Zolengthe Editorial..
I tenna sietlei gamdai muol-le-tang ka en kimvel a, kipahna, muonna leh bitna ding um vawtlou. Iki heisuh leh buaina, iki heitou leh buaina, Paupu - The Hero lasah dan hileh, Mauna ngen hi kei lenna chi thei hita hi.
Churachandpur district sungah chi-le-nam a kidaidanna ban ah ham-le-pau kibang jat khat sung tanpha a kichizietna leh kimudana in vaihawm suata. Churachandpur ikan touleh Imphal khopi sungah buoina sim senglou maitua tou ding ana um jel.
Manipur sunga solkal nasem, Manipur Government Services’ Federation te'n State Government employees, teachers, workers leh pensioners te tungtang a etkolna ahoisem demand in kiphinna um tawn tung a, state solkal in a sil ngette uh a pichin suo lou a ahileh January 29 apat nasep khawl jen a kiphinna nei dingin giihna ana bawl jouta uhi.
January 8 nia Lok Sabha in ana pass 'Citizenship (Amendment) Bill 2016' toh kisai Churachandpur leh singtang district dangah buaipi kham in koi sih nanlei Manipur phaijang district tengah Citizenship Amendment Bill 2016 toh kisai kiphinna tanlou in um zing a, a huoise sem umtou nalai ding bang hi. Students organisation 6 - AMSU, DESAM, KSA, MSF, SUK leh AIMS te'n January 31 apat February 13 sunga Rajya Sabha winter session chieng a tam bill pass ahilou na dinga kiphinna huoise tah nei dingin kithukim ta uhi. Delhi tuolpi a kiphinna nei dingin volunteer 200 tenkhiet in umta ua, amaute ahileh Tripura, Assam, Meghalay, Mizoram apat sangnaupangte toh kithuo in Delhi tuolpi ah kiphinna va nei ding uhi. A langkhat lam ah JCILPS lamkaina in Imphal khopi mun tuomtuom ah Meira Paibi te toh kithuo in Citizenship (Amendment) Bill 2016 doudalna'n toumunna tanlou in nei zing uhi.
Rajya Sabha a Citizenship Amendment Bill 2016 luikhiet ahini chiengin Imphal khopi sungah Socialist Students Union of Manipur (SSUM), All Manipur Muslim Students’ Organisation (AMMSO), Manipur Students’ Association Delhi (MSAD), Reformist Students’ Front (RSF) leh All Meetei Pangal Students’ Union of Manipur (AMPSUM) te'n jingkal apat nita dong in kiphinna nei di'n mansan um diamta uhi. Tuani chienga Rajya Sabha in bill a pass ngei ngei ua ahileh Imphal khopi sungah Meira Rally huoise tah um dinga, mipi a sing asing a simte'n meisel tawi pum in Chief Minister tenna inn luonkhum ding ua, CM kitawp dingin phut ding uhi. Tuani chienga MP K Bhabananda in tam bill toh kisai Rajya Sabha a kamteng a kehlou ngeingei a bill pass ahileh ama tenna inn ngei a zong sil melse tah pieng thei ding dinmun in um zing hi. Manipur sunga civil organisation hat mama All Manipur United Clubs’ Organization (AMUCO) in NE State dang CM te'n hangsan tah a tam CAB a nuallai ua bang chidan a CM Biren sip khinkhian a um ahiai chi;n dohna ana bawl ua, BJP general secretary Ram Madhav in Rajya Sabha session a pass hiding ahitoh kisai NE mite chiemnui khumna toh kibang ahi chi ngaidan ana nei uhi. AMUCO zong mawhtou meimei lou ding ahidan a General Secretary Sanjoy Sorokhaibam in gen hi.
A langkhat lang ah, Political party 9 kigawmte'n Manipur Governor kimupi ua, Citizenship (Amendment) Bill 2016 withdraw bawl ahina ding genkhawmna dia state govt in Special Assembly a hat ding in phutna nei uhi. Tumasang lam in zong Civil Organisation khen khat in ana phuut ngeita ua, hinanleh state solkal in ngaisah in ana neilou hi. Governor in CM kungah ka gen ding chinanleh CM in Special Assembly a'ng han nadiei chi bildaw huai mama khat ahi.
Citizenship (Amendment) Bill 2016 ah Afghanistan, Bangladesh leh Pakistan apat India a hing tailut sakhuo khen khat Hindus, Sikhs, Buddhists, Christians, Jains leh Parsis mite ahileh India mi-le-sa hisah ding chipen India Danbupi Article 14 leh 15 toh kikal ahi chi ngaidan tanpi ahi. North East India a state, adieh in Mizoram, Tripura, Meghalaya, Assam leh Manipur in a joupi pen ahileh Bangladesh apat hing tailut mi tampite India khuo-le-tui hina pieh in umta un hileh a gam a ana tengsa te bangtan ahei a hing khupkhel jou ding ahiban uah, gam leitang hing jelsuo khava uh chi ahi deupen hi.
Tui sou letlet, a sou leet di kisa banga um zing India leh NSCN(IM) kihouna zong a sip phot bangma nanleh hun chin a soulet leh phul khe zungzung thei ding dinmun in um zing hi. Kheih china ding khat umleh Manipur pen a kuong kia dinga mansa zing ana hi jel hi.
Gen ding sah ding tampi um, i gen utpen tah ahileh tam banga state tamtah in a buoipi bill hing ki pass ta henla hileh eilawi in palbang i nang jouna ding uai? Sietna huipi hing laang taleh, siettui nuai ah i vangkhuo uh a jalmei diai? I innsung leh i nam sunga buaina umte koikhia in I nampi a dingin jingvai i hawmkhawm thei ding uai?
- Pupu Zou
*ZOLENGTHE*
Connecting the Zo people
No comments:
Post a Comment