'Singtang gam aw ma suon jel in' chi ka thupi ahi - Manipur CM Biren Singh

Tahsa-Lungsim Kichimatna Siempha Di'n

Times News Network in Manipur Chief Minister N. Biren Singh kungah Manipur mipi - phaijang mite leh singtang mite kal ah tahsa leh lungsim a kichimat louna lientah um pen bang chi'n na zopmat sawm ei chi'a adoh lai un CM in "phaijang mite pen Hindu kana hi ua, reservation ka nei uh. Naga leh Kuki te ahileh Christian ana hi ua, free society ahi uh, tami ginna in kikhenna lientah ana tun a, tuaban ah politiciante'n amau mimal hamphatna ding khuolna in advantage lahna in ana zang tawn tung uhi. Majority community hina dawl ah kipia doh masat ngai in ka mu hi. Cabinet meeting zong hills a tam tah nei hiding a, ka thupi ahileh Hill Dists masuon jel in chi ahi dungjui in state mipite dei-le-ngaite enkai ding in muoldawn lam a tung mun mama ding kahi. Mipite dei-le-ngai kikuppi dingin field work ha bawl ding chi'n ka ministerte zong ha hiljouta" chi'n ana dawnbut hi.

Corruption Free District Awle Itup Uh

Chief Minister Biren Singh lamkai in tuni'n Manipur Cabinet in tuni (March 23, 2017) ni'n Anti-Corruption Special Cell chief minister secretariat a hon ding in kithukim ua, Congress solkal in ana pat department teng a junior level posts (grade-III & IV) direct recruitment interview zong sutzop nawnlou dingin lemsa uhi. Tam thutanna ahileh chipchil tah a suichet a hizaw a sutzop lou dinga kithukim uh hidingin gingtat huai hi. 

Manipur solkal vaihawmna toh kisai transparency leh accountability a umtheina dingin mi nautang khat pou in nehgu-tahgu toh kisai a tuakha leh thutut bawlna dingin tami mobile number  9402150000 zong mipi mu dingin tahlang hial uhi. Corruption toh kisai i tuakha leh video/audio record bawl a tamna mobile number kipia tungtawn a WhatsApp thei ding chidan ahi.

JACAATB Heelpat in umkiata - Singtang gam phattuomna di'n aw

Manipur BJP solkal in zumpi aluo apat sepkhiet masah pen dinga ana phuon dungjui un, CM N Biren Singh in UNCte deina bang in Senapati ah ki ngaingiem tah in kihouna va neipi a, 'gul luut ahi hi'n, mihing luut a shi lou' chi thupil bangma in a ki ngaingiem man UNC in nielguol a theilou in ni 139 economic blockade abawl lakhiet in um a, hinanleh a sil ngiet pen uh bang chi'a Biren leh a siekhon vaihawmte'n hing suveng ding uh chipen gen thei hinailou hi.

UNC toh nasep kim khat jou in, tu'n Manipur tumlam ah hing ki heikia panta. August 31, 2015 apat kum 1, ha 6, kal 3 leh ni 1 (ni 569) chinni March 22, 2017 ni'n a minthang Anti Tribal Bills chi'a singtangmite'n i minvaw uh - Protection of Manipur People Bill, 2015; The Manipur Land Revenue & Land Reforms (Seventh Amendment) Bill, 2015 leh Manipur Shops & Establishment (Second Amendment) Bill 2015 toh kisai a buoina genveng sawm in JACAATB lamkaite toh kimu dingin palai hing sawl hi.

India Danbu sunga bawng 371(C) Khil 1 &2 telsuina

Manipur State Assembly in singtang gam nawtkha ding thu-le-la khat a'ng bawl kha chieng un Hill Area Committee a panmun tute maw chitah in i mawsah jel ua, dawise-kause gen in i gen jel uh. Tam bang a genthei na ding lawm lawm a HAC in thuneina nei amah chi suikhiet leh adiin adeen a singtangmi kichi khat i hi ngal leh i tanvou umte i thei poimaw mama hi. Hun peisah ah, HAC tungtawn a sep ding bawl ding kilawm tampi seplou leh bawllou a umte zieh in i buai vazung ua, tamte zieh in HAC khu bang a hia chi teltui khiet utna toh tam laigel hing pieng ahi.

Economic Blockade Lahkhiet hita, aban bang?

Manipur chief minister N Biren Singh after taking the oath of office
in Imphal on Wednesday. (PTI)

Tuni, March 20 ni'n Manipur Chief Minister Nongthombam Biren Singh in BJP solkal nuoi a 1st State Assembly Session ah mipite pankhawmna toh ha li lam national highways a economic blockade pen lakhiet in umta. A ma lamkaina nuoi a solkal in sepkhiet kia dinga a tup ahileh Bill 3te zieh a hinna taan tunitan vuilou a um mi 8te tungthu genveng hiding ahichi'n lamkai peikhawmte maiah puong.

