C. LIENZAPAU CHANCHIN CHAWMKIM

 By- L T Khuma 

Awle hun sawtpi   achanchin het zui takloh tawbang a ana um,  tanggam mipi nam chuom chuom te zaila a pumkhat a eina huikhawm tu, Chungmuvanlai' tih tawngkam tawh a sakmin Si leh Bal tuka ina mekden hiel uh,  pu C. Lienzapau hi kuo ahim?  tih chuh, kuocheng in le gentam ngailoa ina hetchien sa'u ahi ta a. 

Zie ziek chun, mi tamtak te apata a chanchin zikdinga nawhna leh chielna kadawn dungzui in,  tuni hin'  zie ngetna aw chu ngai pawimawh in,  theih kham kham in neucha hun sulang kit ingka. 

Kimchang taka zikding hileh,  lehkhabu a suoh khamcha le umding ahih ziek in,  a chawmkim lam in zik mai ti tiu. 

A tumalam thusim leh, amah mimal hinkhuo chanchin lam taihsan in,  a tulai Insung khosak dinmun lam chawmkim tak in ana lutchilh hitiu le.

MANIPUR APAT MIZORAM AH

Tuma'  timai taleng,  gamsung buoi zieka mi tampi'n  In leh Lo taihsan a mun chuom chuom bela mahni sahimna ding leh nek le chak ngaihtuoh a ina taihzak sau sau lai u khan. 

Thingtangmi te zaila a thiem takmaia eina awibih tu leh, tununga khangthak hung um zel ding te ading ale,  lago lul tak tak eina siemdawk sak tu,  pu C. Lienzapau ngei hi le,  Manipur apat a Mizoram zuon haw lak ah ana pang hi. 

Amah gendan in,  ''1998 March tha a  Leizangphai kihal khah,  Milawngmun tua (Zomun)  kitihna mun apat khun'  kagal et tau''  ati. 

Tichun,  Leizangphai kihal thak zawh azing chun,  ama'n le azi le chate pui in,  Mizoram ana zuon ngala,  1998 March 18 in Mizoram a Darlawn khuo atung ui. 

Zie tak achun a innei nu tawh sep theih theih sema kithuoh in,  ahung khosa tozel ua,   khutia hinkhuo amat tohzel lai uchun,  2006 kum khan vangsiet umtak in,  pu C. Lienzapau chu natna khawk tak,  Meningitis (brain TB)  natna nei in ana ki enkawl pan a,  zie a kipat chun,  lungthim leh lunggel le kitup thei mumal talo in ahung um tai. 

Tichun guol le pai le pawlthei talo in,  Inmun-a hih theih theih hih in, nitin leh zankhuo chu a hun mang zozel thei a,  mahleh naupang neu cha cha ahih naklai ziek uchun,  Insunga nek le chak hawl tupen tawitheilo a ahung um mai chuh,  a haksat dingdan leh, a In neinu feldan tieng le avak hethiem theih mai hi. 

DARLAWN APAT AIZAWL AH

Hunte aliem zela,  khutia Darlawn khuo a kum 16 lam achen nung uleh,  damlohna zieka Insunga pa pen in Insung khosak vaihawm dingdan le hithei zawzen talo a ahung um phat chun,  nek le chak hawldan leh naute lehkha simna lam ngaihtuoh in,   'khopi na na na chuh neukhat a zie zie umdeuh in a'   tin,  2015 kum khan achen na'u Darlawn apat in,  Aizawl ah ana pemlut kit ui. 

Tichun Aizawl khawpi sung Bawngkawn Hmar veng ah,  mi In aluoh ua,  a nupan ua nasa taka kithuoh a patthak khawh in, ma ahunla tozel ua,  zie tak achun tunichan hin,  a sepgimgah uh Lalpa vangsakna tampi muhtheih a luok in ana khosa zui zel tau hi. 

