A Ni leh a Ha in buoi sih vai

 

NANG LEH KEI DI’N ZAN HAVAI NUOI AH A PIENG

 

~ T. Zamlunmang Zou

 

Christmas Background: Khovel pumpi a pawi lien pen, Christmas ahileh Jesu pienni ahi chi theilou tam nawnlou hinanleh “December 25 ni’a Jesu pieng tahtah ana amah” chi dohna bei ngeilou hi. Kum 2000 peisa a Jesu pieng hinanleh A pien apat Christmas kichi ana ki zang pei hilou hi. Ahitaleh nang thei dan in December 25 ni’a Jesu pieng ahi  nai le?

 

Christmas chi’a sil I kipieh tuo, in-chei, Christmas tree chivel Jesu pien ma sang peh peh a ana ki zang ana hita bou hi. Hinanleh tumlam gam a pupa tawndante Christmas hun ana bikhiet utoh kituo tou tou ahiman a ki zangtou tou kha ana hi mawh hi.

 

Mesopotamian & Rome pasiante: Kum 4000 peisa apat December ha kim lah vel in Mesopotamiate’n a pasien mangpen uh ‘Marduk’ kichi pahtawina’n pawi ni 12 sung ana zang ua, Rome-te’n zong a hun ki bang ma in January ha bul tan a pasien uh ‘Saturn’ ana bie uhi. Tua hun sungin a insungte uh ana jem ua, singnou selte tungin candle vel ana khai uhi. Khat-le-khat kive tuo in annkuong ana im khawm jel ua, silpieh ana ki petuo jel uhi.

 

Tummei: Scandinavia gam mite, tulai a Europe gam Germany, Norway, Sweden, Denmark leh adang dang te’n ‘Yuletide Pawi’ kichi nisa ni tampi suo doh lou a um, a’ng suo doh chia ‘Yule’ singtum kichi zang in tummei ana bawl jel ua, singba chin teng ah apple ana khai jel uhi. Tam pen tunitan I I jui uh tummei leh Christmas tree I chichite uh hing kipatna hi dinga gingtat ahi. Tuabang ma in Rome mite’n zong ‘Saturnalia’ pawi azah chieng un singkungte ana jem ua, Winter Solstice kichi December 22 vel khat ni tom ni penpen chiah pawi lopna la kholai dunga ana sah jel pen uh tuni’a Christmas carol I chi uh kipatna hi dinga gintat ahi.

 

Christmas Ni: Christian sakhuo jui di’a ana ki pekhia, Roman kumpi Constantine in Rome mite December pawi teng toh Jesu pien lopkhawm ding, gingtu leh gingtu loute kaikhawm ding chi tupna toh December 25 di’a ana bikhiet hiva chi’n thusuimi tampite’n gingta uhi. Hinanleh lai giel tamtah te’n Pope Julius – I in December 25 dinga ana bikhiet ahi chi’n gen uhi. Tam bikhiet a um Ni poimaw pen Egypt ah kum 432 apat ana zang pan ua, England ah kumjabi 6 beikuon in ana zangta uhi. Tualeh Scandinavia gamkuol ah kumjabi 8 beikuon in ana zangta uhi. United States in Christmas ana mang jel uleh zong 1870 apat gam buppi holiday in ana puong pan hi. Laibu giel khat in Christmas pen kum 98 apat ana ki zang, hinanleh kum 40 jou a Christian te pawi thupi khat di’a puon hipan chi’n gen hi. Tuni tan in Christmas zah dan a gam gam ah ki banglou, zah dan chi tuom chiet in ki zang chiet hi.

 

A ni leh a ha pen dih in dihlou lezong, a poimaw pen hilou ahi chi I thei poimaw hi. Nang leh kei khiel a shi sa tan doh ki’a di’a hing pieng ahi chi khu a poimaw pen ana hi zaw hi. Ei lah zong mi tampi I pienni theilou ki um, hinanleh official a zah na ding a um chia, ani khat I bawl tawm ua, a pieng ka hi chi’a ikipah uh, tua bang ahi mai hi. Ei a di’a hingpieng chu ahi phot mai veh!

