CHRISTMAS HUSA leh LAMKA KHOPI

Ni-le-ha liam zungzung in theilou kal in Christmas hing tungkia ding hita hi. Buai vengvung a hinkho zangte a dingin mitphet kallou bang nanleh, sep-le-bawl neilou, khawsa pankai jen a nehtawm suite adingin vang Christmas zong tunghah thei na e chi thei ahi. Christmas ahing nai chiengin mun tuomtuom a um, I tu, ita laisim leh nasem te’n kithalawpna lienpi toh innlam hing zuan ua, inn tunkal bang ngahla thei mama ding uhi.

Manipur pulang apat innlang I’ng zot chieng in huikhuo hilou, lamlian zui a gari a ihing tou chiengin Nagaland sung bang ing jan tun leh Christmas zang ding a aki singsahna uh athupi dan muthei in um hi. Inn chin ah ahsi leh meivah chi tuomtuom kikhai dim a, I Christmas zah nuomna lungsim bang kuong hulhul jou hi. Lampi thuom chin ah Christmas lamdotna gate ana kitung dimtou a, Christmas la chi tuomtuom toh meiphu bang awi in ana tou phingpheng jel uhi.

Mao ingkhel suh leh Naga leh Thadou khuo khen khat a Christmas Chibai chia kigial gate etlawm tahtah lamlian pang gel ah ana bawl ua, veng lutna chin ah Christmas vaidawnna gate chite bang muthei in um suhsuh hi. Imphal i'ng lutsuh leh dawr khen khat ah Christmas decoration chivel muthei ding bang ana um sam, inn tungkal ngahla deu mai a Bus heng jen a i'ngtai suh, Churachandpur district i'nglut leh zuailah! Christmas kizang lou ding hileh kilawm, I thanuomna teng bang theujou phial. Lamka khopi i'ng tun suhkia leuleu leh Christian umlouna gamte sanga ana gawta zaw, Christmas la kisa lah ja ding umlou, lamlian lampam a tuabang Christmas vaidawnna dinga zepmawi deu chite lah umta malmal lou. Aw! Ka pianna gam in a zillou chi mei ngaita!

Mi khenkhat in genleh, I lungsim bawnginn i chi poupou na ding ua, I lungsim bawnginn tapnou ngiingei na dinga eima a thanuomna lungsim a umlou chienga tuabang lungsim bawnginn pen gawta gengum ahiman in, Christmas kisahkholna, decoration leh a husa pen in zong bangtan a hei khat mawpuohna neitham hi.

I gam, Churachandpur district pen Christian gam chi’n iki letsahpi kha meithei, guntah in enlei a ngaw a gawta, khip bitbet, zomphol toh a hol a zong holkhietla phial a gawta ihita uhi. Hundampa hing pienni thupitah a lawm ding chia kisahkholna chite naupang huai sa ita ding uai, ahisihleh sum-le-pai pamai sa idi uai, ahisihleh a bawl pei um nawnlou idi uai? Christian te ding a I pawi thupi pen khat uh hisam hia, akoi akoi in, I inn mai, I dawr mai, I lampi leh zep theina chinteng zem lei kilawm awmtah hia! 

A langkhat lam ah enkia lei, tambang a I hundampa pienni leh Christian te dinga pawi thupi pen a I nei uh lamdotna di’a kithalawpna a um nawnlou pen I gam a muonna leh bitna a um nawnlou ziah adiai chi bang ngaitua tham ching khat ahi. Ka neulai in Christmas leh Kumtha chiengin jan sawt pipi lamlien ah kholai va leh Christmas la toh au jeju kana ja jel a, Christmas kikhop dingkal bang ngahla huai thei mama hi. Hinanleh tulai sil umdante ziah in kikhop zaw leh direct inn zot dingin, eima innsung a kikulkhum kihita mei hi. 

Bang chichiengin I gam ah lemna leh muonna I neikia ta ding uai chi ngaldot chiet meivai maw! 

- PUPU ZOU