A CHATE MIN LEH AHIH NA'U

Pu C. Lienzapau te nupan hin,  Lalpa vangsakna chapa 5 leh chanu 2 adawng ua,  amin uleh ahih nau chu anuoi a bang hi ahi. 

1. Thangsangjela 

2. Niengnunmawi

3. Lamtingo

4. Ginthienmuong 

5. Mawikim (kimcy) 

6. Zonunthara

7. Ramdinthara 

te ahiu ui. 

A HIH NA'U HAW

1. A lien pen Thangsangjela hin,  kum 2016 khan,  MA ana chai a,  kum 2017 khan college ah mi tahsang in tha 6 vel ana sem a, zie kum mah ahin, UDC direct exam ana bawl leh,  2018 May tha khan a result ahungsuok a,  vangphat umtak in ahung kizik dawka,  tuhin Mizoram Serchhip mun ah a na  joint in asem pan ta a,  Agriculture lam ahi. 

Chuleh,  Thangsangjela hin  zi nei in,  Pathien vangsakna chapa nih (2) anei ua,  amau chuh 

1. Lalrinhlua  leh

2. Pauzodinga,,,,  apu minlo ahiu ui. 

2.. Niengnunmawi  hih puonkhuih thiem ahi a,  puonkhuih lam apat in sum a huilut hi. 

3. Lamtingo hih 2010 kum khan  1st Assam regiment in ana lut a,  Indian army lama pat sum a huilut hi. 

4. Ginthienmuong hin 11 Class ana zo a,  mahleh haksatna chuom chuom ziek in ana sunzawm ta puoi. 

5. Nungak Mawikim (kimcy)  hih a u  nungak Niengnunmawi tawh kithuoh a sumdawng khawm ahiu a,  Kimcy vang vang hin,  Vakiria Designer ah Carment Contruction ah award ana kisan hi. 

6. Zonunthara hih BA 1st year simlai ahi a,  kineppih umtak ahi. 

7. Ramdinthara hih pawl 10  simlai ahi a,  kineppih umtak ahi bawk hi. 

Pu C. Lienzapau hih  gihawih khawvel a guol Chung Chuong ahihna khel lam ah,  Insung khawsak lam leh chale nau etkawl nalam ale' pa lawhting leh tukloh gimnam a hih dan akilang a,, ''tuhin sum le pai, nek le chak hawlna leh haksatna lawm lawm tuoklo in,  Pathien in kama apui zel hi''      tin,  pu C. Lienzapau in agen hi. 

pu C. Lienzapau hih  laphuok thiem kawchik leh lasa thiem chungchuong ahih dan chu,  genbuoi beh ngailo in,   Amah tawngkam tak in,   a za taphawt thinlai lungguk ah daibang acham zing mai a. Zie mai chule hilo in,  mi taima leh thagum neitak le ana hihna kheklam pek ah,  ki kingainiem  tak le ahih ziek in,   amah ngaina tu ten deih chuom taka ana chielna teu,  tamtak vei,   taksa hiselloh  na zieka ana sukpitin theih takloh zieka khawk asak thu leh,  kisuonlah um leh zahchak um asak thawh hielmai sek thu agen chim thei puoi. 

A tawpna ding in,  amah ngaina a munuom mah mah mutheilo mi tamtak te'n,   a chanchin  neukhat bek ana hetzui theihna ding ua   phalna kawt ei hawnsak zieka  mipi thasanga,  amah pu C. Lienzapau chung ngeia kipah thu gen kawm in,   ahi bangtaka genkim sip sip zawhloh na leh,  adik tawklo tihbang a um khak chun,  a ngaihdamna leh ahet thiem na kangen  hi.

SOME OF THIS SONGS

A thang maimai | Lenkawl ah ni hung suak in | Anglai pomlou | Chung muvanlai | Gelsau datan | Tung thangvan | MP3 Songs

Source: I will be very happy if anyone can show me where it is first posted, it is taken from whatsapp group