Ngaidamna: I phulou lunsim thoidamna nasep

~ Tungnung Zamlunmang Zou

Tam article ahileh MELC Delhi Local Pastor in inlam a suty a’ng peisan ziehin ut-lou chamlou a Pasian thu hing gen ngaina mun a ka ding ziehin ka sermon ding thu toh kisai them khat ka gel khiet pen ka hing suhsau deu ahi, Ni bangja ahei khat bangthu ki gen ding ahi’a chi a kaki ngaituo dedu lai in ka lungsim ah bangma hing lutlou hi. Lunsim a thum kawm a ka ngaisut charchar lai in Ngaidamna chi hing kilang hi. Ningkum a ka lawmte khat in Ngaidamna haupa angchi pen ka lunga hing kilang ahiman in, atam sem nei thei ahikha leh chi’n ngaidamna thu Peter in Jesu kunga a doh pen ka suita hi. Thu gen ngeilou akihi man in bang chi ki suongtuo ding chitoh ka buoi khop nalai hi. Tam banga ka ngaisut veng vung lai in Mathew 18: 21-35 tungtawn a houlimna nei hileh chi’n tam anei ate kang guolta lemlum mai hi.

UZO in Education policy implementation abawl, thuop ngai

United Zou Organisation GHQ in a guon, Education Department te panlahna toh Behiang kuol a sangnaupangte khuolna zieh in tukum apat High School hoitah khat din khiet didan in umta hi. Roman Catholic hattuom in hun sawtpi ana etkol, hinanleh i gam a lemna leh muonna in vai ahawm lou zieha ana khawlsan uh St. Mary’s School pen High School level a upgrade hi ta ding hi. Tam school ah tukum in tan 8 (class VIII) tan um dinga, a kum kum in kibe tou tou ding chi hi.

Tam Behiang kuol a skul hoitah koi ding thu toh kisai in UZO GHQ in Education Policy anei dunjui un December 23, 2009 nin Behiang ah akoi mi a koisa chi umlou in UZO GHQ in Education Seminar nei ta uhi. Tua chi’n January 5, 2010 nin lamkaite’n genkhawmna va nei kia uh a, Behiang bial a skul nei tuom tuom asaitu Board te toh ki thukim in skul pen pat thei hita ding in thupuohna va bawl uhi. Hinanleh, a dahuoi mama khat ahileh unau, EBC te saanginn pen adangte banga tawpsah ding pen hithou lou chi uhi. Tua ahiman in skul dang umte’n khah ding ua, EBC te skul leh St. Mary’s School maimai umta ding china hita hi.

Suolam mipilte apat ette kham chingte

Thumapui: Laisiengthou zil leh research thuutah a bawl hisih nanleng,  pian apat Pasian thu toh ana ki khangtou ahiman in hunchii khat vang kithei milmel sam hi.  Tam a nei a tekahnate ahileh heisung laibu apat kilakhia hilou in keima suongtuona leh lunggel ahibou hi.

Pasian neite Munkhat ah: Laisiengthou thuutah a suite’n suolam mipilte agenna ua’h, gambup khat chiet apat hing kipan ahi ban uah ahsi lam siem hidan in gen uhi. Kumpi meimei hilou, ahsi lam siemte’n zong ahinna/a lungtang ua Jesu anei/mu tah chieng un, mun tuomtuom, gamla pipi apat Jesu be diing in hing peikhawm thei uhi. Jesu nei hinna nuom kipahna thugu khu, mipil te'n athei siem sih chi hinanleh i mihing pilna toh ama gintaatna i nei chiengin hei mun ah um in, bang ham, bang pau zang in, a muol zatam in hing hal nanleh Ama be di'a kalsuon koima thase lou hi.

Lungsim pumpi toh Jesu nuojui: Bethlehem zuon a mipilte a lungsim/ngaituona teng utoh Pasian mapuina ahsi ajuui lai un lamkaal ah buoina bangma tuoh lou uhi. Hinanleh Pasian mapuina ginglel a milien/milal leh meikhuliente a’ng gintaat zawchieng un Pasian in kiphuol mangsan hi. Athangse thei Pasian in A nuo ijuui na’h ginglel loukei a ijuui laisie’n lamzang tah in ima hingpui zing diing a, hinanleh Ama saanga milien milal maipha isui nini’n hing kiphuol mangsan pei diing hi.

Internet social networking leh Zo suonte kizopna

New Delhi, January 15, 2009: Khovel a changkang dung jui in tou mun a ki houtheina sang deu deu ta hi. Tulai in India ah Orkut leh Facebook tungtawn in Zo suonten zong ki chimat semna nasatah in kinei deu deu hi. LAiteng mei mei hinawnlou, lim leh mel toh khat leh khat kihou thei in, mun khat a um bang in hinkhuo ki zang theita hi. I unpi un hinai samsih lezong, India a ki zang minthang deu Facebook leh Orkut ah Zo suonte sim senglou ki um theita hi.

Tu malam kum 3 vel masang in Orkut ki hazah mama a, hinanleh tuni chiengin akoi akoi Facebook lam ah ki lunglut zaw chietta hi. Orkut leh individual email akibahna hun chiengkhat um hi. Email ahileh mimal kihouna in ki zanga, iki houna pen koima dang in mu theilou hi, hinanleh orkut ah mimal kihouna hinanleh iki houna pen i houpi lou midang in zong mu thei in sim thei uhi. A honpi a kihouna um thei senglou hi. Bang zieh a Orkut lam sanga Facebook lam a ki lunglut zaw e i chileh Facebook ah mipi ahon in ki hou thei a, zahnop mama hi.

ZCF i chi Refugee Camp tahpi ma ahita ama le?

Zogam.com kasim leh The Lamka Post | January 15, 2010 issue sunga news item khat “Chennai ah YPA unit phut ding” (India simlam Chennai ah tunung zek chiang in Young Paite association (YPA) unit phuh hiding a, hiai toh kisai official process pailel in Chennai a makai ding leh YPA/Hq kihou lellel uhi. Chennai ah tulel in Paite mi Government nasem leh Private Company a sem mi 1000 val bang om in EBC saptuam leng ding kheta hi.) chitoh kisai a Zogam.com member dvzomi comment pieh kasim in ka lung hing khoi mama hi.

A comment piehte:

Comment 1: Chennai ah kum li bang om ding kahita a, himahleh Paite milip 1000 val omdan a kigelh pen kha dik din ka gingta kei hi, Chennai a Paite mi omzah 1000 a ching kei di chih chiangtak in ka gen ngam. Zomi milip a sim di hilehle 1000 aching zou naikeilai maithei.