Private School v/s Employees & Students

 

 

Kum tha ahi toh kijui in Churachandpur district sunga school umte admission kipat hing hun kiata. Adiehin Lamka khopi sunga school umte ah sangnaupang admission sui tampi hing um ding ahi dungjui in school hoi leh minthang hing kitu ding ua, admission leh hateng tuition fee zong hing khang huai huai dinga lam-et ahi.

 

I gam a government saanginn te a duhdah lou ziehin private school pen summeet bawlna hoitah hing suodoh ta hi. Private school bawlte mit a mu in khang hul hul ua, akum akum in a building uh kehlien zung zung uhi. Maniipur sungah private school pen business hoi mama hing suodoh tahi.

 

Ning kum All Manipur Students Union in survey abawlna uah private school chiet chiet hinanleh admission leh tuition fee a dei dan chiet ua kibawl uh ahidan uh talang uhi. Tunitan in private school toh kisai free structure leh guidelines bangma government apat a um lou ziehin full autonomy nei ahiman un a bawl dan dan uh juilou alampi dang umlou phot hi.

 

Kum teng in sangnaupangte tuition fee khang, admission fee khang chi ahi den kei hi. School khen khat ah school uniform, bag, kengkoh, laibu leh school toh kisai a poimaw bangkim a school mun mama a lei gai vate ahinalai hi. Tuate pen aki bang kim ding deina hinanleh nu-le-pate’n amukhiet uh khat ahileh a van man pen a kheng a val a zuoh ahi chi uhi. Tua banga fee khang zing hinapi school khen khat ah playground, library, computer laboratory, tui dawn ding leh school a di’a poimaw infrastructure umlouna tampi um nalai hi. Tuatham lou in school teacher te halaw zong innsung kivahna kham chinglou a pieh hi zing nalai uhi. Employees welfare scheme chi’a Trade Union in a a guon – health care, flexi-time, assistance program leh scheme tuom tuom te lah theipha hilou. A scheme te genta lou, a lungkimlouna uh a tuttheina ding uh platform umlou nalai.

 

Tam teng ahiman in private schoolte’n free structure toh kisai a uniformity a maintain uh poimaw a, I gam a innsung hamsa, school hoi alah kai nuom, a fee ding lah nei jou mama loute adding zong ngaisut ngai hi.

 

Tuaban ah private school tuom tuom a sangsia te’n zong All India Trade Union guidelines dungjui a Union hoitah a nei uh tu maban a di’a kivenna di’n hoi hi. Employers leh employees kikal pen sum thu ahiman in ki theisiemlouna leh ki hau kibalna bailam ahiman in sangnaupangte laisimna suhbuoi ahilouna dingin employees leh employers relation ahoi zing ngai hi.