KHAMTHEI BAWLTE KU’A LAITHOT

 

 

Janni NDTV news report khat a kigen Jaipur a tehsepu kum 50 a upa Dinesh Dwivedi, laisiemna lam a PhD degree ni vei jou hial khat khutdaw genthei tah a hinkho zang in um hi. Ama’n ha teng in school teacher pension sum Rs. 35,000 tunitan in sang zing, hinanleh khutdaw in ahinkhuo zang hi.

 

News ten bangzieh a tuabang hinkhuo zang a khosa ahiei chi’a akan suina uah, a tapa kum 25 a upa, school kaipei nawnlou, khamthei bawl toh umkhawm ua, a tapa in sum demand bawl in a pienna pa zong zataat jou nawnlou khop in sing-le-suong tanpha zang in a pa ana soisah zing ahidan mukhia uhi. Hinkho nuomtah zang a a pension toh hing thei ding hina jenpi lampam a khutdaw leh zum huai tah in hinkhuo zang in um hi.

 

Churachandpur district sungah tel tah in kisui hitaleh innsung bang ja, nu-le-pa bang ja niteng hinkhuo lim-le-kipah a zanglou bang zatah a um ta diei? Eima innsung a security guard bang mai a duty paw gige mi bang jatah I um di uai? I neisa, nihteen-puonsil, um-le-bel, sing-le-suong tanpha zalentah a eima innsung gel gel a koi ngamlou bang zatah I um di uai? Tuathamlou in, nit eng a I lawkhiet, nute’n a kawng ua a zee tinten na ngawn khawmthei bawl tate giinna zieh a zankhe va guo bang zatah I um di uai? Tam bang a hinkho zang innsung leh nu-le-pa te hepi huai chilou I bawlpie thei lah bangma um sam lou, a tuakha te’n bou in thei vai, hinaleh a tuokha nailoute’n tam bang dinmun hamsa pen bang chituh a genthei huai a tai chi gel a gel but hilou hi.

FDI: India Innpi buoina

 

 

Khovel a democracy lien pen vaihawmna Innpi matal mawsah Foreign Direct Investment (FDI) kichi bang a talawm a chi simtute'n thei lei khantouna khat hi di dan hi. India innpi winner session kipat chil apat FDI ziehin tunitan vaihawm theilou in buoi zing uhi. Opposition party BJP leh a kaizatamte ban uah, ruling party UPA a tel Samajwadi Party leh Bahujan Samaj Party te’n nautang sukha van man ‘multi-brand retail’ tunga zah ahiding deilou in nuol uhi. Bharatiya Janata Party (BJP) lamkai Sushma Swaraj in agenna ah ‘govt in lou bawlmite a di’a phatuom ding chi nan uleh international experience ah tuo bang FDI ziehin um nailou’ chi. Lalu Prasad in ahileh “BJPte’n hoisa uh, hinanleh kum 2014 election ding galdotna zieh a a nuol uh ahi” chi daih jel. Tam thu ziehin vaihawmna pen kalsuonlou in tawlnga den hi.

 

FDI ahileh gam dang company in gam khat sil pienkhietna (production) ahilou leh sum-meet bawlna (business) toh kisai a a meet kinepna toh sum-le-pai, tha-le-zung senga pan a’ng lahna, ahisihleh a umsa company khat a’ng lei uh ahilou leh a nasepna a’ng kelet beh uh china ahi. FDI kibawlna san ahileh semtute halaw tawm zaw a pieh thei ahiban ah solkal a tax sunglou a tuami gam a kiveina jat tuom tuom direct a bawl thei in um hi. Automatic Route kichi tungtawn in gam dang company te India solkal leh RBI in phalna apieh masat seselou in zong hing lutthei uhi. FDI in a huomkha lou khen khat ahileh Atomic Energy, Lottery Business, Gambling leh Betting, Business of Chit Fund, Nidhi Company leh a dang tampi um veve hi.

Manipur Extra-judicial Killing

 

 

Extra-judicial killing kichi umzie ahileh dan dungjui a thutanna umlou a govt sepaite’n mi a tha uh genna ahi. Manipur a tam bang a um mun ziehin Supreme Court zong mitsiip gawp hita di hi ven, state govt in a etkaidan a pompia lou dan ban ah Gujarat leh Maharashtra-te toh tekhinna pe hial a, court in enjui ahita dan zong gen.

