Janni NDTV news report khat a kigen Jaipur a tehsepu kum 50 a upa Dinesh
Dwivedi, laisiemna lam a PhD degree ni vei jou hial khat khutdaw genthei tah a
hinkho zang in um hi. Ama’n ha teng in school teacher pension sum Rs. 35,000
tunitan in sang zing, hinanleh khutdaw in ahinkhuo zang hi.
News ten bangzieh a tuabang hinkhuo zang a khosa ahiei chi’a akan suina
uah, a tapa kum 25 a upa, school kaipei nawnlou, khamthei bawl toh umkhawm ua,
a tapa in sum demand bawl in a pienna pa zong zataat jou nawnlou khop in
sing-le-suong tanpha zang in a pa ana soisah zing ahidan mukhia uhi. Hinkho
nuomtah zang a a pension toh hing thei ding hina jenpi lampam a khutdaw leh zum
huai tah in hinkhuo zang in um hi.
Churachandpur district sungah tel tah in kisui hitaleh innsung bang ja,
nu-le-pa bang ja niteng hinkhuo lim-le-kipah a zanglou bang zatah a um ta diei?
Eima innsung a security guard bang mai a duty paw gige mi bang jatah I um di
uai? I neisa, nihteen-puonsil, um-le-bel, sing-le-suong tanpha zalentah a eima
innsung gel gel a koi ngamlou bang zatah I um di uai? Tuathamlou in, nit eng a
I lawkhiet, nute’n a kawng ua a zee tinten na ngawn khawmthei bawl tate giinna
zieh a zankhe va guo bang zatah I um di uai? Tam bang a hinkho zang innsung leh
nu-le-pa te hepi huai chilou I bawlpie thei lah bangma um sam lou, a tuakha
te’n bou in thei vai, hinaleh a tuokha nailoute’n tam bang dinmun hamsa pen
bang chituh a genthei huai a tai chi gel a gel but hilou hi.
Khamthei bawlte’n ngaisut ding khen khat: Nang khawmthei bawl ziehin na
innsung, nu-le-pa, na sanggamnu, na sanggampa bang zatah in muolphouna leh
zalatna a tuatai? Na innsung a kipahna tung ding teng nang zieh in luonhi
luonna bang zavei a suotai? Na u, na nau in nitha law vevaw a puonsil-niihten a
leite bang zavei a guuh in na tawdoh tai? Nang khawmthei kideh zawlou ziehin na
pienna Pa leh Nu te’n a lawm, a guolte mai a zumna bang zavei a tuo ta uai,
bang zavei tua sah nalai sawm na hiai? Nang ziehin na innsung mite’n jan bangja
imu ngim theilou in hinkhuo a zang ta uai? Ki ngaisun vung vung in nah un
peisate entha kia mawng lechin siem nakitan na diei? Nang zieh a na gou neisa
uh, nei-le-lam teng mangthai mai ding chi ngaisun lechin khahlawna kham ching
thamta hi.
Kum tam tah nang zieha lim-le-kipah tah a gingtute kum khat kinepna
Christmas leh Kumtha zang thei nawnlou na innsung mite ding gel in tutung pen
hoisawm ham di’n iki chiel ahi. Na leitung pasian – na Nu leh Pa bang zavei a
mittui uh na luongsah tai, tutung Christmas leh Kumtha hun in aw le subuai
loukei in hunnuom I zangsah ding uh. Khatvei tah kha pet in pang lei chi nuom
ihi.
Khamthei bawl kisiemtha khat thugen, “kei zieh a ka nu-le-pa, ka
sanggamte’n zumna a tuote uh, hinkhuo heltah a azahte uh ka nungngaituo kia kia
leh ka zumtha suo, ka kaatha suo, kisia vatun nanleng a peisa hita, aw ana
khanglou baideu hita leng” chi’n akisiena thu gen chimthei lou hi.
No comments:
Post a Comment