Janni'n National Rural Livelihood Mission hing kipat dan them khat i gen ua, simtute apat lahlaw sahna leh aban thei utna um ahiman in gen zom lei uthuai isa.
I gensa mabang in National Rural Livelihood Mission pen Deen Dayal Antyodaya Yojana chi'a minvaw a umta ahi chi igen ua, India solkal nuai a Ministry of Rural Development tungtawn in National Mission Management Unit chi'n NLRM tungtawn in expert leh dedicated team in enkol uhi.
NRLM kipat apat tunitan in India pumpi ah numei SHG 3,604,188 siemkhiet um ana umta hi. Tamteng lah a Manipur a 479 um a, Arunachal Pradesh ah 134, Meghalaya ah 1990, Mizoram ah 2132, Nagaland ah 2615, Sikkim ah 1117, Tripura ah 3762 leh Assam ah 90,780 umta hi. Ta zapi bang a chi etkol ua, tunitan a puosie khat zong umlou chipen nidang chia gen dingin koi phot talei, State chin a bang ki vaipuo uh chi thei poimaw isa ahi.
National Level ah National Mission Management Unit (NMMU) kichi um a, State level ah State Mission Management Unit (SMMU) chi'n um sawn hi. Tam SMMU pen ei state ah Manipur State Rural Livelihoods Mission (MSRLM) chi'n Department of Rural Development & Panchayati Raj Institution, Government of Manipur nuoi ah um a, Secretariat North Block ah office nei uhi.
Tu tadi in ahileh Resource Block chi in District 2 - Imphal East leh Chandel district a block 4 ah na sem uhi. Tamna block te ahileh Imphal East - I & II CD Block, Tengnoupal leh Machi TD Block te ahi. SMMU nuai ah District Mission Management Unit (DMMU) kichi umkia ding a, tuami nuai ah Block Mission Management Unit (BMMU) chi hing umkia ding hi. Tam DMMU ahileh a field a nasem tahtah te hing hiding hi. Tam DMMU leh BMMU a dingin district extension a bawlnate uah staff lahna hing um ding in i gingta uhi.
Janni'a i gen uh, NRLM tup-le-ngiim pen numeite dinmun suh sangna ding, leadership quality build up ding chi ahi dungjui in, numeite dinmun dopsangna ding a poimaw penpen proper institutionalization (kisutah a numeite pawlpi siempia ding) chi a peipi uh ahi. Tam numei pawlpi kichi Self Help Group (SHG) tungtawn in lamkai kizilna, sum-le-pai peipung dan, mimal mizie (personality) siemphatna chivel umtheina dingin training tuomtuom tanlou in pezing uhi.
Manipur ah tu dinmun in umnai sih nanleh, NRLM ana kipat masahna Andhra Pradesh, Bihar leh state dangdang ah kho sung khat a SHG tampi ki gawm in Village Level Federation (CLF) chi tampi form in ana umta a, tua federation tungtawn in govt schemes - MGNREGA, IAY, Ration, Swachh Bharat Abhiyan chite vel ahi ding bangtah in numei pawl thahatna toh peisah theita uhi. VLF tungah VLF tampi ki khaikhawm in Cluster Level Federation leh Block Level Federation ban ah District Level Federation chi tanpha nei state zong umta hi. Tam numei ngen kipawlna federation pen district administration te'n zong nasatah a kithuopi leh a thu uh ngaikhe mama ahidan uzong muthei in umta hi.
No comments:
Post a Comment