 

PIL tungtawn a record kimu dan iin Manipur ah extra-judicial killing kum 30 sungin 1526 umpha ban hi. Ha tengin Manipur ah fake-encounter leh extra-judicial killing chi news ah tuong tawn tuung ahiman in Manipur in helpawlte a etkoldan human rights nasatah a sukha ahidan India a thukhenna sangpen Supreme Court tanpha toh kha hita hi. Apen Court nasan in fake encounter um kha jel ahidan puong khe hiel uhi. Helpawlte’n police leh paramilitary forces tampi that ahi chi nial guollou in dih hi, hinanleh govt sepaite’n tuate zieh a extra-judicial killing um ahi chi’a kilepna a nei jel pen dih bilbel lou ahiban ah tuolthat toh ki bang ahi mai uhi. Nautang te pen them khat ginmaw zieh a a hinna tan lah chipen khovel in zong pum theilou ahiman in I lah a tam bang a’ng tun kha ding bang chi’n pan lah in ki veng theina lampi a um diei chi ngaisut tham ching hi.

NAUTANG BITNA LEH POLICEte MAWPUOHNA

 

 

Gregorian calendar sungjui in December 4 ahileh kum khat a ni 338na (leap years adi'a ni 339na) ahi. Kum beina ding ni 27 um ta giep hi. Tualeh Lungdampawi (Christmas) tunna ding ni 20 mei mei umta. Gingtu Christian te adi'a kum khat kinepna hun zang ding a ikisah lai un, i gam lei tang - khristian te luodimna mun ah nautang bitna (social security) leh zalenna in mun a nei nai? Mimal khat in I gam sungah muonna leh bitna nei kisa deu in a hinkhuo a zang thei nai chi ngaisut tham ching hi.

 

'Universal Declaration of Human Rights' Article 22 in economic, social and cultural rights toh kisai mimal zalenna tangkoupi in ana nei hi. Ne-le-ta suina (Economic) leh cultural rights pen thu tuom in koi phot talei, social security pen I gam in poimaw in ki lang hi. Lamka khopi sung na ngawn ah zong mi khen khat kholai a vah chiengin ahpi dah bang kuau kuau in bit kisa lou hileh kilawm in um hi. Gam nuom leh gam khangtou hi theina dingin mimal khat chietin bit kisahna leh zalenna tah a gamtat thei poimaw hi.

A Ni leh a Ha in buoi sih vai

 

NANG LEH KEI DI’N ZAN HAVAI NUOI AH A PIENG

 

~ T. Zamlunmang Zou

 

Christmas Background: Khovel pumpi a pawi lien pen, Christmas ahileh Jesu pienni ahi chi theilou tam nawnlou hinanleh “December 25 ni’a Jesu pieng tahtah ana amah” chi dohna bei ngeilou hi. Kum 2000 peisa a Jesu pieng hinanleh A pien apat Christmas kichi ana ki zang pei hilou hi. Ahitaleh nang thei dan in December 25 ni’a Jesu pieng ahi  nai le?

 

Christmas chi’a sil I kipieh tuo, in-chei, Christmas tree chivel Jesu pien ma sang peh peh a ana ki zang ana hita bou hi. Hinanleh tumlam gam a pupa tawndante Christmas hun ana bikhiet utoh kituo tou tou ahiman a ki zangtou tou kha ana hi mawh hi.

EXAM HALL IN BIEHINN KIZANG TAMAI!

 

 

Tumlam gam a biehinn tampi club hall a ki zangta chi thuthang I galza chieng in I lunggel tuom jel. Tun ahileh western countries hinawnlou, I pienna gam Manipur ah exam hall in biehinn ki zang chi thute za in hing um ta. November 27, 2012 ni’a Manipur Teacher Eligibility Test (TET) laivuonna ah New Chekon a um Covenant English School huonga um Reformed Presbyterian Church sung thanghuai tah a zah in um hi. Tuana skul headmasterpa’n BOSEM thupieh dungjui a zah ahidan a hattuom theisah chi chi ahiban ah RPC hattuom in thusuo a bawlna uah tuban tam bang gamtatna tawpsan di’n a kisaipite mawpai in ngetna bawl chi ahi niing nieng hi.

 

Ngaisut tham ching khat – Hindu, Muslim, Bhudhist leh sakhuo dang khat kikhopna tuo bang sil tung hileh tuachi ningnieng a koi ahi diei? Press release mai in a ki chai diei? Tulai ham hileh meisi pah lahlah jieng inte. Christian sakhuo thugin “na lungthahna ni in tumpi sih hen” chi jui a kinei ihi di uai ahileh leh eilam a dihlouna a um zieh a tangkou ngam lou I zaw diei chi ngaisut tham ching hi.

