Suolam mipilte apat ette kham chingte

Thumapui: Laisiengthou zil leh research thuutah a bawl hisih nanleng,  pian apat Pasian thu toh ana ki khangtou ahiman in hunchii khat vang kithei milmel sam hi.  Tam a nei a tekahnate ahileh heisung laibu apat kilakhia hilou in keima suongtuona leh lunggel ahibou hi.

Pasian neite Munkhat ah: Laisiengthou thuutah a suite’n suolam mipilte agenna ua’h, gambup khat chiet apat hing kipan ahi ban uah ahsi lam siem hidan in gen uhi. Kumpi meimei hilou, ahsi lam siemte’n zong ahinna/a lungtang ua Jesu anei/mu tah chieng un, mun tuomtuom, gamla pipi apat Jesu be diing in hing peikhawm thei uhi. Jesu nei hinna nuom kipahna thugu khu, mipil te'n athei siem sih chi hinanleh i mihing pilna toh ama gintaatna i nei chiengin hei mun ah um in, bang ham, bang pau zang in, a muol zatam in hing hal nanleh Ama be di'a kalsuon koima thase lou hi.

Lungsim pumpi toh Jesu nuojui: Bethlehem zuon a mipilte a lungsim/ngaituona teng utoh Pasian mapuina ahsi ajuui lai un lamkaal ah buoina bangma tuoh lou uhi. Hinanleh Pasian mapuina ginglel a milien/milal leh meikhuliente a’ng gintaat zawchieng un Pasian in kiphuol mangsan hi. Athangse thei Pasian in A nuo ijuui na’h ginglel loukei a ijuui laisie’n lamzang tah in ima hingpui zing diing a, hinanleh Ama saanga milien milal maipha isui nini’n hing kiphuol mangsan pei diing hi.

Hei mun ah a um ua: Shina guom, Kumpi Herod dawkaan a a gammang sung un maban a amaipha etman uh leh Pasian puina aginlel man ua sil hing tung diingte atheipha ban sih uhi. Hinanleh a umna uh dih nawnlou ahi chi a’ng kiphawkhiet chieng un, “eite sui khiet hilou a eite hing sui khia” Pasian hing kilang kia pei hi. Sina khuuh, khelna a iki buol laisie’n Pasian kimu theilou a, hinanleh tua khelna mun a um ihi lam i hing kiphawh khiet chieng in, hing pei aw kata chie ei angkawi diing in akhut ana jaah gige hi. Heimun ah um nanlechin, Pasian in hing mu zinga, hinanleh ama lam na ngatlou laisie’n ama muthei lou ding ihidan ensah hi.

Pasian Biehna ah: Bawngbu sung a tun chieng un zataatna lienpi toh kingiamkhiet tah in khup dinsuh ua, bohkhup pum in sil manpha tampi tawh biehpiehna nei uhi. Pasian biehna ah kingaingiemna leh maitam sillat tuom tuomte ban ah, zataattah a bieh apawimawh dan ensah hi. Ki uahsahna leh ki thupisahna toh Pasian ki bethei a, hinanleh Pasian a ding in gimnamtui lou hi, nahina, nalalna leh na letna na awmphawh a zang a Pasian na bieh a ahileh bekhiel ding nahi. Kingaingiemna Pasian in dei hi.

Heisung ah na um ei: Vansawlsiengte tungtawn in Joseph in a umna uh si theina mun leh munjau huoi ahidan a thei man in a jaan a jaan in nausen leh a nu mun tuom ah kituon mangpi hi. Tuni’n na umna, touna leh lupna munte nang leh na innkuonte a diing in bitna mun ahinai? Tate a di’a si theina mun amah? Hoitah a kivel chien hun laitah ahi. Joseph dinmun a ding zong nahi kha mai thei, na tate a ding a sietna khu a umkha zong nahi mai thei, na sie-le-pha theina ban ah Pasian dongkawm in khodah kawi lechin, ki huituup hun, ki tuondoh hun zong hita maithei ahi.

Maipha suiman, Meikhu lian etman: Suolam Mipilte’n Pasian puina khellam a Kumpi Herod theina amuongjaw man un naungeeh nempi’n silawh hi. Tuni’n nalamkaina ah Pasian dong lou in mihing, meikhuliente na masuon jaw kha amah. Lamkai khat ihileh Pasian maipha suitinten khu nampi a diing a damna hijaw diing hi. David in koima dong lou in Pasian ma dong hiit hiet a, a nampi a ding in damna leh ama a ding in vaihawmsiemna pilna pieh in um hi.

Khupsitna: Pasian nua ijuina ah ginglel loutah leh kingiemkhiet tah a jui khu Ama deidan ahi. Koi maipha suida kon vai. Pasian muong leh Ama maipha sui jou pou lei I mailam vangjaw diing hi. Naugeh Jesu ading in na lungtang ah mun awn in Pasian puina ginglellou in jui zing pou lei, i Christian hinkhuo ah lawchinna leh hagau lam a kalsang tawina khat hi ding hi.

Simtu jousie Khristmas tungtawn in Pasian guolzawlna na tung uah hing tung ta hen. Amen!

---------------------------------------------

~ Pupu Zou