Manipur BJP solkal maban khim bang jing

~ Pupu Zou

11th Manipur Legislative Assembly (2017-21) vaihawmna tuding in  Bharatiya Janata Dal (BJP) te'n party dang lunghawl in kipei khu veng vung ua, solkal form thei ding dinmun in hing um ua, BJP Legislator lamkai dingin 2-Heigang assembly constituency apat telching Nongthombam Biren Singh telkheta uhi. Ama ahileh Manipur Chief Minister designate dinmun a koi in um lellel hi.

I theisa mabang un, BJP solkal ahileh Naga People's Front (NPP), National People's Party (NPP), Lok Janshakti Party (LJP) leh Independent khat kigawm a siemkhiet ding ahiman in, tambang coalition government pen a maban a a tua ding sil tampi um zing ahi chizong i thei sa hi.

BJP in election campaign lai a Vision Document 2017 chi'a government a form uleh sepkhiet dinga ana gen uh point 10 te koi dan khat in koi talei, government form zaw toh kituoh a a paltou dinguh sil tampi um a, tuate'n BJP lamkai a coalition government detdou ding leh kipalpua ding tungtang ah gen-le-sah nei mama ding un gingtat huai hi.

BJP toh aki zopna uh umtheina ding a NPFte silphut ahileh a written a mu hichet sihma nanleh Ibobi lamkaina Congress solkal in Naga mipite donglou a district a na siemkhiette tungthu gen a hing nei teitei ding uh chipel nialguollou hing hi ding hi. Tuaban ah, telching a um mi 4te zong cabinet rank tan chiet pieh dinga phutna nei nalai ahiman un, BJP solkal  dinzaw na di'a NPF poimaw ahiman in, BJP a dingin sil bailam hing hilou pouma ding hi. Tuaban ah, India PM Narendra Modi in Imphal a a thugenna ah BJP in solkal a form leh ni 17 sunga UNCte economic blockage lakhiet hiding achipen in valley mite bilsun ahiman in, tam pen zong sil bailam hing hi khollou meithei ding hi.

A dengdel mama dang khat ahikia leh, NPP toh akizopna uh ahi. BJP in NPP lung a suina lam ua NPP sulungkim lou thei zing dinmun ah ding jel uhi. NPP lah poimaw, NPF lah poimaw. Tam gel kal a nasep luong dildial a ang pei dingdeng ding pen BJP a di'a meisa tuonkha toh kibah theina khat ahi.

Election kisahkholna nasatah a umlai a phaijang mite'n BJP toh UNC leh NSCN(IM) a etbeh zing sa uh ahiman in BJP nasepna pen phaijang pawlpite'n chipchiil deu a ankai ding uh ahiman in BJP solkal a di'a challenge lien mama khat suokia jel ding hi. 

Tam a tunga igente ahileh pressure um zing leh tu mama a zong um theite ahi. BJP in sepkhiet dinga ana puon uh, Vision Document 2017 chia point 10 ana bawlte uh et in term khat sunga sepkhiet zaw ding gingtat huailou a, tuami zong absolute majority hilou ahiban ah innsung a siemtup na ding utoh, a program policy te implement na ding toh BJP a dinga sil bailam hilou ding ahi chipen chiengtah a genthei in um hi.

BJP Manipur Pradesh in Vision Document 2017 a Action Point a akoite uh ahileh Manipur gamgi, tawndan leh a mipite humbit ding; Innsuon a nasepna nei khat chiet um sah tum ding; BPLte kunga Health Insurance pieh ding; Innsuon a tuidawn ding pipe a luonlut sah ding; Inn neiloute inn neisah ding; District chin 4 lane road toh zop suo ding; Numeite graduation tan a laisimna athawn a pieh ding; Fake encounter leh corruption case suijui a, mawhna neite gawtna akituopi pieh ding; Blockade free Manipur ahina dinga Highway Protection Force siemkhiet ding leh Manipur khu India pumpi a dia Eco-tourism munpi a siemkhiet ding chite ahi.

Tam teng niainuai toh insung ang siemtup jou na di uai? BJP lamkai solkal in bangtan vai a'ng hawm jou na di uai chipen etkham ching mama khat hing sua ding hi.

Manipur Unit NPF Manifesto: 11th Manipur Legislative Assembly election 2017 a umding toh kisai a Manipur Unit Naga People's Front in Manifesto ana bawlna uah Indo-Naga Peace pprocess and political dialogue toh kisai acceptable leh honorable solution um theina di'a nasatah a pan lading chi'n kitahlang masa hi.

Tuaban ah Indian Constitution Article 371 C tungtawn a Hill Area Committee khu hoideu a siemphat leh nna sepsah ding chi a tupte lah ua khat hikia a, ahithei tan a Tribal Land Ownership pen kep bit ding, culture leh tradition ban ah khangthu pen kepbit ding chi ahi.

Tuaban ah NPF manifesto a bang dang khat ahileh The Manipur Legislative Assembly (Hill Area Committee order, 1972 section 6; sub-section (1) & (2) dungjui a Hills leh valley districtte a seperate budget a um thei kia na di'a panlah ding ban ah, tribal rights to kisai sukha thei ding bill himhim hoideu a etkai ding chite ahi. A poimaw mama dang khat ahileh Manipur hill area tenga ADC ahi ding bang a suhhat ding chi ahi.

Tam teng ahileh Ibobi lamkaina Congress solkal in ana nelsia leh dal thei dal maw a ana dal teng ing talat ahi. Tam teng ban ah sector tuomtuom a panlah dingdan chite tamtah um nalai hi. Manipur singtanggam kepbutna ding ngen ahi a, Manipur valley mipite leh solkal in hajatna lienpi toh ana et zing uh ahi. Tutung NPF dinmun pen kiphinna ding a chance hoi mama dingmun a dingkha ahiman un, tamna a tup-le-ngiim te uh chitah deu a a'ng peipi uleh BJP a dingin lungvai na khawm ching mama ding hi.

Thukhupsitna: Tam bang dinmun dengdel tah a ding uh ahilam kithei mama uh ahiman in, maban a absolute majority party um theina di'a lampi hing siel ding ua, suongnoute tanpha khule lou hing neilou ding ua, Congress e, bang party e chi umlou mi hing kaikhawm sawm ding uh ahi chipen ginlel huai vawtlou khat ahi. Interest kibang lou toh solkal run khawm chipen, nupa kituohlou janchia ki elngat, ahivang a lah lupkhawm teitei ngai chidante dinmun a um sang a, tuabang interest ibahpi loute paikhietna ding a, amau ua pat hisih nanleh valley CSO tuomtuom apat zong pawl dangte sensitization hing um thei nalai ding ginlel huai lalou hi.

Tam teng liailuai lah a BJP makai Manipur solkal a hinna dingin "Common Minimum Program" a nei uh poimaw ding hidan in kilang.

Admin,

ZOLENGTHE

Connecting the Zo people