Economic Blockade Lahkhiet hita, aban bang?

Manipur chief minister N Biren Singh after taking the oath of office
in Imphal on Wednesday. (PTI)

Tuni, March 20 ni'n Manipur Chief Minister Nongthombam Biren Singh in BJP solkal nuoi a 1st State Assembly Session ah mipite pankhawmna toh ha li lam national highways a economic blockade pen lakhiet in umta. A ma lamkaina nuoi a solkal in sepkhiet kia dinga a tup ahileh Bill 3te zieh a hinna taan tunitan vuilou a um mi 8te tungthu genveng hiding ahichi'n lamkai peikhawmte maiah puong.

Manipur khangthu a di'a economic blockade saupen, ni 139 sungin Manipur phaijang leh tanggamte ah nasatah in ne-le-ta, thautui leh nichin poimaw te toh kisai buoina ana kituoh a, sawng khat lahteng blockade leh counter blockade zieh in communal clash umthei ding dinmun tanpha ah ana umkha hi. Economic Blockade lakhiet ahitoh kituo in UNC President Gaidon Kamei leh a information secretary te dannuoi a mat a a umna uapat thunung-thuma umlou dinga hakhiet ahiban uah, tam economic blockade zieh a Naga lamkaite tunga case bulkhum a umteng zong vailah zunthah bang mai a suhmang in um tahi. 

Biren lamkaina BJP solkal in UNCte a'ng thuzawna tung uah michin ki nakhe huai bang in kilang nanleh a tahtah hing suoden ding amah chi lung-awpkaina kinei chiet nalai hi. A ki thukimna uh, thulu lienpen khat toh kisai kihouna umkia ding chi ahiman in, tuomi kihouna hing lawching den tahtah ding amah? UNCte silphuut - Naga gam sukha, Nagate dong lou a govt hi in koi hitaleh a ut ut ua khoithei lou ding, Nagate dohna umlou a nasepna District thate phiet khiet kia ding chi ahiman in, tami UNC sil nget pen mawh mei a beilou ding leh solkal khat in sil ana bawlsa, mipi atam zaw in ana kipahpi suh beikia chi pen beilam mama lou ding ahidan theisa hi.

UNCte economic blockade subeina dingin district 7te phiet in umta leh district 7 mipi teng kiphin ding, UNCte kiphin sanga huoise zaw ding, phiet khiet ahisih leh UNCte'n economic blockade hing sunzom kia thei jel.

Tam bang kawmkal a CM N. Biren Singh leh a kai zatam te'n bang chia bang solution hing khuot khe ding, bang point teng toh UNCte hing thoidam ding chipen gen hamsa pikhat ahi. Pu Biren in a lamkai hoi hina nasatah a ang talat kul dinga, Manipur a teng Meitei, Pangal, Kuki leh Naga te kal a vaihawm a'ng siem mama ngai ding hi. A solution umthei dinga gingtat ahileh kum tampi singtanggam nelsia leh puolou a um pen BJP solkal in nasatah a a'ng ngaisah leh special development package a'ng bawlpieh ngai a, ADC power 100 percent devolution leh HAC zong ahi ding bang tah a power a tawitheina ding uh lampi a siemthei leh maban a tam bang silte um kia lawm lawm dingin gingtat huailou hi.