 

Thuhunlui leh Thuhuntha Kizop

 

A lam dang mama, Jesu pienthu I et leh hun peisa leh maban hun kizopna ngen, dih chet chet nalai. Kum bangja kihal tama leh Pasian thuchiem pen a tangtung lou um lou chi ensah hi.

 

A pien ding thu (Kum 1035 kihal)

 

• Isaiah 7:14 “Ngai in, nungah siengthou a gai dinga, tapa anei ding a, tualeh amin dingin Imanuel achi ding uhi”. (990 BC)
• Matthew 1:23 “Ngai un nungah siengthou a gai dinga, tapa a nei ding a, ami’n Imanuel achi ding uhi. Tua khu I kungah Pasian a um china ahi”. (42-50 AD)

 

Bethlehem a apienna (Kum 773 kihal)

 

• Micah 5:2 “Hinanleh nang Bethlehem Ephrathag (ga suong) Jada gam a tul tampite lah a ne ma nanleh chin, nang a kipat in kei a dingin Israel vaihawm ding khat ahing pawt ding hi. Ama kipatchilna, tanglai hun, kumtawn2 akipat ahita hi” (742-715 BC)
• Matthew 2:6 “Nang Juda gam a Bethlehem, Juda khopite lah ah na neupen vawt sih hi, nang a kipat vaihawmpa khat hing pieng ding ahi zieh in……” (42-50 AD)

 

Izipt apat hatdoh ahina (Kum 790 kihal)

 

• Hosea 11:1 “Israel naungeh ahilai in kana itta hi, Izipt gam a kipat ka tapa ka hand oh t ahi".(780-710 BC)
• Matthew 2:15 “Tualeh Herod a shi masang sie’n khun ah a um den tahi. Mangpa’n guolnei kam a, ‘Ka Tapa I zipt gam apat ka hand oh ta hi’, chi’a agen ahing tangtun theina ding in".

 

Judate’n Ana lam-etdan

 

Lengpa Ceaser Augustus (BC 31-14AD) vaihawm sungin Rome gam ahileh khantouna chi tuom tuom, (economic, politics, transportation, education, colonization) ah Middle-East gam buppi ana khupkhel uhi. A kim a pam ua jat-le-nam neu, political independence ana neite zong amau khutnuoi ah ana koi jou uhi. Tuachi hunlai in Judate’n zong vangsiet huoitah in a umna uh gamkai enkoltu General Pompei (BC 36) khut ah a political independence uh ana man suo uhi. Tuabang dinmun ngiem leh hamsatah a aum lai un, zawlneite genlawh bang in “Kumpi Messiah” hing pien diing tungtawn a zalenna leh suohtatna amu diing uh kinepna lientah nei in angahla mama uhi.

 

Jesu pienna tungtawn a zil khiet thei khen khat

 

Mary lungbuoi

 

Luke 1: 28. Kum 2000 ma sang lai in vansawlsieng Gabriel kichi khat in Jew nungahnou, tangval Joseph toh ki khamsa Mary kungah va kilah a, Gabriel in Mary kungah - ngai ding, tapa khat nei ding, a min dinga Jesu a phuo ding chi a genlai in Mary lungbuoi a, Gabriel kungah "tami bang a chi hi thei diei, pasal lah nei nailou ing a" chi'n dawng hi. Hinanleh a tawpna ah "Ngai in, Mangpa suohnu ka hi, na thu bangin ka tungah hing tung ta hen" chi'n thutanna bawl. Tuama bangin Jsu toh iki lamtuo ding chiengin lung awpkaina chi tuom tuom, tua mi, khumi lah ngawl nailo inga, tua ka sil bawl pen lah tawpsan ngam nailou ing a chi suonlam i nei mai thei, hinanleh Mary banga keima thu hilou in nangma thu bang hi zaw hen chi thei poimaw hi.

