Chief Minister Biren Singh lamkai in tuni'n Manipur Cabinet in tuni (March 23, 2017) ni'n Anti-Corruption Special Cell chief minister secretariat a hon ding in kithukim ua, Congress solkal in ana pat department teng a junior level posts (grade-III & IV) direct recruitment interview zong sutzop nawnlou dingin lemsa uhi. Tam thutanna ahileh chipchil tah a suichet a hizaw a sutzop lou dinga kithukim uh hidingin gingtat huai hi.
Manipur solkal vaihawmna toh kisai transparency leh accountability a umtheina dingin mi nautang khat pou in nehgu-tahgu toh kisai a tuakha leh thutut bawlna dingin tami mobile number 9402150000 zong mipi mu dingin tahlang hial uhi. Corruption toh kisai i tuakha leh video/audio record bawl a tamna mobile number kipia tungtawn a WhatsApp thei ding chidan ahi.
Manipur a nehgu-tahgu hatdan leh sepna umte zong bazaar a me zuo a ki zuo bang hial a akigen veng vung lai a tambang solkal in pan a'ng lahpen patat huai ichi lou thei sia, bang a'ng hi phuot ding uai chilou in, mipi in nungthuop thei tan a i nung thuop uh poimaw ding hi. Mi nautang tellou in solkal siltup pen bangma tan tunglou ding chipen theisa ahi dungjui in, Tuailai Pro1434 bang bang corruption doudalna tampi i siemkhiet be uh poimaw ahidan kilang hi.
India Prime Minister Narendra Modi leh akai zatamte'n India a corruption leh back money suhkiemna dingin demonitazation ah nasep hing pan ua, tuachi'n degital transaction nasatah in hing promote kia uhi. India sungah a support toh, support lou toh um zeng zung, digital transaction umtaleh a tax kipia chi'n BJP nasep support loupawl in tangkoupi zing ma uleh Modi silbawl support tamzaw ahidan state tuomtuom ah BJP in a puonbu uh kehlien deudeu uhi.
Election khuon vote campaign lai apat in BJP in corruption nasatah a doudal ding chi'a ana tangkoupi dungjui un nasep hing panta ua, solkal in tambang nasep a'ng patthei ta a ahileh dem leh gense meilou a, ahithei tan a kithuopi khu i bawl ua hoi hilou amah?
No comments:
Post a Comment