Editorial,
Tulai in Lamka leh akimvel, adieh in i Nam sung ah Phung-le-tang thu ki uang bawl mama in, hunchin-hachin phiel in aphung-phung in pawi bawl in eima phung chiet i pi bawl ta uhi. Mipil leh mit-keu bai dawm te’n nam khat maimai in bang tan tun nawn lou a, bang chi leh mizousie, nam zousie kigawm in munkhat-thakhat ah pan i la thei diei mah? chi angai tuo zing lai un eite’n, i nampi sang in i be - i phung kikhopte uh uang bawl mama in aki lang hi. Tam chi bang a i um uleh, British te’n Divide and Rule Policy azah bang un i lah uah hing kizang ding a, eh hing ki zang zingta a, gawmkhawm sang in paikhiet leh thedel in i um zaw semsem ding uhi. Malai a i nam sung ua sil tung leh tukhanga tungte en talei, khatlaw hun ahi ta hi.
Phung kikhop khu ahoi mawngmawng sih kachi tuom sih a, na phung, nahina heima ah pai thei hi tuon lou ding a, a ngei ma hi zing ding na hi. Hinanleh tam kikhop/khawmpi khu i ha zah lai sie uh, i lungim uh hing neu deudeu ding hi.
Hei sung mun pou a ka ja zing leh ka thei zing khu, mi shi khat ang um leh, ‘Koi be-te e? Koi hattuom e?’ chi pou ahi moh hi. Kei ngaidan in Zou khat a shi leh Zou shi, Zou khat in lawchinna a’ng nga leh Zou law ching, Be-le-phung, hattuom leh khuo-le-tui a i ki etlai sie uh i ki tuoh ngaingai sih ding ua, i ki tuoh lou chieng in khantou na ang um ngaingai sih ding hi. Tuatham lou in khangsawn a hing pieng ding leh vai hing hawm dingte kung a chihoilou tuh-tu i hi zawsop ding uhi.
Khen khat ngiel hou, nampi sung a a lu a thawl lou leh be-le-phung zang a deeh sawm, be-le-phung toh chi leh nam kikhaina pawlpite tunga bang leen sawm. Tabang chiin hoilou i chiin laisie ahileh chi leh nam kivaihawmna tungah lah leng ngai ngai sih vai in, eima ki tuisa buo ki bang maimai ding hi. Nampi lah deeh jou ngei ngei sih vai in, i maban bingsah kihi lihleh giep ding hi.
Be-le-phung pen a um ding ma ahi, pi bawl ding ma zong ahi, hinanleh tuomi ipi bawlna uh a zah khiel kha jel un ka thei hi. Kum bangja vel peisa in Manipur pulang a um sangnaupang leh officer khen khatten be-le-phung a nasem, be leh phung a ki deltuo chi vel ja in a um zeuh zeuh jel hi. Tua bang gamtat i tawpsan lou ua ahileh hoina sang in sietna i lamtuo zaw ding un ka mu hi. I chiin uh hoilou mama a ka thei khat ahileh, shini man ni chieng a nang bepa benu ahileh na tel tei tei in, mi dang benu/pa ahileh na mel nakila sahlou pen, lungsim neuvai leh ngol vai kasa hi.
Tuazieh in, nam lamkai leh akisaipi te a ding in zong ngaisut tham leh panlah hun kasa a, tam bang a i pei tou zing u leh khat vei chieng in i nampi hing bei thei ding leh ki gal et mai ding in ka mu hi.
No comments:
Post a Comment