 

Joseph kidehna

 

A laisiemna, hilou, a melhoi zieh hilou, a hausat zieh zong hiteuh lou, hinanleh a dihtatna zieh a khovel hundampa enkol di’a tel a um, mi hampha Joseph kidezawna thupi hinamai jen e. Ji nei, ha kuo ving veng innsung khat a ki um khawm ding in, khatvei zong ki pawlpi lou chi hiel pen Pasian thupieh hinanleh juihah thouva ka chi hi. A phur tun tun hun bang tam van, a ji kawi a, a tawp ut vatun hun bang um sam di hia! Ji ki nei ding in luppi theilou ding chi pen sil namai hilou theisa ahi. Hinanleh Joseph pen kideh vevaw in Pasian thupieh tangtung sah ahi dan I thei chiet uhi. Kideh zawna pen guolzawlna leh lawchinna ana hi khinkhian dan ahi.

 

Bethlehem bawngbu ah

 

Luke 2: 1-7. Mary a gai ham laitah in Roman kumpi, Caesar Augustus thupieh dungjui a minkhum di'a a tenna uh Nazareth apat Bethlehem 65 miles (105 km) vel zawt in ni bangja e khat pei uhi. Bethlehem a tuntah un zuailah! a giehmun ding uh mun um talou, gan hon ki khumna inn ah bupawl them khat tunga lum in jan kho dap nuoi havai tah in um uh chi i thei uhi. Tua bang hun hahsa tah mai a hinkhuo a zah lai un khovel humdanpa ding nausen hing piengta, nau tuomna ding puonnem lah um lou, a sielna ding luoi lah um lou, a um sun gan annkuong ah khela tah leh duottah in sielta uhi. I lung sunga piengtha nuom in A pien apat A leitung dam sung nite genthei tah leh zumna tampi toh hing zang, i lungsim bawngbu i na hon nuom di uai? Ahisihleh nang dingin ka lungsung ah mun umlou chi'n i na nuol di uai?

 

Belempute kungah khantanhoi

 

Luke 2: 8-20. Nausen Jesu a pienzaw in jan dapnuoi a belamchingte kungah khantanhoi hil masah pen in um hi. Vansawlsiengte'n a kung uah, "Jau sih unlen, ngai un, michin a dinga thuhoi kipah huai mama khat ka hing puoh uhi. Tuni'n nou a dingin David khuo ah hundampa a piengta. Ama Khrist Mangpa ahi" chi'n va hil uhi. Vansawlsiengte a pei zaw un belampute'n a thuza bangun Bethlehem ah va pei ua, a kihil bang bang in va mu uhi. Tuachi'n a kungua kihil naungeh tungtaang khu a mumu teng kunguah a gen thangta uhi. Mi hausate hilou, mi neijoute hilou, belampute ma banga dinmun ngiemte kungah khantanhoi thu tung masa hi. Nei leh lam a lei ding ana hitaleh nang leh ke’n lei jou sih vai. Hinanleh michin a ding ahiman in i hampha uhi. Belampute ma banga i tangkoupi pi pi mai uh chilou i bawl ding um lou hi. Gingloute kung sese hilou, gingtu khat i hileh gingtu leh gingtu houlimna zong khantanhoi thu ma ahi jel jel kipha maw hi.

 

Suolam Mipilte vena leh Herod gamtatna

 

Mat 2: 1-23. Judate lengpa hing pienna hei sung a hiei? Suolam ah ahsi ka mu ua, ama be ding a hing pei ka hi uhi ………… Suolam mipilte’n nausen avehna tungtawn ua siltungte apat etsahna tampi um thei hi.

