Bill 3te nua-etkiana: Lihli kibang sunga Ju tha in Solkal mawhna Sawpsieng

~ T. Zamlunmang Zou @ Pupu Zou

Gen minthang bill thum - The Protection of Manipur People Bill, 2015, the Manipur Land Revenue and Land Reforms (Seventh Amendment) Bill, 2015, leh the Manipur Shops and Establishments (Second Amendment) Bill, 2015 te 31st August, 2015 ni'a Manipur Congress solkal in dan dihlou tah leh singtangmite nelsia a ana pass zieh in Lamka khopi ah kiphinna huaise tah ana tung. Lamka mei hilou, singtangmi teng ina pangkhawm ua. Mi 9te'n shina tanpha tua in mi 8 te'n dam sunga baipi ding liemna atua ban uah, mi 48 te'n nasatah in liemna ana tua uhi. Tuatham lou in singtangmi Congress MLA teng boycott puonkhum in ana um ua, society apat pampai tanpha ina bawl uhi. Lamka khopi sunga government office poimaw tamtah haltum ahiban ah mimal inn zong hunkhop haltum in um hi. Hinanleh Biren Singh lamkai BJP solkal in lampi hing sui in tuni Kum 1, Ha 8, Kal 1 leh Ni 3 chinni, a ni 618 ni, May 10, 2017 in Kilemna Thukhun Lamka khopi a um Mizo People's Convention Hall ah bawl thei in umta hi.

JACAATB Heelpat in umkiata - Singtang gam phattuomna di'n aw

Manipur BJP solkal in zumpi aluo apat sepkhiet masah pen dinga ana phuon dungjui un, CM N Biren Singh in UNCte deina bang in Senapati ah ki ngaingiem tah in kihouna va neipi a, 'gul luut ahi hi'n, mihing luut a shi lou' chi thupil bangma in a ki ngaingiem man UNC in nielguol a theilou in ni 139 economic blockade abawl lakhiet in um a, hinanleh a sil ngiet pen uh bang chi'a Biren leh a siekhon vaihawmte'n hing suveng ding uh chipen gen thei hinailou hi.

UNC toh nasep kim khat jou in, tu'n Manipur tumlam ah hing ki heikia panta. August 31, 2015 apat kum 1, ha 6, kal 3 leh ni 1 (ni 569) chinni March 22, 2017 ni'n a minthang Anti Tribal Bills chi'a singtangmite'n i minvaw uh - Protection of Manipur People Bill, 2015; The Manipur Land Revenue & Land Reforms (Seventh Amendment) Bill, 2015 leh Manipur Shops & Establishment (Second Amendment) Bill 2015 toh kisai a buoina genveng sawm in JACAATB lamkaite toh kimu dingin palai hing sawl hi.