A HINA BANG A POM DING IN!

Khovel ah mi piengsuol (disabled) hilou, piendantuom deu (differently abled) billion khat val um, khovel pumpi mising 100 lah a 15 (15%) pen mihing piendan tuom deu um hi. Kum tengin December 3 pen “International Day of Persons with Disabilities” chi’n united Nation in ana zang jel. Tukum thupi ding ahileh “Michin a di’a kituhlut theina society ahi theina di’a a dangtu umte pampai ding” chi ahi.

 

Piengsuol I na chi jel uh, tulai in social work profession a piendantuom deu chi’a minvaw mihingte ahileh I society sungah etdan khat in ana ki en zing hi. Mihing khat pen I saidan, I chiil dan leh I thumop dan in khanglien nuom hi. Mihing lung venglou khat ngol houpi zing lechin ngol deu deu, pil houpi lechin lung venglou hinanleh bangtan e khat in ki henna nei thei hi.

 

I society sungah tunitan in piendan tuom mi khat ki pampai nalai, etdan tuom in ki en nalai, pien bukim mihingte tan hamphatna ama un zong a jal ajou ding uh hinapi nasatah in ki pampai nalai hi. Siamzilna, nasepna, damtheina, khuolzinna, politics leh nampi vaihawmna vel ah panmun kipe thei nailou hi. Piendantuom hinanleh tam I gente toh kisai ah pienphate sang sanga bawlthei zaw leh siemzaw tampi um ding uhi. Mipi/society in I koi dan uh, I et dan uh a tuom nalai zieh a tallang theilou leh mihing hina dawl a a zalenna uh zang theilou a I koi zing nalai uh ahi.

 

Tam bang mihingte toh kisai I lungput dinmun di’a poimaw ahileh mihing khat a hina bang a pom leh ei ma toh ki bang ahi chi’a I pom thei uh ki phamaw hi. Sapham in gen talei acceptance and non-judgmental attitude lunggel I nei uh ngai hi. Amahaw zong eima banga lunggel thei, zalenna nei, right nei ahi veve uhi. Pienzie tuom deu ahi vang ua zalenna self determination a neipen uh I khatan sah jel uh dih lou ahi.

 

Tukum UN in thupi di’a a guonggal, “Removing barriers to create an inclusive and accessible society for all” toh kisai eima mimal ngaisutna ah bang bang bearer I society sungah a um ei chi ngaisut chiet in, kei ma mimal ah bang mawpuohna ka nei ei, tam mipientuom deute toh kisai bang ka chi mu ei chi eima kituot (self retrospection) lei I adei huai khop mai. Tua te, tua mi, tua pa, tua nu chi lou in ke’n tuote toh kisai bang attitude ka nei ei chi thei chiet di’n aw le! Mi hing khat ahina bang a pom ding in aw le!