11th Manipur Legislative Assembly kitelna March 4 & 8 in Free & Fear tah in um a, March 11 ni'a result kipuon nuo a ni 4 ni'n Nongthombam Biren Singh in Raj Bhavan ah Governot Dr. Najma Heptulla apat in Meitei ham chia vawt toh kichiemna neita hi. Ama ahile Manipur 12th Chief Minister ban ah Manipur khangthu a dinga BJP Chief Minister masa pen chiemte in a umta ding hi.
India Prime Minister Narendra Modi in February 25, 2017 ni'a Imphal a athugenna ah, "March 11 in result puon hi dinga, 13 chiah Holi zah hiding a, economic blockade in hing subuoi lou ding hi" chi'n ana gen hi. Tami a gena umzie ahileh BJP in govt hing form dinga, bailam tah a economic blockade lakhiet hiding chi a gen utna hiding in gingtat huai hi, ama kinepna sanga seat tawm muzaw ahiman un government form zekai kha ahi chipen muthei in um.
BJP in government a form leh akin lam a UNC te economic blockade lakhiet hiding chia ana chiem dungjui un, tuni Chief Minister in kichiemna a neizaw in presste mai ah Economic Blockade lakhiet pen BJP top priority hiding chi'n puonna nei hi. A hi a hun ding puong chet sihma nanleh Deputy Chief Minister Shri Y Joykumar Singh in zong BJP solkal nasep masah pen ding khu UNC Economic Blockade lipkhiet hi tadi ding chi'n gen belap hi.
A mualliamta Okram Ibobi Singh lamkai Congress solkal in Sadar Hills district puon hiding chi'n muolsuong tanpha ana gielsah ua, tuami thu in munchin jelsuo ahiman in United Naga Council te'n Naga te'n pupa khang apat ka toupha uh kagam uh suhke ahisih ding, suhke ahi ding leh government luite toh kilemna thukhun umsate dungjui a Naga mipite doh masat ahi ngai ding ahi, tuobang a umlou leh hithei lou ding chi'n National Highway 2 ah October 31, 2016 jankim apat in Economic Blockade ana pan ua. district tha siemkhum a hing um kia in, a lamkaite uh mat leh High Court in illegal chia a puon nung in zong bangma jau neilou in sumkuong chiengkei in ana det zing uhi.
BJP Central solkal leh state solkal in bang chi lampang a pan hingla ua, bang thu toh a'ng thoidam ding uh adiai chipen gen hampi ahiman in michin bildaw thupi pen ahing suo dohta hi.
UNCte silphut bang a BJP solkal in district siemkhiet a umsate hing phelkia ding a di uai? Ahishleh Kangpokpi leh Jiribam district tegel tungah a'ng tung diai? chipen gen thei hinailou hi.
No comments:
Post a Comment