bandh leh general strike chite um zing, Christmas kisahkholna nasatah
in subuai zing hi. Tukum in ahileh tua I gen session hun sungin zong bandh leh
strike um, hinanleh tua sanga khawzaw Meitei film a nungah lim chiing Momoko
tunga NSCN (IM) sepei khat tatkhelna ziehin Christmas kisah khol buoina nase
dieh in kilang hi. Meitei community in zong Film Forum Manipur, Manipur State
Shumang Leela Council leh All Manipur Matam Eeshei Kanglup te panlahna tungtawn
in advantage la ua, ahithei tan in Christian te Hundampa pienni lawm dinga ki
singsahna suh buoi chitah in subuoi uhi.
December 18 ni’a Chandel Mahamani Higher Secondary School ground a
siltung, Manipuri actress Momoko Khangembam tunga NSCN (IM) sepai khat gamtatna
a dih hi’n Meiteite kiphinna a dih sih china hilou in, molestation zieha state
pumpi suhbuoi ahiban ah, a khengval a Christmas hun suhbuoi sawm tei tei ahina
pen sakhuo tuom tuom tenkhawmna gam a sil chiin di’n pichin huoilou in kilang
zaw hi. Meitei sunga organization tuom tuom lamkai te’n tam kiphinna pen
communal line a la lou di’n thupuon bawl nan uleh sil pieng leh bandh
supporterte nasepdan ah communal suosah sawm uh ahidan zong kilang hi. Helpawlte
gamtatna tengpi ki phinpi ding hitalei I gam ah lemna leh muonna bang chi’n a
um ta diei le? Communal issue suosah sawm uh ahidan kilahna ahileh December 24
ni’n Napet Chingloi ah Meitei tangval hon khat in Christmas mang di’a innlam
zuon a pei sangnaupang 13te ana soisah ban uah, numei naupang khat zumhuoi tah
in ana khoi uhi. Tua thamlou in bandh kilahkhiet nua in zong Christmas mang
dinga innlam zuonte bandh bei nanleh lungmuong in peithei lou, sepei thahat in
inn tung thei ham ham nalai uhi. Tua bang sil tung kal ah Christian
organization leh forum te’n kam khat zong kehlou a sip khin khian a a um pen
lamdang chi thei khat in um hi.
Helpawlte gamtatna gen ding hitalei, Meitei helpawlte’n December 11,
2011 ni’n Yaiphakol ah singtangmi numei Hatkholhing (42) gangrape ana bawl uh,
bang chilai a hei khat in zong Hmar bial ah Meitei helpawlte’n numei naupang
tamtah ana susia uh, hinanleh tua hun in Meitei community sunga organization
leh govt lam in kam khat zong ana keh lou uhi. Hinanleh tutung Momoko tunga
silting pen a thupi sih I china hilou in tam a tunga I gente toh case ki bang
veve hinapi, bang chidan a tuahun a ana ngaisah lou uh adiei? Hin min na se ei
khoi chi’a tangkou kou dingin, action a sepkhiet umlou jel ding. Tribal
community in iki neppi mama uh Pu Phungzathang leh Dy. Chief Minister te’n tam
kam teng bang zang mun dieh nalai uh, amau tanau leh innsung mite tunga tung
hitaleh sip khinkhien in a um na di uai?
Tutung Meitei community te’n Christiante Christmas gift a pieh uh mawh
ngaidau thei maimai ahilou dan thei poimaw hi.
No comments:
Post a Comment