I nuakal in zong Zomi Council apat United Zou Organisation ki juutkhe ding chi thulamleeng toh kisai in tuabang thu um tahtah ahileh thutanna lah ahi masangin I tuhna ding en masa vai chi ngaidan kupna ‘Editorial’ ina gial jouta uhi.
Tuni, Feb 15, 2019 ni’n gingtatpha lou leh lam-etpha lou in Zou Defence Volunteer (ZDV/UPF) lamkai lubawhte lamkaina nuai a Zou sunga hattuom lamkai, MLA/MDC te toh “UZO/ZYO/ZSP te ZC/ZYA/ZSF apat ki withdraw tungtang” chi thu a kikupkhawmna thupuosahte chi’n thusuo khat hawmzah in hing um hi.
Tamna ZDV/UPF thusuo in a talat dan in tu-le-tu a Zou nam lamkai UZO/ZYO/ZSP te’n hausa, MLA, MDC leh ZDV/UPF te phasahna tellou a Zomi Council leh frontal organisations apat withdraw a bawlna tungtang utoh kisai chin-le-ha toh kithuo a nangdi’n kithukim ua, tualeh Zou nam sunga buoina a umlouna di’a panla dingin Rev. Dr. Ginkhanmung Zou, Rev. Khamchinkhai leh Rev. Dr. Hangminthang te bawlna sui dingin guot uhi.
Tam thutoh kisai thuchien leh thudih Zou nampite kunga theja poimaw ahi china toh ZOLENGTHE in pan kila a, Zou sunga tam thutoh kisai a main stakeholder a thei khenkhat social media leh telephone tungtawn in ana kihoupi hi. Jankhang jannuai chilou a nam itna toh Zolengthe adminpu phone ana received chiet uh ahiman in a unpi ua tungah nuamthu gensenglou tut ahi.
UZO Ghq ulian vaisaite apat thudih leh thumaan kaikhawm ahizaw in, ZDV lubawh lamkaite apat a thu lahsawnna uh leh sil umdan kankhiet hia, tuachi’n ZSP GHQ leh ZYO Ghq te zong houpi ahizaw in tuni’a MLA pu inn a meeting toh kisai MLA pu secretary apat zong thu kaikhawmna ana kinei hi.
Thu mukhiette:
1. UZO Ghq apat thu kimu dan ahileh Zomi Council apat ki withraw na leh thutanna umlou ahidan mukhiet ahi. UZO ahileh Zomi Council a dinga khuom-le-ban poimaw pente lah a khat ahina ah, tambang meimei leh houdeu a ki withdraw umthei guol hilou ahiban ah, Annual Assembly in approval a neingai ahidan lamkaite apat thu mukhiet ahi. Zomi Council ahileh chi-le-nam tuomtuom kikhaikhawmna forum ahi dungjui in I relationship pen review bawl jeljel poimaw ahiban ah, kikhawikhawmna pen member tribe chin a di’a meaningful ahitheina ding tupna toh review bawl ding leh Assembly a mipi ngaidan kaikhawm ding chi ahibou hi chipen UZO Ghq apat dawnna kimu dan ahi.
2. ZDV/UPF lubawh apat thu kimudan ahileh, UZO Executive Committee in ZC apat ki withdraw na ding thutanna bawl chi reliable source apat mu ahiziah a tambang thutanna kibawl ahi chi hikia leuleu hi. ZDV/UPF lamkaipu’n agenna ah, tambang a thutanna lah a um ahita a ahileh Zou sung kehni kisuolouna teitei ding tupna toh panlah kisawm ma ahi chi’n gen hi. Keng khat a I ding ua bawn mi ki nuadel, keng ni in ding lei mi zong I nua del jou ding uai? Hattuom zong I na kikhen ua tutan gawm guollou in I umta uhi, UZO kikhenna hing umtaleh a gawmkia kichipen sil namai hilou ding ahi man a ki pawna mama ahi chi’n gen hi.
3. ZSP Ghq lai-aat lamkaipu’n agenna ah, Zomi Students’ Federation apat official a ki withdraw na kibawl khalou ahi chi’n gen a, hinanleh ZSPte ki active joulou ahi chi hi.
4. ZYO Ghq ahileh I theisa mabang un ningkum bullam, a date pen thei chiietchiet nawn sih nanleng ZYA apat ki withdraw na khat ana um joutham ta hi.
5. Tuni’a MLA pu inn mun ah MLApu lamkaina toh Hausa lamkaite toh meeting um chithu social media tungtawn a thei ahiman un, bang thutanna lah ahi ua chi theinuomna toh MLA pu PS kungah thukanna kinei a, ama’n tambang in gen hi. UZO EC in ZC apat ki withdraw ding chi thutanna abawl hi chi thu jah ahiziah in Hausa upa leh lamkaite toh bang chi ding chi genkhawmna kinei ma ahi, hinanleh thutanna bangma bawl hilou ahichi’n gen hi.
Tamna a tunga meetingna Pu Haumang, Chief of Sehken thugen chi’a social media a hing kihakhia tam a nei a bang ahi. “UZO Zomi a patsa pawt khiat di kichipen ana lung himaw sih un,tu jing kal mama in jong UZO President Pu Chinlunthang toh ka kihou ua tuanah UZO te Zomi a pat pawt di kichipen a tahtah ana ama? khum bangpi hithei ding ama? ka va chileh Assembly chiang a ei UZO sunga Hausa te satan nei leh satan nei lou te gen khawm di kichi hi in tuabang thu kigen kha sih achi hi” chi'n genhi.
MLApu thugen chi’a social media apat kimu sawn, saupi hinanleh Zolengthe in zong ana ki ngaikhawhpi mama (excerpt) “…….. I MDC teng jet line bawl a ka sawl a line ka mu jou lou leh bang ka law ta deai………..” tam a tunga thu tuntawng ahileh MLA pu’n I nam damna dinga UZO Lamkaite toh kikupkhawm a utdan leh a lunggul dan MDC teng kunga line bawldia a nget, line a mulou uh agenna ahi. Tam toh kisai UZO Presidentpu kungah bang chi lawmlawm a line na pialou chia akidoh na ah “MDC te tamthu hing genkha umlou pi bang line ka pia ding” chi ahing dawnna ahi.
Thukhupsitna
A koi a koi I nam damna ding leh hoina ding dei a kipei chiet ihi dan uh mukhiet in um a, communication GAP lianpi umta ahidan talang hi. Thuguh kepdan leh koiching dan siam kitasam leh maipha sui kitam nalai chipen tamthu lenglete apat mukhiet ahi. Thulam leeng leh thuzuau toh I nam sung peingol sawm, chitahna ki tasam leh ki neilou ahidan kilahna zong ahi. Eima chitah louleh thulimlou ziah a pawlpi khat suhminsiet a umthei ahi chite zong I thei uh hunta, kam-le-ha zong I kepsiem uh poimaw. Tam bang dinmun a ding leh dengdel mama mun a um ihiman un, a neu alian pilvang huai mama ahi chi manghillou di’n ikichial ahi.
______________
Pupu Zou
ZOLENGHTE
Connecting the Zo people
15022019
No comments:
Post a Comment