 

1. Pasian mute kkipum khawm uh – Suolam mipil kichite ahleh mipil mai hilou, gam sung lengpa leh ahsi lam siemte ahi uh kichi hi. Nang lengpa leh mipil chia hing ki chiemte hita leh naungeh khat veh dingin ka kuon na diei le? Tulai ham hileh kahaseh himai maw. Hinanleh Jesu khu koi hing hi ding ahiei, koi tapa ahiei chi thei uh ahi. Ahsi kilatdan apat tam nausen pen biehta ahi chi thei uh hi dingin gingtat huai hi. A hina uh, a dinmun sangtah mai uh koikhie in gam tuom tuom apat nausen be dingin hing kipankhie uhi. I hinkhuo a Jesu nei tah tah I hileh hattuom khat a um khawm na naah na chu Jesu kengbul a kungkhawm vaduom thei ding ihi. Hinanleh Jesu neiloute pen biehinn sungkhat a kikhawm nanlei aning akah a ang dou tam van in kikuun khawm theillou ding hi.
2. Jesu mapuina sangin Kumpi gingta zaw uh – A mu masah uh Ahsi pen gingta tah a ajuilai un, amai uah tawn ding deng, hinanleh tuana kihilna ahsi pen muongla in kumpi Herod dong dinga a ahing kisah lai un, sun chienga meilum a pui, jan chienga meikuong toh Israelte pui pa’n kilep mangsan hieu hi. Jesu nuo I juina ah gin-um tah a jui kipha maw hi. Kumpi Herod va bulbawl in Jesu pien thu va gen ta uh, zuai lah ama’u gingtat bang talou, kumpi Herod pen Gabriel in Mary akimupi a Mary buoi bangin buoi den ta. Tuachi’n mipite’n Herod inn nuosie in hing kipan kia ua, Ahsi in ama uh hing pui kia hi. I gam mangna pat ing khahlaw chiengin Jesu pen I ma pui ding in hing na ngah zing hi.
3. Ki ngaingiemna leh Silpieh toh Pasian bieh poimaw – Pasian biehna ah I pieh tam pouleh kipahna tam sem chi I thei chiet sa uh ahi. Mipite’n zong Jesu ngaungeh abiehna uah sana, begaw leh murrah te tawi in khupboh nguut nguut uhi.
4. Ki nuole lou ding in – Herod in “…. Naungeh thu kichientah in va kan khie unlen, na mu tah chieng un hing hilkia un, kei zong hing pei a ka hing bieh thei sam na ding in” chi’a a hahkhiet hinanleh mipilte’n a lunggel hoilou dan amang ua theita ahiman un ki nuole kia lou in lampi tuom juita uhi. Jesu toh iki lamtuo ma sang a I lampi jui leh I mu mu nuo a I lampi jui pen ki bang thei nawnlou ding ahidan en sah hi. Jesu I nei masang I sil bawl, I lutna jel, I tham ngeite te Jesu toh ikilam tuo nuo chia taisan thei tampi um mama ding ahi.
5. Izipt gam a tai mangna – “Thou inlen naungeh leh a nu pui inlen Izipt gam ah taipi tan, tualeh ka hing hil kia masang sie’n tuonah um den in, Herod in naungeh tha dinga sui ding ahi zieh in” chi Joseph mang a ki hilna ahi. Joseph zong thupha vateh lou in thoupai a kipan pai biatbuat hi. I tenna, I kho heina, I umna, I hind an te tuottha lei, naupangte hinkhuo a di’n a bitnai? Damna leh khantouna thei mun leh muol ahi nai? Thasa leh hagau lam a di’a jau huai theina mun ahi nai? Na ta te, na ji, na pasal bang chi bang hinkhuo zang chi na thei jou nai? Shina hankhu lam zuon zong anahi ta mai thei. Tuabang dinmun a ding a iki theileh I thaw hun hita china ahi.

 

Christmas hing tung ding toh kisai in a Ni, a Ha in buoi sih vai. Bawnsa leh vohsa te in buoi sih vai. Me a hul leh a poh ding chivel thu in hattuom Up ate kibuoi nawn sih vai. Eden huon apat Pasian toh ikizopna uh tansa zopmat kia dinga a pien apat a shitan genthei thuo, zum leh chilphi khum a um, I hundampa thuona te ngaisut in, mi hampha I hi dante ki thei in, Pasian kunga nuomthu tutna hun in zang va ui.