Simte VDO Album “Tutkhawl Zaikhiang” editorial review with VDO

“Tutkhawl Zaikhiang” i chi pen a theinop sem di’a gen ding hilei ‘khawlkhawm a la sakhawm’ chi hi mai dingin ka gingta hi. Simte sangnaupang “Khangthah Zuun Pawl” te’n KZP kum 50 chin lopna ding toh kisai a unaupa Chris H. L. Simte panlahna toh thupitah a ang bawl doh uh ahi. Tam VDO Album chituomna khat ahileh Simte ham a kisa hinanleh asate unau Mizo lasiemte ngen ahi uhi.

Mimi Renthlei, Mami Varte, Zomuanpuia, Lawmi Khiangte, C Sanga, Sanglura leh Joseph Zaia te’n Simte awfoi dihtah a a’ng sah khiet uh i mu chiengin gintaat huoilou phiel lah pataat huoi kasa hi. Akizilna uh i et leh uijat lah huai sim, pataat lah huai sim jel. Zo ham dang kichi mawng mawng theilou pawlin tabang a ang sah khiet uh akoi koi in ngai chiet him him ding in dei huai kasa hial hi. Gen be kia talei, a awkai dih chiit chiet sih nanleh hichi deu eh china ding pen atawm mama hi.

University of Michigan apat Zou Script suichien nuom um

United Zou Organisation in Zou script chia official a apuon, A BA AW DA pen University of Michigan, USA apat in Ph.D. bawl khat in suichien nuom in Zolengthe tungtawn in hingkan hi. Thulahlou emailte hi dinga kana koi leh 2/3 ang kan man in ka reply khong khong ta hi. Tuachi’n ama zong hing tha nuom deudeu in Zou Lai/Script pen akip akawi a hing dong tou touta ahiman in ken zong alaibu scan zawzen in kana thot thruopta.

UZO Logo a kigiel pen leh a script te a ettuo chiengin lungbuoi kisa hi ngei ngei ding ahiman in hing email jelta hi. Ken zong a law ngaina theilou, alampi um sun chi’n a panpi thei dia ka gingtat UZO GHQ, ZLS chite leh Dr. Lalpi te kunga thuchien akan ding in kana thu hilta hi.

Tam atung a kouma mimal kihouna kang talatna san ahileh Zoulai pen hing pallun ding ahi chi gingtatna lienpi ka nei hi. Eilawi in tu-le-tu in a zahna ding poimaw umsih chinanlei, hun hing pei jel ding ahiman in, sil khat poupou hoitah in ana kem lei ahing pallut hun pen hing um ngei ngei in a mu thei in um kasa hi.

Ngaidamna: I phulou lunsim thoidamna nasep

~ Tungnung Zamlunmang Zou

Tam article ahileh MELC Delhi Local Pastor in inlam a suty a’ng peisan ziehin ut-lou chamlou a Pasian thu hing gen ngaina mun a ka ding ziehin ka sermon ding thu toh kisai them khat ka gel khiet pen ka hing suhsau deu ahi, Ni bangja ahei khat bangthu ki gen ding ahi’a chi a kaki ngaituo dedu lai in ka lungsim ah bangma hing lutlou hi. Lunsim a thum kawm a ka ngaisut charchar lai in Ngaidamna chi hing kilang hi. Ningkum a ka lawmte khat in Ngaidamna haupa angchi pen ka lunga hing kilang ahiman in, atam sem nei thei ahikha leh chi’n ngaidamna thu Peter in Jesu kunga a doh pen ka suita hi. Thu gen ngeilou akihi man in bang chi ki suongtuo ding chitoh ka buoi khop nalai hi. Tam banga ka ngaisut veng vung lai in Mathew 18: 21-35 tungtawn a houlimna nei hileh chi’n tam anei ate kang guolta lemlum mai hi.

UZO in Education policy implementation abawl, thuop ngai

United Zou Organisation GHQ in a guon, Education Department te panlahna toh Behiang kuol a sangnaupangte khuolna zieh in tukum apat High School hoitah khat din khiet didan in umta hi. Roman Catholic hattuom in hun sawtpi ana etkol, hinanleh i gam a lemna leh muonna in vai ahawm lou zieha ana khawlsan uh St. Mary’s School pen High School level a upgrade hi ta ding hi. Tam school ah tukum in tan 8 (class VIII) tan um dinga, a kum kum in kibe tou tou ding chi hi.

Tam Behiang kuol a skul hoitah koi ding thu toh kisai in UZO GHQ in Education Policy anei dunjui un December 23, 2009 nin Behiang ah akoi mi a koisa chi umlou in UZO GHQ in Education Seminar nei ta uhi. Tua chi’n January 5, 2010 nin lamkaite’n genkhawmna va nei kia uh a, Behiang bial a skul nei tuom tuom asaitu Board te toh ki thukim in skul pen pat thei hita ding in thupuohna va bawl uhi. Hinanleh, a dahuoi mama khat ahileh unau, EBC te saanginn pen adangte banga tawpsah ding pen hithou lou chi uhi. Tua ahiman in skul dang umte’n khah ding ua, EBC te skul leh St. Mary’s School maimai umta ding china hita hi.

Suolam mipilte apat ette kham chingte

Thumapui: Laisiengthou zil leh research thuutah a bawl hisih nanleng,  pian apat Pasian thu toh ana ki khangtou ahiman in hunchii khat vang kithei milmel sam hi.  Tam a nei a tekahnate ahileh heisung laibu apat kilakhia hilou in keima suongtuona leh lunggel ahibou hi.

Pasian neite Munkhat ah: Laisiengthou thuutah a suite’n suolam mipilte agenna ua’h, gambup khat chiet apat hing kipan ahi ban uah ahsi lam siem hidan in gen uhi. Kumpi meimei hilou, ahsi lam siemte’n zong ahinna/a lungtang ua Jesu anei/mu tah chieng un, mun tuomtuom, gamla pipi apat Jesu be diing in hing peikhawm thei uhi. Jesu nei hinna nuom kipahna thugu khu, mipil te'n athei siem sih chi hinanleh i mihing pilna toh ama gintaatna i nei chiengin hei mun ah um in, bang ham, bang pau zang in, a muol zatam in hing hal nanleh Ama be di'a kalsuon koima thase lou hi.

Lungsim pumpi toh Jesu nuojui: Bethlehem zuon a mipilte a lungsim/ngaituona teng utoh Pasian mapuina ahsi ajuui lai un lamkaal ah buoina bangma tuoh lou uhi. Hinanleh Pasian mapuina ginglel a milien/milal leh meikhuliente a’ng gintaat zawchieng un Pasian in kiphuol mangsan hi. Athangse thei Pasian in A nuo ijuui na’h ginglel loukei a ijuui laisie’n lamzang tah in ima hingpui zing diing a, hinanleh Ama saanga milien milal maipha isui nini’n hing kiphuol mangsan pei diing hi.