Manipur khangthu a di'a economic blockade saupen, ni 139 sungin Manipur phaijang leh tanggamte ah nasatah in ne-le-ta, thautui leh nichin poimaw te toh kisai buoina ana kituoh a, sawng khat lahteng blockade leh counter blockade zieh in communal clash umthei ding dinmun tanpha ah ana umkha hi. Economic Blockade lakhiet ahitoh kituo in UNC President Gaidon Kamei leh a information secretary te dannuoi a mat a a umna uapat thunung-thuma umlou dinga hakhiet ahiban uah, tam economic blockade zieh a Naga lamkaite tunga case bulkhum a umteng zong vailah zunthah bang mai a suhmang in um tahi. 

NRLM Series 2: Deen Dayal Antyodaya Yojana - Support Structure

Janni'n National Rural Livelihood Mission hing kipat dan them khat i gen ua, simtute apat lahlaw sahna leh aban thei utna um ahiman in gen zom lei uthuai isa.

I gensa mabang in National Rural Livelihood Mission pen Deen Dayal Antyodaya Yojana chi'a minvaw a umta ahi chi igen ua, India solkal nuai a Ministry of Rural Development tungtawn in National Mission Management Unit chi'n NLRM tungtawn in expert leh dedicated team in enkol uhi.

National Rural Livelihood Mission - Series 1

Modi lamkaina India phuolpi BJP solkal in vaihawmna a'ng tu uapat India pumpi a zawnna suhkiemna di'a bang chi'a ban kila ding chi nasatah in telsuina hing nei ua, Indian National Congress in anapatkhiet scheme tuomtuom te nasepdan leh bang tan a lawching thei ding chite hing suichien uhi. Tua scheme tuomtuom umsate apat a zilkhiet uh, zawlkhalna suhkiemna di'n National Rural Livelihoods Mission (NRLM) kichi hing pan khia uhi.

Tam vaiguon ahileh Manipur a district 2 - Imphal East leh Chandel ah kum 2 peisa apat implement in um ta a, tukum apat district dangte a zong extension a'ng bawl uh gintat ahi.

Lifting Economic Blockade: Manipur BJP Solkal Top Priority

11th Manipur Legislative Assembly kitelna March 4 & 8 in Free & Fear tah in um a, March 11 ni'a result kipuon nuo a ni 4 ni'n Nongthombam Biren Singh in Raj Bhavan ah Governot Dr. Najma Heptulla apat in Meitei ham chia vawt toh kichiemna neita hi. Ama ahile Manipur 12th Chief Minister ban ah Manipur khangthu a dinga BJP Chief Minister masa pen chiemte in a umta ding hi.

India Prime Minister Narendra Modi in February 25, 2017 ni'a Imphal a athugenna ah, "March 11 in result puon hi dinga, 13 chiah Holi zah hiding a, economic blockade in hing subuoi lou ding hi" chi'n ana gen hi. Tami a gena umzie ahileh BJP in govt hing form dinga, bailam tah a economic blockade lakhiet hiding chi a gen utna hiding in gingtat huai hi, ama kinepna sanga seat tawm muzaw ahiman un government form zekai kha ahi chipen muthei in um.

Manipur BJP solkal maban khim bang jing

~ Pupu Zou

11th Manipur Legislative Assembly (2017-21) vaihawmna tuding in  Bharatiya Janata Dal (BJP) te'n party dang lunghawl in kipei khu veng vung ua, solkal form thei ding dinmun in hing um ua, BJP Legislator lamkai dingin 2-Heigang assembly constituency apat telching Nongthombam Biren Singh telkheta uhi. Ama ahileh Manipur Chief Minister designate dinmun a koi in um lellel hi.

I theisa mabang un, BJP solkal ahileh Naga People's Front (NPP), National People's Party (NPP), Lok Janshakti Party (LJP) leh Independent khat kigawm a siemkhiet ding ahiman in, tambang coalition government pen a maban a a tua ding sil tampi um zing ahi chizong i thei sa hi.

BJP leh Congress te Kinepna Pahcha - NPP, NPF, LJP, Ind. AITC

BJP leh Congress te party neute hel in a buoi in buoi uh. Party neute lah tulai nungah noute bang a kiliensah vawt uh. Iki ngai dingleh khi/bilba/tau nang leisah di chite dandeu a NPP, NPF, LJP, AITC te a tangvalpa uh BJP leh INC kunga kiphin uh.

*BJP nungah heldan en masa vai:* - BJP in govt a form zaw na di'a NPP 4 leh NPF 4 ban ah LJP 1 leh Independent 1 a kingaipi teitei ngai.