Tulai social media discussion forum tuamtuam ah tulai Lamka sung buaina, ZRO sung buaina leh Paite sung buaina in Zomi a kikhaikhawm chi-le-jaat dangte sung tanpha nasatah a sukha ahiding, a sansan ah kihouna chi tuamtuam um kawi leilui hi.
Tunai mama a topic hing piengkhe khat ahileh Zomi Council apat ki withdraw ding leh umden ding chivel hing gingkhia hi. Tulai sepna toh buaivuikhu den kahina toh ngaisah in zong kana koi vate sia, khangnou sisan sou vitvittelawi lungphut phut a khuong hi ngeng ngong va uh ka chileh tu jingkal ka gingtaatphalou, ka lawi muan mama leh piching mama khat in tuabang thu um akichi a, atahtah amah chi'n ahing dong mawh hi. Tuaphet in, eh! Ke'n kana thusim louleh nam dang tanpha jelsuo dan ata ve maw chi kahing ngaitua khe phut hi. Ka ngaisut veng veng a, tulaitah a tuabang lungguotna um ahileh bang hing pieng thei ding chite bang lungsim ah hing kilang duunduun mei hi.
Tulaitah i dinmun uh et in, tuabang lunggelna um leh sepsuo sawmna um ahileh ngaisut ding a poimaw kasah mama khat ahileh Zou leh Paite sung et in tu-le-tu in Zomi Council apat ki withdraw ding chi hitaleh party tuomtuom pieng thei leh kilawm kasa. A ki withdaw pawl leh a um den pawl um dingin gingtaat huai hi. Sia khu asat laitah a saat ding ma hina, hinanleh tambang thute pen a sat laitah a saat khu saatkhial bailam kha mama ding ahi. A'ng khing chiah kheeng hoikia na di'a hun sawtpi hing luut ding ahiban ah, a kum a kum a hing daithei sil ahiman in pilvan huai mama dinmun a ding ihi uhi. Zomi Council pen a hoi in a sia hi china vang hituan samlou hi, kum bangtan e khat peisa apat, adiah in Zou khanglai, khangnou sungah Zomi Council apat ki withdraw ding ahi chia houlimna tampi um tham ta, tuahunlai in ngaisah in zong ana um diah sih nanleh Zou khangnou tamtahte Zomi Council a kikhaikhawmna toh kisai minlou leh lungkim thei mama lou tampi um ahidan muthei in um hi. Ki withdraw ding hi in hitasihleh a hun pen saupi enkawm a thutanna lah poimaw kha mama ding ahi.
No comments:
Post a Comment