United Zou Organisation GHQ in a guon, Education Department te panlahna toh Behiang kuol a sangnaupangte khuolna zieh in tukum apat High School hoitah khat din khiet didan in umta hi. Roman Catholic hattuom in hun sawtpi ana etkol, hinanleh i gam a lemna leh muonna in vai ahawm lou zieha ana khawlsan uh St. Mary’s School pen High School level a upgrade hi ta ding hi. Tam school ah tukum in tan 8 (class VIII) tan um dinga, a kum kum in kibe tou tou ding chi hi.
Tam Behiang kuol a skul hoitah koi ding thu toh kisai in UZO GHQ in Education Policy anei dunjui un December 23, 2009 nin Behiang ah akoi mi a koisa chi umlou in UZO GHQ in Education Seminar nei ta uhi. Tua chi’n January 5, 2010 nin lamkaite’n genkhawmna va nei kia uh a, Behiang bial a skul nei tuom tuom asaitu Board te toh ki thukim in skul pen pat thei hita ding in thupuohna va bawl uhi. Hinanleh, a dahuoi mama khat ahileh unau, EBC te saanginn pen adangte banga tawpsah ding pen hithou lou chi uhi. Tua ahiman in skul dang umte’n khah ding ua, EBC te skul leh St. Mary’s School maimai umta ding china hita hi.
Sanginn enkol ding kipoimaw
Tam saanginn hontoh kisai in Sangpu (Principal) ding hoitah ki poimaw kia ding ahiman in tam toh kisai Lamka lam apat mi chitah leh laisiem khat sawl tou poimaw kia hi. Tua ahiman in UZO in sum-le-pai a pang nuomte bang chilai pou in kipapi ding ahi dan zong Secretary pu’n gen hi.
Zodawn Zou suon laisimna lam ngaina mi ki poimaw
Tam toh kisai a thei di’a poimaw kia khat ahileh, kum 1 or 2 vel eima’n enkol tou lei, kum ang hoitou jel leh unau Catholic te phut a ama uh mama etkol tousah kia ding chi tupna UZO in nei hi. Tua ahiman in tukum leh kumkia sung teng sangpu hoitah khat in a etkol tou poimaw hi. Ha teng in i chi ei, Kum 1 in taza in pang vang na chi ei? Ha teng in taza in pang vang na chi ei tuo pen nang ma ki ngap dan leh Zodawn a i mi isa lai simlou a um sangnaupangte na khuolna ah ki nga ding hi.
Koi zong i nam leh gam, lailam ngainatna toh kisai a tawm ngai suo chiet dingin chielna hing kibawl hi.
Koi zong lainatna nei a akithuopi nuom i um kha leh uzo.ghq@gmail.com or admin@zolengthe.net ah ki theisah thei zing ding ahi. Tam ki theisahna na bawl chiengin na Address leh COntact number zong tuongsah lechin bulpi lam teng hing ki thuja pi tou tou ta ding uhi.
---------------------------------------------
Please Visit ZOLENGTHE.NET | Connecting the Zo people
No comments:
Post a Comment