Laivuonna Kipan, Mei Duhdahlou Kipan

 

A PEILOU CHIA MIT, A PEI CHIA VAHLOU

 

Manipur electric duhdah lou ahi chi pen alien-aneu, a te-akhang in I theisa uh ahi. Hinanleh kumtawp laivuonna hun chieng beh in lai sim theina ding in hing vah leh chi mi chin innsung a kigen tampen khat ahi. Manipur meivah ahileh “a pei lou chia vahlou, a pei chienga zong vah lou” chi thei phiel in um hi. A duhdah lou pen thukhat hitaleh, a vah sun sun chieng beh in zah thei ding in vah leh dei huai chilou ngal gen di bei hi.

 

Electricity kichi ni chin hinkhuo a di’a poimaw teng lah a chi khat, gam khantouna dinga poimaw, meivah umlou a industry um theilou, nasepna matal theilou, laisimna pei zang theilou, hinkhuo kitawl theilou, hinkhuo um zie umlou chi’a min a genlai un Manipur, adieh in hill districtte ah a pei sun sun chi’a zong laisimna zah theilou hi nalai hi. A vah sun sun le zong dahkal khat zong vah joulou hinalai.

A HINA BANG A POM DING IN!

Khovel ah mi piengsuol (disabled) hilou, piendantuom deu (differently abled) billion khat val um, khovel pumpi mising 100 lah a 15 (15%) pen mihing piendan tuom deu um hi. Kum tengin December 3 pen “International Day of Persons with Disabilities” chi’n united Nation in ana zang jel. Tukum thupi ding ahileh “Michin a di’a kituhlut theina society ahi theina di’a a dangtu umte pampai ding” chi ahi.

 

Piengsuol I na chi jel uh, tulai in social work profession a piendantuom deu chi’a minvaw mihingte ahileh I society sungah etdan khat in ana ki en zing hi. Mihing khat pen I saidan, I chiil dan leh I thumop dan in khanglien nuom hi. Mihing lung venglou khat ngol houpi zing lechin ngol deu deu, pil houpi lechin lung venglou hinanleh bangtan e khat in ki henna nei thei hi.

TET LEH TRIBAL STUDENT UNION

Teacther Eligibility Test laivuonna November 27 ni'n Manipur state sunga district capital teng ah um ding chi hileh kilawm awm tah, Imphal khopi sungah ki bichil tah in um ding chi ngaita. Manipur govt sai dan tah hileh a exam gentalou a form zong Imphal a i va lah thaw uh ngai nalai, hinanleh Joint Committee of Hill District Students’ Organisation (JCHDSO) a pang khawm Zeliangrong Students’ Union Manipur, Senapati District Students’ Association, Churachandpur District Students’ Union, Naga Students’ Union Chandel, Tangkhul Katamnao Saklong leh Kuki Students' Organisation te pan halahna ziehin district capital chin ah form mu thei in hing um hi.

 

JCHDSO in ana demand tangpi ahileh exam centre ban ah application form te Imphal mai hilou a district capital teng a koi ding chi hinanleh exam centre pen tukum adi'n phutjoulou ua, hinanleh kum kia chieng apat district capital teng a nei hitading chi govt apat written in kilemna nei thei uhi. Tua bang kal ah All Tribal Disable Union Manipur in a lang khat ah ST leh SC te adi'a mark percentage ki bikhiet 45 leh 50 apat 5 percent a consession bawl sah ding leh ama'u a di'a travelling allowance ban ah exam hall a tawm a bawl sah ding in ana phut uhi.

Christmas hun ang nai chieng in…!

Ni-le-ha te hing ki hei in, ni suo leh tum dan te’n phalbi lunghel hing kuongsah kia panta uh chi I thei chiengin Christmas ahing naita chi I thei chiet uhi. Christmas ahing nai chiengin mun tuom a um, nu-le-pa, tu-le-ta te’n inn lam zot kal ngahla ua, inn mun a um naupang neu nou noute’n van tha nei kal ngahlah in a nu-le-pa te uh pang sug kipan ta uhi.

 

Tam hung chiengin kinepna ding bei, ama khelna zieh hilou, a ut man zong hilou, a deitelna zong hilou, hinanleh nu-le-pa pang suh ding neilou, nu aw, pa aw tuomi-khumi ka dei chi’a kiphinna ding neilou nau tanga, lungkham mangbangte lungsim ah hing kilang jel hi.

 

Pasian in sil ding ka neilou lai in puonsil na’ng na pieh a, neh ding dawn ding ka neilou lai in neh ding ann, dawn ding tui na’ng na pieh hilou amah chi kam te’ng pen nau tag ate kamsung a pat pawt banga zah in um jel hi.