TET LEH TRIBAL STUDENT UNION

Teacther Eligibility Test laivuonna November 27 ni'n Manipur state sunga district capital teng ah um ding chi hileh kilawm awm tah, Imphal khopi sungah ki bichil tah in um ding chi ngaita. Manipur govt sai dan tah hileh a exam gentalou a form zong Imphal a i va lah thaw uh ngai nalai, hinanleh Joint Committee of Hill District Students’ Organisation (JCHDSO) a pang khawm Zeliangrong Students’ Union Manipur, Senapati District Students’ Association, Churachandpur District Students’ Union, Naga Students’ Union Chandel, Tangkhul Katamnao Saklong leh Kuki Students' Organisation te pan halahna ziehin district capital chin ah form mu thei in hing um hi.

 

JCHDSO in ana demand tangpi ahileh exam centre ban ah application form te Imphal mai hilou a district capital teng a koi ding chi hinanleh exam centre pen tukum adi'n phutjoulou ua, hinanleh kum kia chieng apat district capital teng a nei hitading chi govt apat written in kilemna nei thei uhi. Tua bang kal ah All Tribal Disable Union Manipur in a lang khat ah ST leh SC te adi'a mark percentage ki bikhiet 45 leh 50 apat 5 percent a consession bawl sah ding leh ama'u a di'a travelling allowance ban ah exam hall a tawm a bawl sah ding in ana phut uhi.

 

TET exam toh kisai ban ah sil dang tampi apat Manipur govt in tanggam te a nelsie dan phuolsel guollou ahi dan kilang hi. National sports lai in Imphal janggam pen mun ki chinglou pum theisa gegu hinanleh sport stadium teng ki bichil tah in ki se khawm hi. Tuabang ma in project poimaw khat zong singtang gam a di’a bikhiet in um ngeilou hi. Tutung TET exam zong masana tabah hill district teng ahi ngai ding ahi chi thei kelkul napi, Imphal sung adi’a koi sawm tei tei hi jel hi.

 

Tam bang solkal gamtat dan in Manipur sunga ki thangsietna kilang sah a, hamphatna ahithei tan a tansahlou sawm a um ihi dan talang hi. A lang khat ah en kia lei, Meetei te population tam zaw nan uleh bit kisa lou uh china ahi.

 

State sung pen kiguol tah a hamphatna hawmguol ding chi thei napi uh, Imphal a akoi sawm zing mai uh bang zieh a diei I chi leh singtangmite kituohlou dan thei chieng seng seng un, I sou uh ang tham jel uh ana hi khinkhien jel hi.

 

Tua ahiman in nampi level, philanthropic level, student level, numei level a networking hoitah siem kiphamaw ahi dang kilang hi. Singtang district teng ah tam bang ki hou theina leh kizopmatna hoi tah in nei thei ta henla hilei nelsie a ki um zing lou ding ahi dan tutung TET exam toh kisai student union te nasep apat mu thei in um hi.