69th UZO Annual Assembly 2025 - Presidential Address

PRESIDENTIAL ADDRESS PRESENTED TO THE DELEGATES OF THE 69TH UZO ANNUAL ASSEMBLY ON 13 OCTOBER 2025 AT ZOU GAL MEMORIAL CEMETERY COMPLEX, BEHIANG

BY THANGZAMANG, President, United Zou Organisation, General Headquarters

Amsapen in a 69 veina UZO Annual Assembly 2025 zangthei dinga chidam-ludamna hingpie, leitung bup a om chi-le-nam tampi umte lah a ei Zou tate zong nam khat-chi khat a hing siem, I ma uh hing pui jing I bieh uh Pa Pasian min phat kawm in tuni’a palai hing kalsuon jousie Chibai ka hing bu hi.

Tuoleh, I gam buai Meitei Gal laitah a chi-le-nam ngainatna toh tuni October nism 13 ni’a United Zou Organisation Annual Assembly 2025 palai a hing kalsuon UZO Adviser-te, UZO Lamkai masate, Zou Working Committee (ZWC) memberte, UZO Headquarter Executive Committee (HEC) member-te, Block Office Bearer-te, Unit President & Secretary-te, Zou Hausate, Zou Zumpi vaihawmte, Zou Literature Society-te, Zou Script Development Society-te, Zou Youth Organisation-te, Zou Sangnaupang Pawlpi-te, Zou Artists’ Union-te, Zou Women Human Rights Organisation te, Zou Officer te, Special & First Class Contractor te, Subcommittee tuom tuom a lamkai leh memberte, Hattuam lamkaite leh deituom a chielte ban ah Zou nam it leh ngaina a hing kikhawm mipite Pa Pasian leh I nam min in zatatna sangpen ka hing pia hi.

EI-LE-EI IKI DOU UH BANG E APHATTUAMNA?

Unau khat iki dou un bang phattuamna um ahia?

Bang I lemlawh uh ahia? Bang changkangna hing tun ahia?

A naipen in en lei.... kum 1997 lai a i siltuate uh tunitan amanghil lou atamzaw kihi nalai ahi. Tuni'n ei-le-ei ki tualdel kia lei asuhdamna ding a kum 50 lam hing daikia ding, bang phattuom na I mu uh ahia? Lung geltha kia vai.

IKI DOU ua, I ki thatua ua, Inn-le-lou iki halsah tua ua i lemlawhte uh:

1. Mi tampi in shina tua lawh.

2. Meithai-taga tampi um lawh. 

3. Mizawng mi genthei, khosah hamsa ki belap.

4. Numei naupang lungsim ngaisutna buai den, a damsung ua a manghil theilou ding uh jauthawngna i got uh.

5. Khamthei guithei bawl leh a zawnvah dim.

6. I chintuigu kang phial a i lamsa, I In-le-loute i taan uh.

7. Pu-pa te'n ana saatsa khuo-le-tui teng ki hal vam sieng.

8. I gam, I lei a khantou ding nasa pia a ki dal.

9. Damtheina lam, laizilna lam nasa pia sukha.

10. I society sung uh kidaidanna lian deudeu, a damna dia khang 1/2 ngai.

A hoina ding umlou, a hoilouna gen ding chilei tampi umnalai ding.

Achileh bang ziah a kidou dou nalai ding ihi ua? Ki ngaisun tha vai!