Laivuonna Kipan, Mei Duhdahlou Kipan

 

A PEILOU CHIA MIT, A PEI CHIA VAHLOU

 

Manipur electric duhdah lou ahi chi pen alien-aneu, a te-akhang in I theisa uh ahi. Hinanleh kumtawp laivuonna hun chieng beh in lai sim theina ding in hing vah leh chi mi chin innsung a kigen tampen khat ahi. Manipur meivah ahileh “a pei lou chia vahlou, a pei chienga zong vah lou” chi thei phiel in um hi. A duhdah lou pen thukhat hitaleh, a vah sun sun chieng beh in zah thei ding in vah leh dei huai chilou ngal gen di bei hi.

 

Electricity kichi ni chin hinkhuo a di’a poimaw teng lah a chi khat, gam khantouna dinga poimaw, meivah umlou a industry um theilou, nasepna matal theilou, laisimna pei zang theilou, hinkhuo kitawl theilou, hinkhuo um zie umlou chi’a min a genlai un Manipur, adieh in hill districtte ah a pei sun sun chi’a zong laisimna zah theilou hi nalai hi. A vah sun sun le zong dahkal khat zong vah joulou hinalai.

 

Manipur innveng Nagaland, Assam, Meghalaya, Tripura, Mizoram, Arunachal lah ahileh Manipur toh te in meivah lam ah sun-le-jan bang thei jel hi. Bang zieh a Manipur government in tam meivah buoina su veng theilou ata diei le? Tu masang in prepaid system hing introduce ua, baa khat sung ahileh hing sa veng vung sam hi. Hinanleh bangtan dailou in  ngeima bang suh kia jel hi.

Manipur in a zah khop ding meivah nei sih nanleh mun dang apat lei in um thou sam hi. Ahitaleh bang chidan a ki ching thei mama lou a diei? A government fellou zieh a diei, ahisihleha mipite zillou zieh a diei? Government in mei hoitan hing peleh a fee zong hoita kip pe ding ahi chi mipite kamsuo ahi. A langkhat lam ah ahileh government in mipite’n dihtat tah in a fee pe chiet lei meivah hoita um ding ahi chi a ngaidan uh hi ding hi.

Mei a hoilou chie bang zieh a government kunga kiphin ngamlou a I hia chi ngaisut tham ching hi. I dihtatlou zieh uleh a fee ahi ding banga I pieh lou zieh uh ahi lel hi.

Lam khat ah tam banga mipite poimaw petu di’a tel a um, solkalte kum tampi kizom a pe theilou bang zieh a kitel ching zing mei adiei? Solkal mawpuohna – a punlop a mipi poimaw electrict, lampi, tuineh chite a lou theilou a apieh ding uh hi na jen pi, bang chi ata diei le?

Sangnaupangte kumtawp laivuonna hun sung beh in regular tah in pei thei leh chi mipi aw ahi.