Simte VDO Album “Tutkhawl Zaikhiang” editorial review with VDO

“Tutkhawl Zaikhiang” i chi pen a theinop sem di’a gen ding hilei ‘khawlkhawm a la sakhawm’ chi hi mai dingin ka gingta hi. Simte sangnaupang “Khangthah Zuun Pawl” te’n KZP kum 50 chin lopna ding toh kisai a unaupa Chris H. L. Simte panlahna toh thupitah a ang bawl doh uh ahi. Tam VDO Album chituomna khat ahileh Simte ham a kisa hinanleh asate unau Mizo lasiemte ngen ahi uhi.

Mimi Renthlei, Mami Varte, Zomuanpuia, Lawmi Khiangte, C Sanga, Sanglura leh Joseph Zaia te’n Simte awfoi dihtah a a’ng sah khiet uh i mu chiengin gintaat huoilou phiel lah pataat huoi kasa hi. Akizilna uh i et leh uijat lah huai sim, pataat lah huai sim jel. Zo ham dang kichi mawng mawng theilou pawlin tabang a ang sah khiet uh akoi koi in ngai chiet him him ding in dei huai kasa hial hi. Gen be kia talei, a awkai dih chiit chiet sih nanleh hichi deu eh china ding pen atawm mama hi.