Christmas hun ang nai chieng in…!

Ni-le-ha te hing ki hei in, ni suo leh tum dan te’n phalbi lunghel hing kuongsah kia panta uh chi I thei chiengin Christmas ahing naita chi I thei chiet uhi. Christmas ahing nai chiengin mun tuom a um, nu-le-pa, tu-le-ta te’n inn lam zot kal ngahla ua, inn mun a um naupang neu nou noute’n van tha nei kal ngahlah in a nu-le-pa te uh pang sug kipan ta uhi.

 

Tam hung chiengin kinepna ding bei, ama khelna zieh hilou, a ut man zong hilou, a deitelna zong hilou, hinanleh nu-le-pa pang suh ding neilou, nu aw, pa aw tuomi-khumi ka dei chi’a kiphinna ding neilou nau tanga, lungkham mangbangte lungsim ah hing kilang jel hi.

 

Pasian in sil ding ka neilou lai in puonsil na’ng na pieh a, neh ding dawn ding ka neilou lai in neh ding ann, dawn ding tui na’ng na pieh hilou amah chi kam te’ng pen nau tag ate kamsung a pat pawt banga zah in um jel hi.

 

Eite’n sil senglou, neh senglou, bun senglou, zah senglou ni-le-puon, ne-le-dawn ding an-le-tui I nei lai un, a nei joulou, mite khate neng nangawnchiltui kai phiel a dugaw nempi I gam ah um hi.

Christmas pen Pasian nang leh kei di’a a’ng pienna thu manpha tangkoupi hun leh leh  nausen dawn dinga dawn ding neilou tanga genthei te toh kipah bukim tah a dawn chiet dingin Christian te ki sa pan talei dei huai hi.

Hattuom pawlpi min ahi mai thei, nam sung pawlpi min ahimai thei, sangnaupang pawlpi min ahimai thei, liengvai tanga khat panpina di’a khutdaw pen kipahna lah a, I bawl theina chiet ua pang dingin I ki chiel ahi.

 

Lamka jang mei mei mitsuon lou in, Zodawn lam a I mi I sa genthei te’n I puonsil lum khat mai mu uh hitaleh bang jata in akipah ding uai? Na inn lum a sil senglou, teen senglou a na koi, I koite pholdoh in, genthei tagate toh Mangpa Jesu hing pieng ding lamtuo di’n michin iki chiel ahi.

Lessons From Wise Men of the East

I thupi uh a huntawh kituakloh nasah zongh um ingh, ahih zongh in sim suk suk lecin tulai hun a zat theih ahihlam na phawk pan phet diing hi.

 

Pasian neite Munkhat ah: Laisiengthou thuktak a suite’n mipil thumte agenna ua’h, gambupkhat chiet Kumpi ahih ban ua’h aksi lam siem hidan in gen uh hi. Kumpi bek hiloh, aksi lam siemte’n zongh ahinna ua Jesu aneih tek chieng un, mun tuom tuom, gamla pipi apan Jesu be diing in ong peikhawm theih uhi. Tua ahih leh, ei lawi in Jesu neih taktak loh ihi diem le? A’ihk’eh nei khinsa neinawnloh thak ihi d’uam? Ki ngaihsun thak ni.

 

Lungsim pumpi toh Jesu nuojui: Bethlehem zuon a mipilte a lungsim/ngaituona teng utoh Pasian mapuina ahsi ajuui lai un lamkaal ah buoina bangma tuoh lou uhi. Hinanleh Pasian mapuina ginglel a milien/milal leh meikhuliente a’ng gintaat zawhtah un Pasian in kiphuol mangsan hi. Athangse thei Pasian in anuo ijuui na’h ginglel loukei a ijuui laisie’n lamzang tah in ima hingpui zing diing a, hinanleh Ama saanga milien milal maipha isui nini’n hing kiphuol mangsan pei diing hi.

 

Koi ah a om ua: Sina guom, Kumpi Herod dawkaan a a gammang sung un maban a amaipha etman uh leh Pasian puina aginlel man ua sil hing tung diingte atheipha ban sih uhi. Hinanleh a umna uh dih nawnlou ahi chi a’ng kiphawkhiet chieng un, “eite zong khiat hiloh a eite ong zong khia” Pasian ong kilangh nawn pah hi. Sina khuuh, khelna a iki buol laisie’n Pasian kimu theiloh a, hinanleh tua khelna mun a um ihi lam ih hong kiphawk khiak cieng in, hing pei aw kata chie ei angkawi diing in akhut ana jaah gige hi.

 

Pasian Biakna’h: Bawngbuk sung a tunh ciang un zahtaakna lianpi tawh kingiamkhiat tak in khup dilsuk ua, sil manpha tampi tawh biahpiakna neih uh hi. Pasian biakna’h kingaingiamna leh maitam sillat tuam tuamte ban ah, zahtaaktak a biak apawimawh dan ensak hi.

 

Heisung ah na um ei: Vansawlsiengte tungtawn in Joseph in a umna uh si theina mun leh munjau huoi ahidan a thei man in a jaan a jaan in naungee leh a nu mun tuom ah kituon mangpi hi. Tuni’n na umna, touna leh lupna munte nang leh na innkuonte a diing in bitna mun ahinai? Tate a di’a si theina mun amah? Hoitah a kivel chien hun laitah ahi.

 

Maipha suiman: Mipil thumte’n Pasian puina khellam a Kumpi Herod theina amuongjaw man un naungeeh nempi’n silawh hi. Tuni’n nalamkaina’h Pasian dong lou in mihing, meikhuliente na masuon jaw kha amah. Lamkai khat ihileh Pasian maipha suitinten khu nampi a diing a damna hijaw diing hi.

 

Khupsitna: Pasian nua ijuina’h ginglel loutah leh kingiemkhiet tah a juithu Ama deidan ahi. Koi maipha suida kon vai. Pasian muong leh Ama maipha sui jou pou lei I mailam vangjaw diing hi.